१ युहन्ना 4 - याम्फुचाइबमानुङ मे़ॽनोक्हा होङ्निवा 1 के़हा वावानिसानुङ नानुसाजि, कानुङ होङ्निवा टुये काघुबाजि चोपमि बिस्वास ए़ले़टानुमे, तर मो पबित्रा होङ्निवा निवाहाङ्बाङ लेम्बॽआ ले़येन्डे, ले़ःॽनिबा लुनुङ लेसानुमे। इन्ढोङ्होङ बेॽलो मे़ॽनोक्हा अगमबक्ताजि इगो मक्खाम्डेमबेॽ लेङ्इटामे। 2 येसु खिरिस्ट चइबानोॽ हिङाबेॽ लेम्बॽआ लुमे खा बिस्वास ले़ःॽखुबा चाहिँ निवाहाङ्बाङ लेम्बॽआ होङ्निवा लुनुङ लेमा खे़ये। 3 येसु हिङाबेॽ लेम्बॽआ लुमे खाबेॽ बिस्वास मे़ले़ःॽखुबा निवा चाहिँ निवाहाङ्बाङ्ए होङ्निवा ने़ॽनि तर मोगो खिरिस्ट सिॽचाघुबा होङ्निवा ले़ये, मो लेङ्इये लुमे टुम्बेॽ हे़निङे़ॽ खेम्बेटानुमे। मो इगो मक्खाम्डेमबेॽ लेम्बेटे़। 4 के़हा नानिजि, हे़निङ चाहिँ निवाहाङ्मि याॽमिजि ले़न्डानिङे, हे़निङे़ॽ माहा मे़ॽनोक्हा खा इःघुबा अगमबक्ताजि हेजाटानुमे, इन्ढोङ्होङ, हे़निङ्बेॽ टुघुबा चाहिँ, इगो मक्खाम्डेमबेॽ टुघुबाबाङ्सो एप्पा ले़ये। 5 माहा मे़ॽनोक्हा खा इःघुबा अगमबक्ताजि मक्खाम्डेमबेॽहाजि ले़म्मे, मोडोगे़ॽ माहाजिडे़ॽ मक्खाम्डेममिन्नोॽ खा इःन्डुजेनुङ मक्खाम्डेमबेॽहा याॽमिजिडे़ॽ खोजिमि खा खेम्इन्डुजे। 6 कानिङ चाहिँ निवाहाङ्मि याॽमिजि ले़न्डिङ्मा, निवाहाङ लेघुबाजिडे़ॽ कानिङ्मि खा खेम्इन्डुजे। असा निवाहाङ्मि याॽमि ने़ॽनिबा मोसे़ॽ कानिङ्मि खा खेप्सुजिनि। चाइबमा होङ्निवानुङ मे़ॽनोक्मा होङ्निवा इगोबाङ्नोॽ लेडोक्इये। निवाहाङ नम्नममि डाङ 7 लङ्गामजि, कानिङ्टाङ्बा इक्कोसे़ॽ हाइको नम्नम ले़ःॽखुसे़ॽचुमा खे़ये, इन्ढोङ्होङ नम्नम ले़ःॽमे निवा निवाहाङ्बाङ लेङ्इये। असानुङ नम्नम टुये मो याॽमि निवाहाङ्मि याॽमि ले़ये, खोसे़ॽ निवाहाङ लेन्डुए। 8 नम्नम मे़ले़ःॽखुबे़ॽ निवाहाङ लेसुनिबा, इन्ढोङ्होङ निवाहाङ नम्नमदाङ्बा ले़ये। 9 निवाहाङ्डे़ॽ कानिङ खोमि नम्नम इडोॽ खाङ्मुसु, कानिङ हिङ्मेॽमामि खोसे़ॽ इक्कोमा पसासो इगो मक्खाम्डेमबेॽ पाक्सु। 10 निवाहाङ्मि नम्नम इगोनोॽ ले़ये कानिङे़ॽ निवाहाङ नम्नम ले़ःॽपॽआ ने़ॽनि, तर खोसे़ॽ चाहिँ याक्लो कानिङ नम्नम ले़टा, मोबा खोमि पसा कानिङ्मि पापमि साटोबेॽ काप्सिङ्बेॽ सिसिॽ पाक्सु। 11 लङ्गामजि, निवाहाङ्डे़ॽ कानिङ इडोॽ नम्नम ले़ःॽपॽआ ले़ये, कानिङे़ॽसो इक्कोसे़ॽ हाइको नम्नम ले़ःॽमा खे़ये। 12 निवाहाङ असे़ॽसो इन्डोक्पेॽसो मे़ङ्खाङ्डिॽ। कानिङे़ॽ इक्कोसे़ॽ हाइको नम्नम ले़ःॽटुङ्माहोङ निवाहाङ कानिङ्बेॽ टुयेनुङ खोमि नम्नम कानिङ्बेॽ खाङ्मुये। 13 खोसे़ॽ टाङ्बामि पबित्रा होङ्निवा कानिङ पिटे़। मोडोगे़ॽ कानिङ निवाहाङ्बेॽ टुन्डिङ्मा खोसो कानिङ्नुङ टुये लुमे खा ले़न्डुङ्मे। 14 निवाहाङ पाबाडे़ॽ टाङ्बामि पसा मक्खाम्डेमबेॽहा याॽमि मुक्ति पिसिॽ पाङ्बॽआ कानिङे़ॽ खाङ्डोक्टुङ्मा मोबा मो खामि साक्छि पिन्डुङ्मा। 15 असे़ॽ येसु निवाहाङ्मि पसा लुनुङ बिस्वास ले़न्डु, मो याॽमिबेॽ निवाहाङ पेङ्इये मोबा खोसो निवाहाङ्बेॽ टुये। 16 इडोॽ निवाहाङ्डे़ॽ नम्नम ले़ःॽपॽआ खा कानिङे़ॽ लेन्डुङ्मानुङ मोबाङ्नोॽ बिस्वास ले़न्डुङ्मा। निवाहाङ नम्नम ले़ये, मोडोगे़ॽ असाबेॽ नम्नम सानिङ टुये मो याॽमिबेॽ निवाहाङ टुये। 17 कानिङे़ॽ इक्कोसे़ॽ हाइको चइबानोॽ नम्नम ले़टुङ्मानुङ खिरिस्टमिडोॽमा हिङ्मवा हिङ्इन्डिङ्माहोङ न्यायमि याकपेॽ कानिङ किस्सिमा पाप्निबा। 18 नम्नमबेॽ किस्सिमा माॽआये, तर चाइबमा नम्नमडे़ॽ किस्सिमवा यिॽइन्डुए, इन्ढोङ्होङ किस्सिमवाडे़ॽ दन्डा चुप्मिये लुमे खा खाङ्मुये। किस्सिखुबा याॽमिबेॽ चाइबमा नम्नम माॽआये। 19 निवाहाङ्डे़ॽ याक्लो कानिङ नम्नम ले़ःॽपॽआसे़ॽ कानिङे़ॽसो नम्नम ले़न्डुङ्मा। 20 इक्को याॽमिडे़ॽ “के़ॽ निवाहाङ नम्नम ले़नुङे” लुन्डुए, तर निवाहाङ्मि याॽमि सिॽचोन्डुहोङ मो याॽमि रेम्देये। टाङ्बामि पोम्बेॽ टुये निसानोक्सो नम्नम मे़ले़ःॽहेघुबे़ॽ इन्डोक्पेॽसो मे़ङ्खाङ्बॽआ निवाहाङ चाहिँ इन्डोक्टे नम्नम ले़ःॽहेन्डुए ? 21 असे़ॽ निवाहाङ नम्नम ले़न्डुए, मोसे़ॽ निवाहाङ्मि याॽमिजिसो नम्नम ले़ःॽमा खे़ये। निवाहाङ पाबाडे़ॽ कानिङ पिबॽआ आग्या इगोनोॽ ले़ये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.