१ पत्रुस 5 - याम्फुनिवाहाङ्मि बगाल 1 हागो के़ॽ हे़निङ्मि मन्डलिबेॽहा एल्रडजि लुनिम्ने़, कासो इक्को एल्डरनोॽ ले़ःॽपॽआसे़ॽ, मोबा खिरिस्टडे़ॽ आङ्बॽआ दुःख के़ॽनोॽ खाङ्इटुङे, ए़क्साङ खाङ्मुये महिमामिसो साझेदार लिबॽआ नाताडे़ॽ हे़निङ इडोॽ लुनिम्ने़। 2 निवाहाङ्डे़ॽ हे़निङ्मि जिम्माबेॽ युङ्बॽआ खोमि बगालमि नुरोॽ हेरचाह ले़टानुमे। करडे़ॽ ने़ॽनि तर साप्थाङ्मानुङ, याङ्सरावा चुप्मिये लुनुङ ने़ॽनि तर निवाहाङ्डे़ॽ नेन्जाबॽआ इगोनोॽ ले़ये मिॽनुङ हे़निङ्मि चोप निवाडे़ॽ ले़टानुमे। 3 हे़निङ्मि जिम्माबेॽ टुघुबाजिसोक्पेॽ अधिन ले़ःॽनुङ ने़ॽनि, तर खोजिमि पोम्बेॽ नुबा नमुना लिनुङ हिक्सानिङे। 4 मोबा इन्डोक्पेॽ मुल गोठ्ला लेङ्इये, मोडोक्पेॽ हे़निङे़ॽ जोतिनुङ्मा महिमामि मुकुट चुप्मिन्डानुमे। 5 मोडोक्नोॽ वेन्जाजि, मन्डलिबेॽहा एल्डरजिमि खा खेप्सानुमेनुङ खोजिमि अधिनबेॽ पेनानिङे। हे़निङ इक्कोसे़ॽ हाइकोमि अधिनबेॽ ए़डे़म्मा लिनुङ पेनानिङे। इन्ढोङ्होङ धारमिक नेॽचिराडे़ॽ इडोॽ लुये, “निवाहाङ्डे़ॽ काङायोङ्बाजिमि बिरोध ले़न्डुजे, तर ए़डे़म्मा लिघुबाजि अनुग्रहा ले़न्डुजे।” 6 मोडोगे़ॽ निवाहाङ्मि सक्तिसालि हुकपेॽ हे़निङ ए़डे़म्मा लिसानिङे, खोसे़ॽ ठिक बेलाबेॽ हे़निङ एप्पा टोङ्इये। 7 हे़निङ्मि चोप सुरता निवाहाङ्बेॽ युक्सानुमे, इन्ढोङ्होङ खोसे़ॽनोॽ हे़निङ खाङ्इये। 8 होसियार ले़ःॽनुङ चङ्खो पेनानिङे, हे़निङ्मि सतुर दियाबलसडे़ॽ असा चुप्नुङ चाबेमे लुनुङ किबाडोॽ वोसाङ किॽयु मिॽयु योक्मे़ॽसिन्डुए। 9 बिस्वासबेॽ बोलियो लिनुङ सैतान बिरोध ले़टानुमे। इन्ढोङ्होङ इगो मक्खाम्डेमबेॽ हे़निङ्बाङ हाइखा चोप बिस्वासि वावानिसानुङ नानुसाजिडे़ॽसो इडोक्नोॽ खेः आङ्मे़ॽनिङ्सिन्डुजे लुमे खा हे़निङे़ॽ लेन्डानुमे। 10 चोप अनुग्रहानुङ्मा निवाहाङ्डे़ॽ खिरिस्टबेॽ टाङ्बामि इन्डोक्पेॽसो सिघे़ॽनिये महिमामि लागि हे़निङ के़ए़टे़। हे़निङे़ॽ इक्याक नियाक खेः आङ्नुङ ए़क्साङ खोसे़ॽनोॽ हे़निङ फेरि चोङ टोङ्इये, मोबा पक्कानुङ सक्तिसालि टोङ्इये। 11 चोप सक्ति सानिङ खोमिन्नोॽ लिरो। आमेन 12 बिस्वासनुङ्मा के़ए़ निसा सिलास इगो ए़डे़म्मा पत्रा साप्मेटुङे। के़ॽ इगो पत्रा चाहिँ निवाहाङ्मि चाइबमा अनुग्रहामि साक्छि पिमामिनुङ साहस पिमामि साप्मिटुङे। हे़निङ इगो अनुग्रहाबेॽ बोलियो लिनुङ पेनानिङे। 13 निवाहाङ्डे़ॽ हे़निङ्डोक्नोॽ से़म्बॽआ बेबिलोनबेॽए मेन्डलिबेॽहाजिडे़ॽ हे़निङ सेवायो लुटामे। काङ्मिन्नोॽ पसाडोॽमा मरकुसडे़ॽसो हे़निङ सेवायो लुटे़। 14 इक्कोसे़ॽ हाइको नम्नमनुङ्मा सेवा मुसानिङे, खिरिस्टबेॽ बिस्वास ले़ःॽखुबाजि हे़निङ चोपबेॽ सान्ति लिरो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.