१ पत्रुस 4 - याम्फुनिवाहाङ्मि लागि हिङ्मा 1 खिरिस्टडे़ॽ हिङाबेॽ दुःख आक्सु, मोडोगे़ॽ हे़निङे़ॽसो खोसे़ॽ मिॽपॽआडोक्नोॽ मिडानुमे। इन्ढोङ्होङ असे़ॽ हिङाबेॽ दुःख आङ्इन्डुए, मो याॽमि पापबाङ ओः पेङ्इये। 2 हागोएम्बाङ हे़निङ हिङ्रो याॽमिडे़ॽ मिॽटिडोॽ ने़ॽनि, तर निवाहाङ्डे़ॽ मिॽपॽआडोॽ हे़निङ्मि हिङ्मवाबेॽ ले़टानिङे। 3 याक्लोए हे़निङ्मि चाल चलन अबिस्वासि याॽमिजिमिडोॽ चोप खालहा मङे़हा योम्बोक ले़टानुम, बेभिचार, हिङाडे़ॽ मिॽपॽआ मङे़हा खाबेॽ राप्सानिङ, इनुङ टोप्टे़ॽवा उक्सानिङ, मोजमज्जा ले़टानिङ, इनुङ टोप्टे़ॽवामिनोॽ भत्तेर ले़टानिङनुङ चिॽचि मिॽमारोहा मुरति पुजा ले़टानुम। 4 इडोॽ हे़निङ खोजिनुङ मङे़हा योम्बोकपेॽ मे़राम्बॽआ खाङ्नुङ खोजि खरि मिङ्इम्मे, मोबा हे़निङ्मि बेजेत ले़म्मे। 5 तर हिङ्रिकनुङ सिबॽआजिमि न्याय ले़ःॽखुबा निवाहाङ्मि पोम्बेॽ इगो खामि टुम्बेॽ माहाजिडे़ॽ लेखा पिमा खे़ये। 6 मोडोगे़ॽ सिबॽआजिसो सुसमाचार खेम्मेॽटुजि। इन्ढोङ्होङ माहाजिडे़ॽसो हिङ्रिक याॽमिजिडे़ॽ न्याय चुप्टिडोक्नोॽ न्याय चुप्टुजिहोङ्सो होङ्निवाबेॽ खोजि निवाहाङ्डोक्नोॽ हिङ्मिरो लुनुङ माहाजि सुसमाचार खेम्मेॽपॽआ ले़ये। 7 चोप खा नासि लिमे याक के़क्पेॽनोॽ लेम्बेटे़। मोडोगे़ॽ हे़निङ टाङ्बा अधिनबेॽ युङ्नुङ होसियार पेम्मा खे़ये। इडोॽ हे़निङे़ॽ पारथना ले़ःॽहेन्डानुमे। 8 चोप्पाङ बेॽलो चाहिँ इक्कोसे़ॽ हाइको सानिङ्नोॽ नम्नम ले़चामे। इन्ढोङ्होङ नम्नमडे़ॽनोॽ बेॽलो पाप टे़क्हेन्डुहा। 9 मोबा हे़निङ साप्थाङ्मानुङ इक्कोसे़ॽ हाइको टाङ्बामि खिमबेॽ स्वागत ले़ःॽखुसे़ॽचुसानिङे। 10 निवाहाङ्मि अनुग्रहाबाङ चोपजिडे़ॽ खाल खालहा बरदान चुप्पॽआ ले़ये। टाङ्बे़ॽ चुप्पॽआ माहा बरदान हाइखाजिमि भलाइमि योम्बोकपेॽ टिसानुमे। 11 यामुमे बरदान चुप्खुबे़ॽ निवाहाङ्मि बचन यामुसुजिरो, सेवा ले़ःॽखुबे़ॽ निवाहाङ्मि सक्तिबाङ सेवा ले़टुरो। मोडोक्नोॽ येसु खिरिस्टबेॽ चोप खाबाङ निवाहाङ्मिन्नोॽ महिमा लिरो। सानिङ खोमिन्नोॽ चोप्पाङबेॽए आदरनुङ माहिमा लिरो। आमेन। दुःखबेॽसो हाङ्हाङ लिमा 12 के़ॽ नम्नम ले़ःॽपॽआ निसाजि, दुःखनुङ खेःबाङ हे़निङ्मि जाँच लिमे़ॽनिङ्सिये, तर इन्ढोङ्डे इडोॽ लिसे़ लुनुङ हे़निङ खरि ए़मिनानिङे। 13 तर खिरिस्टडे़ॽ आङ्बॽआ दुःखबेॽ खोनुङ सोरि आक्सुङ्मा लुनुङ हाङ्हाङ मिनानिङे, मोबा ए़क्साङ खो बेॽए महिमानुङ खाङ्मुमाबेॽ साप्थाङ्हेन्डानिङे। 14 खिरिस्टबेॽ बिस्वास ले़ःॽमाबेॽ बेजेत लिहोङ टाङ्बा ओहाकमा मिडानुमे, इन्ढोङ्होङ निवाहाङ्मि महिमानुङ्मा होङ्निवा हे़निङ्बेॽ टुये। 15 तर हे़निङ असे़ॽसो याॽमि सेॽखुबा, खुघुबा, मङे़हा योम्बोक ले़ःॽखुबा, हाइखाजिमि योम्बोकपेॽ बाधा ले़ःॽखुबा याॽमिडे़ॽ आङ्बॽआडोॽ दुःख ए़आक्सानुमे। 16 तर खिरिस्टियान लिबॽआसे़ॽ दुःख आङ्मासिॽहोङ ए़ङेसिडानिङे। तर खिरिस्टमि लिडोक्पॽआसे़ॽ निवाहाङ ओहाक पिसानुमे। 17 इन्ढोङ्होङ न्याय निवाहाङ्मि याॽमिजिबाङ्नोॽ तरिक्मा बेला युघे़टे़। निवाहाङ लेघुबा कानिङ्मिनोक्सो न्याय लियेहोङ, निवाहाङ्मि सुसमाचार मे़ङ्खेम्खुबाजिमि छना इन्डोक्मा न्याय लिइ होला ? 18 धारमिक नेॽचिराडे़ॽ लुये, “धरमि याॽमिजिमिनोॽ उद्धार ले़ःॽमा छॽइये, मोबा अधरमि पापि याॽमिजिमि हालत इन्डोक्मा लिइ होला ?” 19 मोडोगे़ॽ निवाहाङ्मि याॽमिजि लिमाबेॽ दुःख आङ्घुबाजिडे़ॽ सानिङ्नोॽ नुबा योम्बोक ले़ःॽमा खे़ये, मोबा सिरिस्टिदाङ्बा निवाहाङ्बेॽ चोप भरोसा ले़ःॽमा खे़ये। खोसे़ॽ हे़म्बॽआ हेन्ज्रुङ सानिङ पुरा ले़न्डुए। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.