१ थेस्लोनिकि 2 - याम्फुथेस्लोनिकिबेॽ पावलमि योम्बोक 1 वावानिसानुङ नानुसाजि, हे़निङ्नुङ चुप्पॽआ खा योम्बोक मे़ॽनिङ्मा मे़लिसा। इगो खागो हे़निङे़ॽसो लेन्डानुमे। 2 हे़निङे़ॽ लेन्डानुम, आक्कोबेॽ लेम्मा याक्लो फिलिप्पि ठाउँबेॽहा याॽमिजिडे़ॽ कानिङ बेॽलो दुःख पिसामिनुङ कानिङ ङेम्मानोॽ चुक्सामि। मोडोक्सो निवाहाङ्डे़ॽ कानिङ आँटिलो टोक्सा, थेस्लोनिकिबेॽ बेॽलो टेडिघरिक याॽमिजि टुसामिरोसो कानिङे़ॽ हे़निङ सुसमाचार खेम्मेॽटुङ्मा। 3 कानिङे़ॽ सुसमाचार खेम्मेॽमाबेॽ मङे़हा खा, मङे़हा निवा, रेम्डेॽमा खा इमाङ्सो माडहा। 4 निवाहाङ्डे़ॽ कानिङ बिस्वास ले़ःॽनुङ सुसमाचार खेम्मेॽमे योम्बोक पिसा। मोडोगे़ॽ कानिङे़ॽ याॽमिजि ने़ॽनि कानिङ्मि निवा नुरोॽ लेघुबा निवाहाङ साप्थाङ्मेॽमामि लागि यामुसिङ्मा। 5 इगो खा हे़निङे़ॽसो नुरोॽ लेन्डानुम, कानिङे़ॽ चानुये खा इःनुङ हे़निङ मे़रेम्डिॽ। मोडोक्रेॽ ने़ॽनि कानिङे़ॽ हे़निङ्बाङ इमाङ्सो चुप्मे आसा मे़ले़ःॽटुङ्मा। इगो खामि साक्छि निवाहाङ्नोॽ टुये। 6 कानिङ लेघुबा खिरिस्टमि एप्पा चोङ्साजि ले़ःॽपॽआसे़ॽसो हे़निङ्नुङ बेॽए लिहेसिङ्मे़। तर कानिङे़ॽ हाइखा याॽमिजि मोबा हे़निङ असाबाङ्सो आदर मे़योगुङ्मा। 7 तर पिच्छाजि नुरोॽ कुघुबानुङ खाङ्घुबा मामाडोॽ कानिङ्सो हे़निङ्मि रुम्बेॽ लिसिङ्मा। 8 चइबानोॽ कानिङे़ॽ हे़निङ सारोनोॽ नम्नम ले़ःॽपॽआसे़ॽ निवाहाङ्मि सुसमाचाररेॽ ने़ॽनि, तर कानिङ्मि हिङ्मवानोॽ पिमासो पोरोगिङ्मा। 9 वावानिसानुङ नानुसाजि, हे़निङे़ॽ नुरोॽ लेन्डानुमे, कानिङे़ॽ ले़ःॽमे़ॽ हे़निङ असासो कानिङ कुमे भार मे़न्सिॽलो लुनुङ कानिङ पाप्मिहा चोप खामि लागि कानिङ्टाङ्बा लेन्डा सेन्डा योम्बोक ले़ःॽसाङ हे़निङ सुसमाचार खेम्मेॽटुङ्मा। 10 हे़निङ बिस्वासिजिनुङ टुमाबेॽ कानिङ पबित्रा, धरमिनुङ आप्टिक मे़ॽनिङ पेनिङ्मा। इगो खामि लागि साक्छि निवाहाङ्नुङ हे़निङ्नोॽ टुन्डानिङे। 11 मोबा हे़निङे़ॽनोॽ लेन्डानुमे, पाबाडे़ॽ टाङ्बामि पसाजिनुङ ले़टिडोॽ कानिङे़ॽसो हे़निङ्नुङ बेबहार ले़टुङ्मा। 12 हे़निङ चोपनोॽ अरति पिसाङ्नुङ हाङ्हाङ पिसाङ निवाहाङ्डे़ॽ नेन्जामारोमा रामबेॽ राप्सानिङे लुनुङ आट पिसुङ्मा। इन्ढोङ्होङ खोमि राज्यनुङ महिमाबेॽ खोसे़ॽ के़ये। 13 कानिङे़ॽ निवाहाङ्मि बचन इःॽमाबेॽ हे़निङे़ॽ मो खा याॽमिबाङ्ए ने़ॽनि निवाहाङ्मिनोॽ मिॽनुङ खेप्सानुम। चइबानोॽ इगो खा निवाहाङ्बाङ्एनोॽ ले़टे़। मो सिक्छेडे़ॽ आयुसो हे़निङ बिस्वासिजिमि हिङ्मवाबेॽ योम्बोक ले़ःॽमे़ॽनिङ्सिन्डुए। मो खामि लागि कानिङे़ॽ निवाहाङ सानिङ्नोॽ ओहाक पिन्डुङ्मे। 14 के़हा वावानिसानुङ नानुसाजि, हे़निङ्सो येसु खिरिस्टबेॽ बिस्वास ले़ःॽखुबा यहुदिया ठाउँबेॽहा निवाहाङ्मि मन्डलिबेॽहा याॽमिजिडोक्नोॽ लिसानिङे, इन्ढोङ्होङ माहाजिडे़ॽ यहुदिजिबाङ दुःखनुङ खेः आङ्डिडोक्नोॽ हे़निङे़ॽसो टाङ्बामि याॽमिजिबाङ दुःखनुङ खेः आक्सानुम। 15 माहा यहुदिजिडे़ॽनोॽ परभु येसुनुङ अगमबक्ताजि सेॽनेसुजि मोबा कानिङ्सो यिगामि। अक्खाजिमि योम्बोगे़ॽ निवाहाङ हाःप्मेटुजे, मोबा चोप याॽमिजिमि टेडिघरिक याॽमि लिटामे। 16 अक्खाजिडे़ॽ कानिङ हाइखा जातिहा याॽमिजि सुसमाचार मे़ङ्खेम्मेॽटामि। इडोॽ माहाजिडे़ॽ पापसोक्पेॽ पाप येडुजि। तर ए़क्साङ निवाहाङ्मि सुरिक खोजिसोक्पेॽ ओप्युसा। थेस्लोनिकिबेॽहा याॽमिजिनुङ पावल चुप्मा मिॽपॽआ 17 वावानिसानुङ नानुसाजि, कानिङ हे़निङ्नुङ इक याक नियाक फाक्खे़ॽमा सिॽसो कानिङ्मि निवागो हे़निङ्नुङ्नोॽ टुये। कानिङ ए़क्साङ्सो हे़निङ्नुङ चुप्मामि बेॽलोनोॽ मिङ्इटिङ्मे। 18 कानिङ हे़निङ्बेॽ आप्मा मिनिङ्मा। छना का पावल चाहिँ बेॽलोखेॽ आप्मा योगिङ, तर सैतानडे़ॽ कानिङ से़गा। 19 कानिङ्मि परभु येसु लेम्मे याक खोमि पोम्बेॽ कानिङ्मि आसा, हाङ्हाङ, हे़निङ्नोॽ ले़न्डानिङे। मोबा साप्थाङ्मे गौरबमि मुकुटसो हे़निङ्नोॽ ले़न्डानिङे। 20 चइबानोॽ हे़निङ्नोॽ कानिङ्मि हाङ्हाङ्नुङ आदर ले़न्डानिङे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.