१ पत्रुस 1 - याम्फु1 का एप्पा चोङ्सा पत्रुसबाङ पोन्टास, गलातिया, कापाडोकिया, एसियानुङ बिथिनिया ठाउँ इॽठुप परदेसि लिनुङ खोरो खोरो पेम्बॽआ निवाहाङ्डे़ॽ से़म्बॽआ याॽमिजि इगो पत्रा साप्मे़ॽनिङ्सिनुङे। 2 याक्लोएम्बाङ्नोॽ निवाहाङ पाबाडे़ॽ हे़निङ खोमि याॽमिजि लिमामि से़ना, खोमि होङ्निवाडे़ॽ हे़निङ पबित्रा टोक्सा। मोडोगे़ॽ हे़निङे़ॽ येसु खिरिस्टमि खा खेम्इन्डानुमेनुङ खोमि हरिडे़ॽ हे़निङ चोखो लिटानिङे। निवाहाङ्डे़ॽ हे़निङ बेॽलो बेॽलो अनुग्रहानुङ सान्ति पिरो। हिङ्रिक आसा 3 कानिङ्मि परभु येसु खिरिस्टमि पाबा निवाहाङ्मि ओहाङ लिरो। येसु खिरिस्ट सिबॽआबाङ हिङ्बोक्खुबा निवाहाङ्मि महान नम्नावाडे़ॽ कानिङ चोङ हिङ्मवा पिसा, मोडोगे़ॽ सिघे़ॽनिये आसा कानिङे़ॽ चुप्मिटुङ्मे़। 4 निवाहाङ पाबाडे़ॽ इन्डोक्पेॽसो नासि लिनिबा, मे़खे़ॽनिबा, चोखो अङ्स हे़निङ्मि लागि थाङ्सिरिबेॽ युङ्बेटे़। 5 हे़निङ्मि बिस्वासडे़ॽ ले़ःॽमे़ॽ निवाहाङ्मि सक्तिडे़ॽ हे़निङ मुक्तिमि लागि जोगाबा ले़ए़टे़। मो मुक्ति हे़निङ्मि लागि पोरोक्युबॽआ ले़येनुङ मो ए़क्साङ्ए बेलाबेॽ खाङ्मुये। 6 इगो खामि लागि हे़निङ साप्थाक्सानिङे, तर हागो इॽछोॽमि लागि हे़निङे़ॽ खाल खालहा दुःखनुङ खेः आङ्मा खे़ये। 7 नास लिनुङ खे़ये सुनानोक्सो मिडे़ॽ हिॽनुङ निखुर टोङ्मामि जाँच ले़ःॽमा खे़येहोङ हे़निङ्मि बिस्वासगो मो सुनाबाङ्सो इन्डोक बेॽलो मोलनुङ्मा ले़ये। मोडोगे़ॽ हे़निङ्मि इगो बिस्वास पक्का ले़येन्डे ले़ःॽनिबा लुनुङ खाल खालहा दुःखनुङ खेःबाङ जाँच लिये। इडोॽ ले़ःॽमाबेॽ हे़निङ्मि बिस्वास पक्का लियेनुङ येसु खिरिस्ट लेम्मा यिडे़ॽ हे़निङे़ॽ ओहाङ, महिमानुङ आदर चुप्मिन्डानुमे। 8 हे़निङे़ॽ खो मे़ङ्खाङ्डोक्नुङ्सो नम्नम ले़न्डानुम, खो आइरो मे़खाङ्डोक्टिॽरोसो खोबेॽ बिस्वास ले़न्डानुमेनुङ लुनोॽ लुहेनिबा बेॽएम्मा महिमा, हाङ्हाङ्डे़ॽ हे़निङ साप्थाङ्इन्डानिङ। 9 इन्ढोङ्होङ हे़निङे़ॽ येसुबेॽ बिस्वास ले़ःॽपॽआसे़ॽ हे़निङ टाङ्बामि होङ्निवाडे़ॽ मुक्ति चुप्मिन्डुए। 10 इगो मुक्तिमि टुम्बेॽ अगमबानि इःघुबा अगमबक्ताजिडे़ॽ इगो मुक्ति योगुजिनुङ नुरोॽ छानबिन ले़टुजि। मोबा निवाहाङ्डे़ॽ हे़निङ पिमे अनुग्रहामि टुम्बेॽ याक्लोनोॽ लुबॽआ ले़टे़। 11 अगमबक्ताजिडे़ॽ इगो खा इन्डोॽनुङ इन्डोक्पेॽ लिये लुनुङ लेमा योगुजि। माहाजिबेॽ टुघुबा खिरिस्टमि होङ्निवाडे़ॽ खोजि खिरिस्टडे़ॽ दुःख आङ्इन्डुए मोबा ए़क्साङ खोसे़ॽ महान आदर चुप्मिन्डुए लुनुङ माहाजि याक्लोनोॽ लुबॽआ ले़टे़। 12 निवाहाङ्डे़ॽ माहा अगमबक्ताजि खोजिमि लागि खाङ्मुबॽआ ने़ॽनि, तर हे़निङ्मि लागि ले़टे़। इगो खा थाङ्सिरिबाङ पाङ्बॽआ पबित्रा होङ्निवाबाङ हे़निङ खेम्मेॽपॽआ सुसमाचार इःघुबाजिबाङ आयु हे़निङ लुटे़। थाङ्सिरि दुतजिडे़ॽसो इघा खा बेॽलो खाङ्मा मिॽटुजे। पबित्रा लिनुङ हिङ्मामि लागि से़म्बॽआ 13 मोडोगे़ॽ योम्बोक ले़ःॽमामि हे़निङ्मि निवा पोरोगानुमे। होसियार ले़टानिङे मोबा परभु येसु लेम्माबेॽ चुप्मिये आसिसबेॽ पुरा भरोसा ले़टानुमे। 14 लुबॽआ खा नुरोॽ ले़ःॽखुबा पिच्छाडोॽ लिबॽआसे़ॽ बिस्वास ले़ःॽमा याक्लो ले़ःॽपॽआ मङे़हा खाबेॽ हे़निङ हागो ए़राप्सानिङे। 15 हे़निङ के़ःॽखुबा निवाहाङ पबित्रा ले़टिडोक्नोॽ हे़निङ्सो चोप योम्बोकपेॽनुङ खाबेॽ पबित्रा लिसानिङे। 16 इन्ढोङ्होङ धारमिक नेॽचिराबेॽ इडोॽ साप्पॽआ ले़ये, “हे़निङ पबित्रा लिसानिङे, इन्ढोङ्होङ का पबित्रा ले़ङे।” 17 याॽमिजिडे़ॽ ले़ःॽपॽआ योम्बोकडोॽ पक्छेपात मे़ले़ःॽलेॽ न्याय ले़ःॽखुबा निवाहाङ हे़निङे़ॽ पाबा लुन्डानुमे। मोडोगे़ॽ हे़निङ मक्खाम्डेमबेॽ टुरो खोमि आदर ले़ःॽमानुङ हिक्सानिङे। 18 हे़निङे़ॽ नुरोॽ लेन्डानुमे, टाङ्बामि टुबालाबाजिमि पालोबाङ ले़ःॽचेॽपॽआ माङ्माङ्हा चालचलनबाङ छुट्कारा ले़ःॽमाबेॽ नासि लिघे़हा सुनानुङ सिसे़ङ्डे़ॽ छुटकारा ले़ःॽपॽआ ने़ॽनि। 19 हे़निङ खिरिस्टमि इन्नोॽइन्हेनिबा हरिडे़ॽ छुट्कारा पिटे़। खो चोखो, इक्कोसो आप्टिक मे़ॽनिङ्मा थुमा ले़टा। 20 खो मक्खाम्डेममि सिरिस्टि लिमा याक्लोनोॽ निवाहाङ्डे़ॽ से़म्बॽआ ले़टे़, तर हे़निङ्मि लागि इघा ए़क्साङ्हा याकपेॽ खाङ्मुसा। 21 खोबाङ हे़निङे़ॽ निवाहाङ्बेॽ बिस्वास ले़टानुम। निवाहाङ्डे़ॽ खिरिस्ट सिबॽआबाङ हिङ्बोक्नुङ महिमानुङ्मा टोक्सु, मोडोगे़ॽ हे़निङ्मि बिस्वासनुङ आसा निवाहाङ्बेॽ युङ्इन्डानुमे। 22 हागो हे़निङे़ॽ चाइबमा खा पालना ले़ःॽनुङ टाङ्बामि निवा चोखो टोङ्इटानुमे, मोबा हे़निङ्मि बिस्वासि वावानिसानुङ नानुसाजि चइबानोॽ नम्नम ले़ःॽखुबा लिटानिङे। हे़निङ टाङ्बा इक्कोसे़ॽ हाइको निवाबाङ्नोॽ नम्नम ले़ःॽमे़। 23 निवाहाङ्मि हिङ्रिकनुङ सानिङ टुडुङ्घे़ये बचनबाङ चोङ लिनुङ हे़निङ फेरि टोॽइटानिङे। हे़निङ नासि लिघुबा पाबामि पसाजि ने़ॽनि, तर नासि लिनिबा पाबामि पसाजि लिटानिङे। 24 धारमिक नेॽचिराबेॽ इडोॽ साप्पॽआ ले़ये, “चोप याॽमिजि घासाडोक्नोॽ ले़म्मे, माहाजिमि मानसो नाम्भुङ्लाबेॽहा घासानुङ उङ्डोक्नोॽ ले़हा। घासा वारम्घे़हा, उङ योघे़हा, 25 तर परभुमि बचन सानिङ टुडुङ्घे़हा।” इगो बचननोॽ हे़निङ परचार ले़ःॽपॽआ सुसमाचार ले़ये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.