१ युहन्ना 1 - याम्फुहिङ्मवामि बचन 1 याक्लोएबाङ्नोॽ टुबॽआ, कानिङे़ॽ खेम्बॽआ, मोबा कानिङ्मि मिगे़ॽ खाङ्बॽआ, मोबा नुरोॽ वाःप्पॽआनुङ कानिङ्मि हुगे़ॽ के़क्पॽआ हिङ्मवामि बचनमि टुम्बेॽ कानिङे़ॽ साप्मिटुङ्मे। 2 मो हिङ्मवा कानिङ्मि रुम्बेॽ लेस्सा, कानिङे़ॽ मो खाङ्नुङ मोमि टुम्बेॽ गबाहि पिन्डुङ्मा। मो ए़ॽसिमे हिङ्मवा निवाहाङ पाबानुङ टुसा मो कानिङ्मि रुम्बेॽ लेस्सा। 3 कानिङ्मि सङ्गति चाहिँ निवाहाङ पाबानुङ खोमि पसा येसु खिरिस्टनुङ टुये। मोडोगे़ॽ हे़निङ्सो कानिङ्नुङ सङ्गति ले़टानिङे लुनुङ्नोॽ कानिङे़ॽ खाङ्बॽआनुङ खेम्बॽआ मो खा हे़निङ लुमे़ॽनिङ्सिन्डुङ्मे। 4 कानिङ्मि हाङ्हाङ पुरा लिरो लुनुङ इघा खा साप्मे़ॽनिङ्सिन्डुङ्मे। 5 कानिङे़ॽ निवाहाङ्मि पसाबाङ खेम्बॽआ बचन हे़निङ खेम्मेन्डुङ्मे मो खा इडोॽ ले़ये निवाहाङ जोति ले़ये खोबेॽ ए़डे़ॽवासो सेन्जुगुप माॽआये। 6 कानिङ खोनुङ सङ्गति ले़न्डिङ्मा लुन्डुङ्मा, तर सेन्जुगुप्पेॽनोॽ राम्इन्डिङ्माहोङ्गो, कानिङ रेम्इन्डिङ्मा मोबा चाइबमा रामबेॽ राप्सिङ्मानि। 7 तर खो जोतिबेॽ टुबॽआडोक्नोॽ कानिङ्सो जोतिबेॽ राप्सिङ्माहोङ, कानिङ इक्कोमि हाइकोनुङ सङ्गति लिये। मोबा निवाहाङ्मि पसा येसुमि हरिडे़ॽ कानिङ चोप पापबाङ चोखो टोङ्इये। 8 कानिङे़ॽ टाङ्बाबेॽ पाप माॽआ कान्डिङ्माहोङ्गो कानिङ टाङ्बे़ॽ टाङ्बानोॽ रेम्सेन्डुङ्मा। मोबा कानिङ्बेॽ चाइबमा खा माॽआये। 9 तर कानिङे़ॽ टाङ्बामि पाप निवाहाङ्मि पोम्बेॽ युङ्नुङ खोबेॽ टेघे़ॽमाहोङ खोसे़ॽ कानिङ्मि पापबाङ आम्लाङ पिये। चोप अधरमि खाबाङ कानिङ चोखो टोङ्इये, इन्ढोङ्होङ निवाहाङ बिस्वासनुङ्मानुङ धरमि ले़ये। 10 कानिङे़ॽ पाप मे़ले़ःॽटिॽ कान्डिङ्माहोङ कानिङे़ॽ निवाहाङ मे़ॽनोक्मा टोङ्इन्डुङ्मेनुङ खोमि बचन कानिङ्नुङ माॽआहा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.