१ थेस्लोनिकि 1 - याम्फु1 निवाहाङ पाबानुङ परभु येसु खिरिस्टबेॽ बिस्वास ले़ःॽखुबा थेस्लोनिकिबेॽ टुहा मन्डलिबेॽहा चोप याॽमिजि कानिङ पावल, सिलासनुङ तिमोथि सुम्बाङ्डे़ॽ इगो पत्रा साप्मे़ॽनिङ्सिन्डुङ्मे। निवाहाङ्डे़ॽ हे़निङ चोप अनुग्रहानुङ सान्ति पिरो। थेस्लोनिकिबेॽहा बिस्वासिजिमि हिङ्मवानुङ बिस्वास 2 कानिङे़ॽ हे़निङ्मि लागि सानिङ्नोॽ निवाहाङ ओहाक पिन्डुङ्मेनुङ हे़निङ्मि लागि पारथना ले़न्डुङ्मे। 3 हे़निङ्मि बिस्वासडे़ॽ ले़ःॽपॽआ योम्बोकनुङ नम्नमडे़ॽ ले़ःॽपॽआ मेहेनेत मोबा कानिङ्मि परभु येसु खिरिस्ट फेरि लेङ्इये खाबेॽ युङ्बॽआ आसाबेॽ हे़निङ हुङ्जाहेघुबा लिबॽआ कानिङे़ॽ निवाहाङ पाबामि पोम्बेॽ सानिङ मिॽइन्डुङ्मे़। 4 वावानिसा नानुसाजि, कानिङे़ॽ इगो खा लेन्डुङ्मे़, निवाहाङ्डे़ॽनोॽ नम्नम ले़ःॽनुङ हे़निङ खोमि याॽमि लिमामि लागि से़ङ्इटे़। 5 इन्ढोङ्होङ कानिङे़ॽ हे़निङ खेम्मेॽपॽआ सुसमाचार माङ्माङ्मा खा मे़ले़टा। तर सक्तिनुङ पबित्रा होङ्निवानुङ्मा चाइबमा खा ले़टे़। कानिङ हे़निङ्नुङ टुमाबेॽ कानिङ्मि हिङ्मवा इन्डोॽ ले़टे़ लुमे खा हे़निङे़ॽ नुरोॽ लेन्डानुमे। 6 हे़निङ परभुनुङ कानिङ्मि हिङ्मवा खाङ्साङ मो रामबेॽ राप्सानिङ। मोबा दुःखनुङ खेःबेॽ सिॽमाबेॽसो पबित्रा होङ्निवाबाङ चुप्पॽआ हाङ्हाङ्नुङ बिस्वास ले़टानुम। 7 मोडोगे़ॽ हे़निङ माकेडोनिया ठाउँनुङ अखैया ठाउँबेॽ टुखुबा बिस्वासिजिमि लागि नुबा नमुना लिसानिङ। 8 इन्ढोङ्होङ हे़निङ्बाङ परभुमि बचन माकेडोनियानुङ अखैयाबेॽहा याॽमिजिबेॽरेॽनोॽ रुक्पॽआ ने़ॽनिबा, तर निवाहाङ्बेॽ हे़निङ्हा बिस्वासमि खा चोप ठाउँबेॽहा याॽमिजिडे़ॽ लेडोक्इटुजि। माहा खामि टुम्बेॽ कानिङे़ॽ इमाङ्सो इःमा मे़म्पाप्टा, 9 इन्ढोङ्होङ हे़निङ्बेॽ लेम्माबेॽ कानिङ बेॽलो नुरोॽ स्वागत ले़टानिङ, मोबा मङे़हा चापजिमि साम्माङ ले़ःॽमा लेॽनुङ चाइबमा निवाहाङ्लाम टेआप्नुङ खोमि चोङ्सा लिसानिङ। इघा चोप खामि टुम्बेॽ माहा याॽमिजिडे़ॽनोॽ लुटामे। 10 मोबा सिघे़ॽपॽआबाङ निवाहाङ्डे़ॽ हिङ्बोक्पॽआ खोमि पसा येसु थाङ्सिरिबाङ लेङ्इये लुनुङ हे़निङे़ॽ खोमि राम खाङ्इन्डानुम्रो। अथबा खोनोॽ कानिङ न्यायमि याकपेॽ निवाहाङ्मि सुरिकबाङ जोगा ले़ःॽखुबा ले़ये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.