१ युहन्ना 2 - याम्फुखिरिस्ट कानिङ्मि सहायक 1 के़ॽ नम्नम मिॽपॽआ नानिजि, हे़निङे़ॽ पाप ए़ले़टानुमे लुनुङ के़ॽ इघा खा हे़निङ्मि लागि साप्मे़ॽनिङ्सिनुङे। तर असे़ॽसो पाप ले़टुहोङ्सो कानिङ्मि लागि पाबानुङ बिन्ति ले़ःॽपेॽखुबा इक्को धरमि येसु खिरिस्ट टुये। 2 खो कानिङ्मि पापबाङ फाक्मामि लागि बलि लिसा। कानिङ्मि लागिरेॽनोॽ ने़ॽनि तर मक्खाम्डेमबेॽहा चोप याॽमिजिमि लागि बलि लिसा। 3 कानिङे़ॽ खोमि आग्या पालना ले़टुङ्माहोङ खो लेन्डुङ्मे़। 4 असा चाहिँ “के़ॽ खो लेनुङे़” काये, तर खोमि आग्या पालना ले़टुनिबा मोसे़ॽ रेम्डेन्डुए, मोबा खोबेॽ चाइबमा खा माॽआये। 5 तर असे़ॽ खोमि खा खेम्इन्डुए, मोसे़ॽ निवाहाङ चइबानोॽ नम्नम ले़न्डुए। इगो खाबाङ्नोॽ कानिङ खोबेॽ टुन्डिङ्मा लुमे खा लेन्डुङ्मे़। 6 का निवाहाङ्मि ले़ङे काघुबा याॽमिडे़ॽ खिरिस्टमिनोॽ चालबेॽ राम्मा खे़ये। चोङ आग्या 7 वावानिसानुङ नानुसाजि, के़ॽ हे़निङ पिमे आग्या चोङ ने़ॽनिबा। इगो याक्लोए आग्यानोॽ ले़ये, मो याक्लोएम्बाङ हे़निङे़ॽ खेम्बॽआ बचननोॽ ले़ये। 8 तरसो इक्को चोङ आग्या के़ॽ साप्मे़ॽनिङ्सिनुङे। मो चाइबमा चाहिँ येसुबेॽनुङ हे़निङ्बेॽसो टुये, इन्ढोङ्होङ सेन्जुगुप मे़खे़ॽमे़ॽनिङ्सिये, जोति याक्लोएबाङ्नोॽ टुसिये। 9 असे़ॽ का जोतिबेॽ टुङे काये, तर बिस्वास ले़ःॽखुबा वावानिसानुङ नानुसाजि सिॽचोन्डुजेहोङ खो हागोरोसो सेन्जुगुप्पेॽनोॽ टुये। 10 असे़ॽ खोमि वावानिसानुङ नानुसाजि नम्नम ले़न्डुए, खो जोतिबेॽ टुये, खोमि हिङ्मवाबाङ हाइखाजिमि निवा टुक्मे खोबाङ लिनिबा। 11 तर असे़ॽ टाङ्बामि वावानिसानुङ नानुसाजि सिॽचोन्डुए मो सेन्जुगुप्पेॽ टुये, खो मो रामबेॽ राम्इयेनुङ खो हाम्बेॽ खे़ॽमे़ॽनिङ्सिये लेसुनिबा। इन्ढोङ्होङ सेन्जुगुपडे़ॽ खो मिक्सुरुम्बा टोङ्इटुए। 12 के़हा नानिजि, के़ॽ हे़निङ साप्मे़ॽनिङ्सिनुङे, इन्ढोङ्होङ येसु खिरिस्टडे़ॽ ले़ःॽमे़ॽ हे़निङ्मि पाप आम्लाङ लिटाहा। 13 पाबाजि हे़निङ्मि लागि इगो खा साप्मे़ॽनिङ्सिनिम्ने़, इन्ढोङ्होङ याक्लोएम्बाङ टुघुबा हे़निङे़ॽ लेन्डानुमे। वेन्जाजि हे़निङे़ॽ मङे़ॽमा सैतान हेजाटानुमे। के़हा ए़द्रेहा पिच्छाजि, के़ॽ हे़निङ इगो खा साप्मे़ॽनिङ्सिनिम्ने़ इन्ढोङ्होङ हे़निङे़ॽ पाबा लेटानुमे। 14 पाबाजि, हे़निङ्मि लागि के़ॽ इगो खा साप्मे़ॽनिङ्सिनिम्ने़, इन्ढोङ्होङ हे़निङे़ॽ याक्लोएम्बाङ टुघुबा निवाहाङ लेन्डानुमे। वेन्जाजि, के़ॽ हे़निङ इगो खा साप्मे़ॽनिङ्सिनिम्ने़, इन्ढोङ्होङ हे़निङ छाॽइन्डानिङेनुङ हे़निङ्मि निवाबेॽ निवाहाङ्मि बचन टुहा, मोबा हे़निङे़ॽ मो मङे़ॽमा सैतान हेजाटानुमे। 15 मक्खाम्डेम अथबा मक्खाम्डेमबेॽहा इमाङ थोकमिसो नम्नम ए़ले़टानुमे। असे़ॽ मक्खाम्डेम नम्नम ले़न्डुए मोसे़ॽ निवाहाङ नम्नम ले़टुनिबा। 16 इन्ढोङ्होङ मक्खाम्डेमबेॽ टुहा चोप थोक अथबा हिङाडे़ॽ ले़ःॽमा मिॽपॽआ मङे़हा योम्बोक, मिगे़ॽ खाङ्मा मिॽपॽआ मङे़हा खा, कानिङ्नुङ टुहा याङ्सरावामि काङायोङ्बा लिमे खा, इघा चोप निवाहाङ पाबाबाङ लेम्बॽआ ने़ॽनि, मक्खाम्डेमबाङ लेम्बॽआ ले़हा। 17 मक्खाम्डेमनुङ मोबेॽहा चोप थोकमि नोङ्सिमा नासि लिघे़हा, तर निवाहाङ्डे़ॽ मिॽपॽआ खा पुरा ले़ःॽखुबा चाहिँ सानिङ्मि लागि हिङ्इये। खिरिस्टमि टेडिघरिक याॽमिजि चेतावनि 18 के़हा नानिजि, इगो ए़क्साङ्ए बेला ले़ये। खिरिस्टमि टेडिघरिक याॽमि लेम्मे़ॽनिङ्सिये लुमे खा हे़निङे़ॽ खेम्इटानुमे। खिरिस्टमि बेॽलो टेडिघरिक याॽमिजि याक्लोनोॽ लेम्बेटामे। मोडोगे़ॽ इघा खाबाङ कानिङे़ॽ लेन्डुङ्मा, इगो ए़क्साङ्ए बेला ले़ये। 19 माहाजि कानिङ याःॽयानुङ खे़ॽप्पेसामि, इन्ढोङ्होङ खोजि कानिङ्हाजि ने़ॽनिहाजि। खोजि कानिङ्हाजि ले़टामिहोङ्गो कानिङ्नुङ्नोॽ पेनामे, मोडोगे़ॽ इगो खाबाङ छे़ङ्गै लिमामि लागि माहाजि कानिङ्बाङ हाःघडामि। 20 तर हे़निङ चाहिँ माहा पबित्राबाङ अभिसेक लिटानिङे, मोडोगे़ॽ हे़निङ चोबे़ॽ चाइबमा खा लेन्डानुमे। 21 हे़निङे़ॽ चाइबमा खा लेसानुम्ने मिॽनुङ के़ॽ इघा खा साप्पॽआ ने़ॽनि, तर इन्डोक्पेॽसो मे़ॽनोक्हा खा चाइबमा खाबाङ लेन्निबा लुनुङ हे़निङे़ॽ लेन्डानुमे, मोडोगे़ॽ इघा खा हे़निङ साप्मिटुङ्हा। 22 मे़ॽनोक्मा असाडे ? येसु खिरिस्ट मुक्तिदाङ्बा ने़ॽनिबा लुघुबानोॽ मे़ॽनोक्मा ले़ये। निवाहाङ पाबानुङ पसा बिस्वास मे़ले़ःॽखुबानोॽ खिरिस्टमि टेडिगरिक्मा याॽमि ले़ये। 23 पसाबेॽ बिस्वास मे़ले़ःॽखुबे़ॽ पाबासो बिस्वास ले़टुनिबा, मोबा पसा बिस्वास ले़ःॽखुबे़ॽ पाबासो बिस्वास ले़न्डुए। 24 मोडोगे़ॽ हे़निङे़ॽ याक्लोएम्बाङ खेम्बॽआ खा हे़निङ्मि निवाबेॽ नुरोॽ युक्सानुमे। याक्लोएम्बाङ हे़निङे़ॽ खेम्बॽआ सिक्छे सानिङ टुहोङ हे़निङ पाबानुङ पसाबेॽ टुन्डानिङे। 25 खोसे़ॽ कानिङ पिनिम्ने़ लुनुङ हेन्ज्रुङ हे़म्बॽआ खा चाहिँ, ए़ॽसिमे हिङ्मवा ले़ये। 26 इघा चोप खा हे़निङ रेम्डेॽसिॽ लेङ्घुबाजिमि टुम्बेॽ साप्मिटुङ्हा। 27 हे़निङ्बेॽ चाहिँ खिरिस्टडे़ॽ खोमि पबित्रा होङ्निवा ओप्मिटुहा। मो होङ्निवा हे़निङ्बेॽ टुये, मोबा हे़निङ असे़ॽसो इःॽमा पाप्निबा, इन्ढोङ्होङ पबित्रा होङ्निवाडे़ॽनोॽ हे़निङ चोप खा इःॽपेये। मो होङ्निवाडे़ॽ चोप खा इःॽयेनुङ मो चाइबमा ले़ये, मे़ॽनोक्मा ले़ःॽनिबा। इगो होङ्निवाडे़ॽ इःॽटिडिडोक्नोॽ ले़ःॽनुङ सानिङ खिरिस्टबेॽ हिक्सानिङे। 28 के़हा नानिजि, खोमि बिस्वासबेॽ सानिङ पेनानिङे, खो खाङ्मुमाबेॽ कानिङे़ॽ बोल चुप्मिन्डुङ्मे, मोबा खो लेम्मे याकपेॽ खोमि पोम्बेॽ कानिङ ङेसिमा पाप्निबा। 29 खिरिस्ट धरमि ले़ये लुनुङ हे़निङे़ॽ लेबेटानुमे। मोडोगे़ॽ हे़निङे़ॽ लेसानुमे, निवाहाङ्मि पोम्बेॽ चाइबमा योम्बोक ले़ःॽखुबा चाहिँ निवाहाङ्मिन्नोॽ पसाजि लिन्डानिङे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.