१ पत्रुस 2 - याम्फुहिङ्रिक रुङ्गोॽवानुङ पबित्रा जाति 1 मोडोगे़ॽ चोप खालहा दुस्ट खाबाङ, चोप रेम्सिङ, कप्टि, चेजेवानुङ याॽमि सिःक्चामे खाबाङ ओः पेनानिङे। 2 हागोनोॽ टोक्पॽआ ओङे़कडे़ॽ डुडु उङ्मा मिॽटिडोॽ, हे़निङ चाहिँ निवाहाङ्मि चाइबमा बचनमि सगे़ॽ सिसानिङे मोसे़ॽ हे़निङ मुक्तिबेॽ पक्का लिन्डानिङे। 3 इन्ढोङ्होङ परभु किरपा ले़ःॽखुबा ले़ये लुमे खा हे़निङे़ॽ लेबेटानुमे। 4 खोबेॽ खडानिङे, खो हिङ्रिक रुङ्गोॽवा ले़ये। याॽमिजिडे़ॽ खो फे़न्निबा लुनुङ राप्पेसुजि, तर निवाहाङ्डे़ॽ खोनोॽ से़नु, खो बेॽलोनोॽ मोलनुङ्मा ले़ये। 5 हे़निङ्सो हिङ्रिक रुङ्गोॽवाडोॽ लिनुङ खडानिङे मोबा निवाहाङ्मि मन्दिर लिमामि लागि टाङ्बा चेॽटिबेसानुमे। मोबेॽ हे़निङे़ॽ येसु खिरिस्टमि राम्बाङ निवाहाङ्डे़ॽ नेन्जामारोमा आत्मिक बलि चेॽटिखुबा पबित्रा याडाङ्बामि योम्बोक ले़न्डानुमे। 6 इन्ढोङ्होङ धारमिक नेॽचिराबेॽ इडोॽ साप्पॽआ ले़ये, “खाक्सानुमे, के़ॽ इक्को महान सुर रुङ्गोॽवा से़न्नुङ सियोनबेॽ युङ्इटुङे। खोबेॽ बिस्वास ले़ःॽखुबाजि इन्डोक्पेॽसो ङेम्मा सिॽमिनिबा।” 7 मोडोगे़ॽ हे़निङ बिस्वास ले़ःॽखुबा चोपमि लागि इगो रुङ्गोॽवा महान ले़ये। तर बिस्वास मे़ले़ःॽखुबाजिमि लागि चाहिँ इडोॽ ले़ये, “खिम आङ्घुबाजिडे़ॽ फे़न्निबा लुनुङ राप्पेबॽआ रुङ्गोॽवा चाहिँ कुनामि सुर टिढाम रुङ्गोॽवा लिसा।” 8 धारमिक नेॽचिराडे़ॽ इडोॽ लुन्डुए, “इगोनोॽ याॽमिजिमि सराङ्बेॽ रोःइये रुङ्गोॽवा ले़ये।” इगो रुङ्गोॽवाडे़ॽ ले़ःॽमे़ॽ बेॽलो याॽमिजि काङ्इम्मे। माहाजिडे़ॽ निवाहाङ्मि बचनबेॽ बिस्वास मे़ले़ःॽपॽआसे़ॽ मोबेॽ रोःक्नुङ काङ्इम्मे। माहाजिमि लागि इडोक्नोॽ लिमा खे़ये लुनुङ पक्का लिबॽआ ले़टे़। 9 तर हे़निङ्गो निवाहाङ्डे़ॽ से़म्बॽआ बङ्सजि, हाङ्बामि बङ्समि याडाङ्बाजि, पबित्रा जाति, निवाहाङ्मिन्नोॽ जनता ले़न्डानिङे, खोसे़ॽ हे़निङ खोमि खरिहा योम्बोक परचार ले़ःॽमामि से़ङ्इटे़। 10 याक्लो इक्खेॽ हे़निङ निवाहाङ्मि जनता मे़ले़टानिङ, तर हागो निवाहाङ्मि जनता लिटानिङे। इक्खेॽ हे़निङे़ॽ निवाहाङ्मि किरपा मे़न्चुप्टानुम, तर हागो हे़निङे़ॽ खोमि किरपा चुप्मिटानुमे। निवाहाङ्मि सेवाक 11 के़हा लङ्गामजि, इगो मक्खाम्डेमबेॽ हे़निङ नियाकमि चाबाङ्जिडोॽ ले़न्डानिङे, बिन्ति ले़निम्ने़, होङ्निवामि बिरोधबेॽ राम्खुबा हिङामि मङे़हा योम्बोकबाङ ओःनोॽ पेनानिङे। 12 अयहुदिजिमि रुम्बेॽ हे़निङ्मि चाल चलन नुबा लिरो। याॽमिजिडे़ॽ हे़निङ मङे़हाजि लुमिहोङ्सो हे़निङ्मि नुबा योम्बोक खाङ्डोगुजिरो, न्यायमि याकपेॽ माहाजिडे़ॽ निवाहाङ्मि ओहाङ ले़टुजिरो। 13 परभु आदर ले़ःॽमामि लागि चोप सासकजिमि अधिनबेॽ पेनानिङे, मो बेॽए अधिकारनुङ्मा हाङ्बाहोङ्सो, 14 अथबा एप्पाजि ले़ःॽमिहोङ्सो, मङे़हा योम्बोक ले़ःॽखुबाजि दन्डा पिसिॽनुङ नुबा योम्बोक ले़ःॽखुबाजि आदर पिसिॽ निवाहाङ्डे़ॽनोॽ माहाजि युङ्इटुजे। 15 इन्ढोङ्होङ हे़निङे़ॽ ले़ःॽपॽआ नुबा योम्बोकडे़ॽ उम्बरिङ याॽमिजिमि याबुक योङ उक्मेॽपॽआ निवाहाङ्डे़ॽ नेन्जोन्डुए। 16 पापबाङ फुक्क लिबॽआ याॽमिडोॽ पेनानिङे, तर फुक्क लिबेटिङ्मा लुनुङ मङे़हा योम्बोक ए़ले़टानुमे बोरु निवाहाङ्मि सेवाक लिनुङ पेनानिङे। 17 चोप याॽमिजि आदर ले़टानुमे, बिस्वास ले़ःॽखुबा वावानिसानुङ नानुसाजि नम्नम ले़टानुमे। निवाहाङ्नुङ किस्सिसानिङे, हाङ्बा आदर ले़टानुमे। दुःख आङ्मे खाबेॽ येसु नमुना ले़ये 18 सेउतेजि, चोप खाबेॽ आदरनुङ टाङ्बामि मायोङ्बाजिमि अधिनबेॽ पेनानिङे। हे़निङ नम्नावानुङ भलो ले़ःॽखुबाजिमिरेॽ आदर ए़ले़टानुमे, तर नम्नम मे़ॽनिङ्मा मायोङ्बाजिमिसो अधिनबेॽ पेनानिङे। 19 निवाहाङ मिॽसाङ असे़ॽहोङ्सो अन्यायनुङ्मा खेः आक्सुहोङ निवाहाङ्डे़ॽ खो आसिस पिये। 20 मङे़ॽमा योम्बोक ले़ःॽनुङ दन्डा चुप्मागो खे़ये, तर नुबा योम्बोक ले़ःॽनुङ्सो दुःख आङ्इन्डानुमहोङ निवाहाङ्डे़ॽ आसिस पिये। 21 इन्ढोङ्होङ इगोमि लागिनोॽ हे़निङ निवाहाङ्डे़ॽ से़ङ्इटे़। खिरिस्टडे़ॽसो हे़निङ्मि लागि बेॽलो खेः आक्सु, मोबा हे़निङ्मि लागि खोसे़ॽ आङ्बॽआ खेःनोॽ नमुनामि लागि ले़ये, मोबा हे़निङे़ॽसो खोसे़ॽ राम्बॽआ रामबेॽ राम्मा खे़ये। 22 येसुडे़ॽ इक्कोसो पाप मे़ले़टु, मोबा खोसे़ॽ इक्को खासो मे़रेम्देडु। 23 माहा याॽमिजिडे़ॽ येसु अपमान ले़ःॽमाबेॽ, मोमि साटो खोसे़ॽ इमाङ्सो मे़लुसुजि। दुःख आङ्माबेॽसो खोसे़ॽ असासो इमा मे़लुसुजि, तर ठिक न्याय ले़ःॽखुबा निवाहाङ्सोक्पेॽ भरोसा ले़टु। 24 खिरिस्टडे़ॽ कानिङ्मि पाप खोमि हिङाबेॽ खिमानुङ काप्सिङ्बेॽ सिसा। मोडोक्नोॽ कानिङ्सो पापमि लागि सिसिङ्मा। मोबा निवाहाङ्मि नेन्जामारोमा योम्बोकमि लागि हिक्सिङ्मा। माहा येसुमि चोटबाङ्नोॽ हे़निङ नुबोइटानिङे। 25 इन्ढोङ्होङ हे़निङ याक्लो सामुजिडोॽ छरपस्ट लिनुङ टुप्खे़ॽपॽआ ले़टानिङे, तर हागो हे़निङ्मि होङ्निवामि गोठ्ला, मोबा हे़निङ रच्छे ले़ःॽखुबाबेॽ टेजाटानिङे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.