१ पत्रुस 3 - याम्फुबनिबानुङ बनिमाजि 1 बनिमाजि, हे़निङ्मि बनिबाजिमि अधिनबेॽ पेम्मा खे़ये। मोडोॽ ले़ःॽमाहोङ निवाहाङ्बेॽ बिस्वास मे़ले़ःॽखुबा बनिबाडे़ॽ हे़निङ्मि चाल चलन खाङ्नुङ्सो बिस्वास ले़न्डुए। हे़निङे़ॽ लुमा पाप्निबा खोजिटाङ्बे़ॽ खोजिमि निवा फेङ्इन्डुजे। 2 इन्ढोङ्होङ हे़निङ्मि चोखोनुङ आदरनुङ्मा चाल चलन खोजिडे़ॽ खाङ्इन्डुजे। 3 हे़निङे़ॽ टाङ चाक्नुङ, गहन वे़ःॽमानुङ, बेॽलो याङ सिॽइहा चेॽ चाङ्मानुङ हे़निङ्मि हिङा याॽमिजिमि पोम्बेॽ ए़ॽचगानुमे, 4 तर हे़निङ्मि निवाहोङ्सिॽयु चाहिँ नुबा नुबा खाडे़ॽ चागानुमे। हे़निङ्मि निवा सानिङ टुडुङ्घे़ये भलोनुङ सान्तिडे़ॽ चागानुमे, इगो चाहिँ निवाहाङ्मि लागि बेॽलो मोलनुङ्मा ले़ये। 5 इन्ढोङ्होङ निवाहाङ्बेॽ आसा युङ्खुबा याक्लोहा मेॽनामिॽचि इडोॽ निवाहोङ्सिॽयु चागामेनुङ, टाङ्बामि बनिबामि अधिनबेॽ पेनामे। 6 साराडे़ॽ अब्राहाम टाङ्बामि खिमदाङ्बा लुनुङ खोमि आग्या पालना ले़ट्रए। हे़निङे़ॽसो इमाङ खाबेॽसो मे़ङ्किस्सिरेॽ नुबा योम्बोक ले़टानुमहोङ हे़निङ्सो खोमिन्नोॽ पसाजि लिन्डानिङे। 7 बनिबाजि, हे़निङे़ॽसो टाङ्बामि बनिमाजि हे़निङबाङ कमजोर ले़म्मे लुमे खा निवाबेॽ नुरोॽ युक्सानुमे। हे़निङे़ॽसो खोजि आदर ले़ःॽमा खे़म्मे, इन्ढोङ्होङ खोजिडे़ॽसो हे़निङ्नुङ सोरि हिङ्मवामि अनुग्रहा चुप्मिटुजे। इडोॽ हे़निङ्मि पारथनाबेॽ इमा बाधा मे़लेङ्रो लुनुङ बनिबानुङ बनिमा निप्पाङ नुरोॽ टोङ्जामा खे़ये। नुबा योम्बोक ले़ःॽमाबेॽसो आङ्बॽआ दुःख 8 हागो आखिरिबेॽ हे़निङ लुनिम्ने़, हे़निङ चोप इक्को निवा लिनुङ पेनानिङे, इक्कोसे़ॽ हाइकोमि दुःखबेॽ निवा युङ्घुसे़ॽ चुसानिङे। चोपनोॽ टाङ्बामि वावा निसाजिडोॽ नम्नम ले़चासानिङे, मोबा इक्कोसे़ॽ हाइकोमि लागि नम्नावानुङ ए़डे़म्मा लिसानिङे। 9 हे़निङ मङे़ॽमा ले़ःॽखुबा हाइखा याॽमिजि हे़निङे़ॽसो मङे़ॽमा ए़ले़टानुमे, खोजिडे़ॽ चापहिमिहोङ्सो हे़निङे़ॽ चाहिँ खोजि मोडोक्नोॽ ए़ले़टानुमे। बोरु मोमि साटो आसिस पिसानुमे, इन्ढोङ्होङ निवाहाङ्डे़ॽ हे़निङ आसिस पिमामि लागिनोॽ के़ॽपॽआ ले़ये। 10 धारमिक नेॽचिराबेॽ इडोॽ साप्पॽआ ले़ये, “असे़ॽ हिङ्मवा सुखि युङ्मा मिॽइन्डुए, मोबा सुखमि याक खाङ्मा मिॽइन्डुए, मोसे़ॽ खोमि लेम मङे़हा खा इःमाबाङ्नुङ, मोबा खोमि याबुक रेम्डेॽमे खाबाङ ओः युङ्मा खे़ये।” 11 खो मङे़हा योम्बोक लेॽनुङ नुबा योम्बोकलाम टेमा खे़ये। खोसे़ॽ सान्तिनुङ्मा रामबेॽ राम्मा खे़ये। 12 इन्ढोङ्होङ निवाहाङ्डे़ॽको खोमि पोम्बेॽ धरमि हिङ्मवा हिङ्घुबाजि खाङ्इन्डुजे, मोबा माहाजिमि पारथना सानिङ खेम्इन्डुए, तर परमपरभु निवाहाङ्मि पोम्बेॽ मङे़हा योम्बोक ले़ःॽखुबाजि खोसे़ॽ बिरोध ले़न्डुजे। 13 मोबा हे़निङ भलाइमि योम्बोक ले़ःॽमामि पोरोइन्डानिङेहोङ, हे़निङ असे़ॽ नोक्सानि ले़ये ? 14 तर नुबा योम्बोक ले़ःॽमाबेॽसो दुःख आङ्मासिॽहोङ, हे़निङ आसिसित ले़न्डानिङे। हे़निङ असानुङ्सो ए़क्किसिडानिङे, मोबा सुरता ए़ले़टानिङे। 15 तर टाङ्बामि निवाबाङ खिरिस्टमि आदर ले़टानुमे, खोनोॽ टाङ्बामि हिङ्मवामि मायोङ्बा मिडानुमे। हे़निङ्बेॽ टुये आसामि टुम्बेॽ हाइखाजिडे़ॽ सिम्मिहोङ मो याॽमि नुरोॽ इःबेॽमे। 16 तर इगो खा इःमाबेॽ ए़डे़म्मा लिनुङ आदरनुङ यामुसानिङे। हे़निङ्मि नुबानुङ मङे़ॽमा लेमे निवा चोखो युक्सानुमे। मोडोॽ ले़ःॽमाबेॽ हे़निङे़ॽ खिरिस्टियानजिडे़ॽ ले़ःॽपॽआ चाल चलन खाङ्नुङ हे़निङ्मि बदनाम ले़ःॽखुबाजि ङेम्माबेॽ सिॽइम्मे। 17 मङे़हा योम्बोक ले़ःॽनुङ दुःख आङ्मा नुबा खा ने़ॽनिबा, तर निवाहाङ्डे़ॽ मिॽपॽआडोॽहा नुबा योम्बोक ले़ःॽनुङ दुःख आङ्मा चाहिँ बेॽलो नुबा खा ले़ये। 18 इन्ढोङ्होङ कानिङ निवाहाङ्बेॽ लाजे़ॽमामि खिरिस्ट धरमि ले़टारोसो कानिङ्मि पापमि भारा फोङ्मामि सानिङ्मि लागि इक्खेॽपेॽ सिसा। खो हिङाबेॽ सिसा, तर होङ्निवामि सक्तिबाङ हिङ्बोगा। 19 खोसे़ॽ मो होङ्निवामि सक्तिडे़ॽ माहा से़क्सिघे़ॽपॽआ होङ्निवाजिबेॽ खे़ॽनुङ परचार ले़टु। 20 माहा होङ्निवाजि चाहिँ नोआडे़ॽ योङा जहाज टोङ्बॽआ बेलाबेॽ पापबाङ टेआप्मिम्मेन्डे लुनुङ निवाहाङ्डे़ॽ हुङ्बॽआ होङ्निवाजि ले़टामे। तर माहाजिडे़ॽ निवाहाङ्मि खा मे़ङ्खेप्सुजि। योङा जहाजबेॽ आक्चि जना याॽमिरेॽनोॽ बेॽए वाडुमबाङ हिक्सामि। 21 इगो योङानोॽ आइ याॽमिजिडे़ॽ लामे बप्तिस्मामि चिङ्गा ले़ये, मोसे़ॽ हे़निङ हिङ्माराप्मिये। इगो हिङामि मिक्नुवा वासोक्पॽआडोॽमा ने़ॽनिबा, तर इगो चोखो निवाडे़ॽ निवाहाङ्नुङ ले़ःॽपॽआ बेॽए हेन्ज्रुङ ले़ये। येसु खिरिस्ट सिबॽआबाङ हिङ्बोक्पॽआसे़ॽ बप्तिस्माडे़ॽ हे़निङ हिङ्मेन्डानिङे। 22 खो हिङ्बोक्नुङ ए़क्साङ थाङ्सिरिॽटु खे़ॽनुङ निवाहाङ्मि चुप्थिङ्लाम पेङ्इटे़, मोबा चोप थाङ्सिरि दुतजिनुङ थाङ्सिरिबेॽहा अधिकारनुङ सक्ति खोमि अधिनबेॽ टुहा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.