१ युहन्ना 5 - याम्फुकानिङे़ॽ मक्खाम्डेम हेजाटुङ्मे 1 येसुनोॽ खिरिस्ट ले़ये लुनुङ बिस्वास ले़ःॽखुबाजि चोप निवाहाङ्मि पसाजि ले़म्मे। असे़ॽ निवाहाङ पाबा नम्नम ले़न्डुए, मोसे़ॽ निवाहाङ्मि पसासो नम्नम ले़न्डुए। 2 इन्डोक्पेॽ कानिङे़ॽ निवाहाङ्मि आग्या पालना ले़न्डुङ्मा, मोबा खो नम्नम ले़न्डुङ्मा, मोबाङ्नोॽ लेहेन्डुङ्मे़ कानिङे़ॽ निवाहाङ्मि पसाजि नम्नम ले़न्डुङ्मा। 3 निवाहाङ्मि आग्या पालना ले़ःॽमानोॽ खो नम्नम ले़ःॽपॽआ लिये। खोमि आग्या पालना ले़ःॽमा मोढे़ॽलो छाक्निबा, 4 इन्ढोङ्होङ निवाहाङ्मि चोप पसाजिडे़ॽ मक्खाम्डेम हेजोटुजे। कानिङ्मि बिस्वासडे़ॽनोॽ मक्खाम्डेम हेजोन्डुए। 5 येसु खिरिस्ट निवाहाङ्मि पसा लुनुङ असे़ॽ बिस्वास ले़ःॽहेन्डुए, मोसे़ॽनोॽ मक्खाम्डेम हेजोहेन्डुए। येसु खिरिस्टमि साक्छिजि 6 येसु खिरिस्टडे़ॽ टाङ्बा निवाहाङ्मि पसा ले़ङे लुमे खा खाङ्मुमामि योङामि बप्तिस्मा लासु मोबा काप्सिङ्बेॽ हरि यिडु। योङाबाङ्रेॽ ने़ॽनि, तर हरिबाङ्सो लेस्सा। मो खा चइबानोॽ लुनुङ पबित्रा होङ्निवाडे़ॽनोॽ साक्छि पिटे़, इन्ढोङ्होङ पबित्रा होङ्निवानोॽ चाइबमा ले़ये। 7 सुम्जि साक्छि टुम्मे 8 पबित्रा होङ्निवा, योङानुङ हरि इघा सुम्जि साक्छिडे़ॽ खोमि गबाहि पिये। 9 याॽमिजिडे़ॽ पिबॽआ गबाहिबेॽ कानिङे़ॽ बिस्वास ले़न्डुङ्माहोङ, निवाहाङ्डे़ॽ पिमे साक्छि छना महान ले़ये। निवाहाङ्डे़ॽनोॽ खोमि पसामि टुम्बेॽ गबाहि पिटुए। 10 मोडोगे़ॽ निवाहाङ्मि पसाबेॽ बिस्वास ले़ःॽखुबामि निवाबेॽ इगो खामि साक्छि टुये, निवाहाङ्बेॽ बिस्वास मे़ले़ःॽखुबाडे़ॽ खोमि साक्छिनोॽ मे़ॽनोक्मा मिॽइन्डुए, इन्ढोङ्होङ निवाहाङ्डे़ॽ खोमि पसा येसुमि टुम्बेॽ पिबॽआ साक्छिबेॽ बिस्वासनोॽ मे़ले़टिॽटुए। 11 माहा साक्छि इघा ले़हा, निवाहाङ्डे़ॽ कानिङ ए़ॽसिमे हिङ्मवा पिसा, इगो हिङ्मवा खोमि पसा येसुबेॽ टुये। 12 असानुङ निवाहाङ्मि पसा टुये खोनुङ हिङ्मवा टुये, पसा माॽआघुबानुङ हिङ्मवा माॽआये। ए़ॽसिमे हिङ्मवा 13 हे़निङे़ॽ ए़ॽसिमे हिङ्मवा चुप्मिटानुमे लुमे खा लेसानुमे लुनुङ, निवाहाङ्मि पसाबेॽ बिस्वास ले़ःॽखुबाडे़ॽ हे़निङ इगो नेॽचिरा साप्मे़ॽनिङ्सिनुङे। 14 निवाहाङ्डे़ॽ मिॽपॽआडोॽ ङाःक्माहोङ खोसे़ॽ कानिङ पिये लुनुङ कानिङे़ॽ निवाहाङ्बेॽ पुरा बिस्वास ले़ए़टुङ्मे़। 15 निवाहाङ्नुङ कानिङे़ॽ पारथनाबेॽ इमाङ ङाःक्माहोङ्सो खेम्इन्डुए लुनुङ लेन्डुङ्माहोङ, इगो खासो लेन्डुङ्मा खोनुङ इमाङ इमाङ ङाःक्इटुङ्मा माहा खा चुप्मिटुङ्मा। 16 असे़ॽ खोमि निसाडे़ॽ ए़ॽसिमे खालमा पाप ले़ःॽमे़ॽनिङ्सिबॽआ खाङ्डोक्टुहोङ, मो निसामि लागि निवाहाङ्नुङ पारथना ले़ःॽपेॽमा खे़ये, मोबा निवाहाङ्डे़ॽ खो हिङ्मवा पिन्डुए। तर इगो खा चाहिँ ए़स्सिमे खालमा पापमि लागिरेॽनोॽ ले़ये। सिमाबेॽ लाघे़ॽखुबा पापसो टुहा, तर के़ॽ हे़निङ मोडोक्मा पापमि लागि पारथना ले़ःॽमा लुनिम्नानि। 17 चोप मङे़हा योम्बोक ले़ःॽमा चाहिँ पाप ले़ःॽमा ले़हा। तर चोप पापडे़ॽ सिमाबेॽ लाघे़ॽनिबा। 18 निवाहाङ्मि याॽमिडे़ॽ सानिङ पाप ले़ःॽटुङ्घे़ॽटुजिने, इन्ढोङ्होङ निवाहाङ्मि पसाडे़ॽ खो जोगाबा ले़न्डुए, सैतानडे़ॽ खो नासि ले़ःॽहेसुनि, इगो खागो कानिङे़ॽ लेन्डुङ्मा। 19 मक्खाम्डेम सैतानमि अधिनबेॽ सिॽपेबॽआहोङ्सो कानिङ चाहिँ निवाहाङ्मि याॽमिजि ले़न्डिङ्मा लुनुङ कानिङे़ॽ लेन्डुङ्मा। 20 निवाहाङ्मि पसा लेस्सा, मोबा खोसे़ॽ कानिङ चाइबमा निवाहाङ लेमाराप्टा। इगो खा कानिङे़ॽ लेन्डुङ्मे़। हागो येसुडे़ॽ ले़ःॽमे़ॽ कानिङ ए़ॽसिमे हिङ्मवा पिघुबा चाइबमा निवाहाङ्मि याॽमिजि लिटिङ्मा। 21 के़हा नानिजि, हे़निङ टाङ्बानोॽ मक्खाम्डेमबेॽहा मङे़हा खानुङ योम्बोकबाङ ओः पेनानिङे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.