१ युहन्ना 3 - याम्फुनिवाहाङ्मि पसाजि 1 खाक्सानुमे, पाबाडे़ॽ कानिङ इन्डोक बेॽलो नम्नम ले़ए़टे़, खोमि नम्नमडे़ॽ कानिङ निवाहाङ्मि पसाजि लुनुङ लेम्मे, चइबानोॽ खोमिन्नोॽ पसाजिनोॽ ले़न्डिङ्मा। मक्खाम्डेमबेॽहा याॽमिजिडे़ॽ निवाहाङ मे़लेसुजि मोडोगे़ॽ कानिङ्सो लेमिनेबा। 2 लङ्गामजि, आइ कानिङ निवाहाङ्मि पसा ले़न्डिङ्मा, मोबा ए़क्साङ चाहिँ इमाङ लिन्डिङ्मा हागोरोसो कानिङे़ॽ लेसुङ्मानि। तर इडोॽ लेन्डुङ्मा खिरिस्ट लेम्माबेॽ कानिङ्सो खोडोक्नोॽ लिन्डिङ्मा। इन्ढोङ्होङ खो इन्डोक्मा ले़ये कानिङे़ॽ खो मोडोक्मानोॽ खाङ्डोक्इन्डुङ्मे़। 3 मोबा इन्डोक खो पबित्रा ले़ये, मोडोक्नोॽ खोसोक्पेॽ आसा ले़ःॽखुबा चोप याॽमिडे़ॽसो पबित्रा लिमा खे़ये। 4 पाप ले़ःॽटुङ्घे़ॽखुबे़ॽ नियमडे़ॽ लुडिडोॽ मे़ले़ःॽपॽआ आप्टिक सिॽइये, इन्ढोङ्होङ नियमडे़ॽ लुबॽआ ए़ले़ःॽमानोॽ पाप ले़ये। 5 हे़निङे़ॽ लेन्डानुमे, याॽमिजिमि पाप वासोक्मामि लागिनोॽ खिरिस्ट लेस्सा खोबेॽ पापनोॽ माॽआये। 6 मोडोगे़ॽ खिरिस्टबेॽ टुघुबाजि असे़ॽसो पाप फेरि ले़टुङ्घे़ॽटुनिबा। फेरि पाप ले़ःॽखुबे़ॽ खो खाङ्सो खाङ्डोक्टुजिनि, लेसो मे़लेडिॽटुजे। 7 होउ ए़द्रिहा नानिजि, असे़ॽसो हे़निङ मे़म्फाङ्सेॽमिरो, असे़ॽ ठिक योम्बोक ले़न्डु, मो धरमि ले़ये, खिरिस्टसो धरमि ले़ये। 8 असे़ॽ सानिङ पाप ले़न्डुहा, मो याॽमि चाहिँ सैतानमि याॽमिमि ले़ये। इन्ढोङ्होङ सैतानडे़ॽको उहिलेबाङ्नोॽ पाप ले़ःॽआप्मिटुए। इगो सैतानमि पापि योम्बोक नासि ले़ःॽमामिन्नोॽ निवाहाङ्मि पसा इगो मक्खाम्डेमबेॽ लेङ्इटे़। 9 निवाहाङ्मि पसाजिडे़ॽ चाहिँ सानिङ पाप ले़टुङ्घे़ॽटुजिने। इन्ढोङ्होङ खोबेॽ निवाहाङ्मि होङ्निवा टुये। खोसे़ॽ सानिङ पाप ले़टुङ्घे़ॽहेसुनिबा इन्ढोङ्होङ खोमि पाबा निवाहाङ ले़ये। 10 निवाहाङ्मि पसानुङ सैतानमि पसा इडोक्नोॽ लेहेये। निवाहाङ्मि पोम्बेॽ चाइबमा योम्बोक मे़ले़ःॽखुबा, टाङ्बामि वावानिसाजि नम्नम मे़ले़ःॽखुबा चाहिँ निवाहाङ्मि पसा ने़ॽनिबा। नम्नम ले़ःॽखुसे़ॽचुसानिङे 11 इक्कोसे़ॽ हाइको नम्नम ले़ःॽखुसे़ॽचुमा खे़ये लुमे खा हे़निङे़ॽ याक्लोनोॽ खेम्इटामे। 12 हे़निङ कयिनडोॽ ए़ॽलिसानिङे, खोगो सैतानमि याॽमि ले़टा। खोसे़ॽ खोम्निसा हाबिल सेॽनेसु। खो दुस्ट ले़टे़न्से़ॽ खोम्निसा सेॽनेसु, तर खोमि निसा चाहिँ धरमि याॽमि ले़टा। 13 वावानिसानुङ नानुसाजि, हे़निङ मक्खाम्डेमबेॽहा याॽमिजिडे़ॽ सिॽचामिहोङ खरि ए़मिनानिङे। 14 कानिङे़ॽ लेमा खे़ये, कानिङ्गो सिघे़ये हिङाबाङ हिङ्रिक हिङ्मवाबेॽ सेम्बेटिङ्मा, इन्ढोङ्होङ कानिङे़ॽ बिस्वासि वावानिसानुङ नानुसाजि नम्नम ले़न्डुङ्मा। असे़ॽ बिस्वासि वावानिसानुङ नानुसाजि नम्नम ले़टुजिने माहाजि सिमवामि अधिनबेॽ सानिङ टुम्मे। 15 बिस्वासि वावानिसानुङ नानुसाजि सिॽचाघुबा चाहिँ याॽमि सेॽखुबा ले़ये, याॽमि सेॽखुबाडे़ॽ ए़ॽसिमे हिङ्मवा चुप्हेसुनिबा लुनुङ हे़निङे़ॽ लेन्डानुम। 16 खिरिस्टडे़ॽ कानिङ्मि पापमि लागि खोमि हिङ्मवा काप्सिङ्बेॽ चेॽटिसु। इगो खाबाङ्नोॽ कानिङे़ॽ नम्नम लुबॽआ इमाङ्डे लुनुङ नुरोॽ लेबेटुङ्मे़। मोडोगे़ॽ कानिङे़ॽ बिस्वासि वावानिसाजिमि लागि हिङ्मवा पिमा खे़ये। 17 मक्खाम्डेमबेॽ बेॽलो याङ्सरावा काप्खुबाडे़ॽ खाँचोबेॽ सिॽपॽआ वावानिसा सहायता मे़ले़ःॽहेसुहोङ मो याॽमिडे़ॽ निवाहाङ इन्डोक्टे नम्नम ले़न्डुए। 18 के़हा नानिजि, कानिङ्मि नम्नम चाहिँ याबुकबाङ्रेॽनोॽ खाङ्मुनुङ के़ॽनिबा, तर कानिङे़ॽ चाइबमा नम्नम ले़ःॽमा खे़येनुङ योम्बोकबाङ खाङ्मुमा खे़ये। निवाहाङ्मि पोम्बेॽ येःप्हेघुबा 19 मोडोगे़ॽ कानिङ चाइबमा खा लेघुबा याॽमिजि ले़न्डिङ्मा लुमे खा लेन्डुङ्मा मोबा कानिङ निवाहाङ्मि पोम्बेॽ मे़ङ्किस्सिरेॽ खे़ॽहेन्डिङ्मा। 20 कानिङ्मि निवाडे़ॽनोॽ फे़न्निबा लुयेहोङ्गो, निवाहाङ्गो छना कानिङ्मि निवामि खा लेघुबा ले़ये। खोसे़ॽ चोप खा लेन्डुहा। 21 के़हा लङ्गामजि कानिङ्मि निवाडे़ॽ कानिङ आप्टिक मे़न्टिहोङ निवाहाङ्मि पोम्बेॽ खे़ॽमा आट चुप्मिये। 22 निवाहाङ्डे़ॽ पिबॽआ आग्याडे़ॽ लुडिडोॽ कानिङे़ॽ ले़न्डुङ्माहोङ मोबा खोसे़ॽ नेन्जामारोमा योम्बोक ले़न्डुङ्माहोङ, कानिङे़ॽ ङाःक्पॽआ खा खोसे़ॽ कानिङ पिये। 23 निवाहाङ्मि आग्या चाहिँ इघानोॽ ले़हा- खोमि पसा येसु खिरिस्टबेॽ बिस्वास ले़ःॽमा खे़ये, मोबा खिरिस्टडे़ॽ लुडिडोॽ इक्कोसे़ॽ हाइको नम्नम ले़ःॽमा खे़ये। 24 खोमि आग्या पालना ले़ःॽखुबाजि चोप निवाहाङ्बेॽ टुम्मेनुङ खो माहाजिबेॽ पेङ्इये। इडोॽ निवाहाङ कानिङ्बेॽ टुये खा खोसे़ॽ पिबॽआ पबित्रा होङ्निवाडे़ॽ लेमाराप्मिये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.