१ कोरिन्थि 9 - याम्फुएप्पा चोङ्साजिमि अधिकार 1 इमा का फुक्का ले़ःॽङानि ? इमा का एप्पा चोङ्सा ने़ॽनिबा ? इमा के़ॽ कानिङ्मि परभु येसु मे़ङ्खाङ्डिटुङे ? के़ॽ खेम्मेॽपॽआ सुसमाचारबाङ्नोॽ हे़निङे़ॽ परभुबेॽ बिस्वास ले़ःॽपॽआ ने़ॽनेन्डे ? 2 हाइखा याॽमिजिडे़ॽ का एप्पा चोङ्सा मे़मिॽमिहोङ्सो, हे़निङे़ॽको मिॽइन्डानिङे, इन्ढोङ्होङ का एप्पा चोङ्सा ले़ङे लुनुङ हे़निङे़ॽ परभुबेॽ बिस्वास ले़ःॽपॽआडे़ॽनोॽ साक्छि पिये। 3 काङ्मि अधिकारमि टुम्बेॽ सिम्खुबाजि के़ॽ इगोनोॽ खा लुनुङ्हाजि। 4 इमा कानिङे़ॽ ले़ःॽपॽआ सेवामि योम्बोकबाङ्नोॽ चामे उङ्मे अधिकार कानिङ माॽआये ? 5 इमा पत्रुस, परभु येसुमि निसाजिनुङ हाइखा एप्पा चोङ्साजिडे़ॽ ले़टिडोॽ कानिङे़ॽसो टाङ्बामि बनिमाजि सोरि चिक्मानुङ राम्डोक्टोगिने ? 6 अथबा बारनाबासनुङ के़ॽरेॽनोॽ टाङ्बामि लागि योम्बोक ले़ःॽनुङ हिङ्मा खे़ये ? 7 टाङ्बामिनोॽ याङ खरचा ले़ःॽनुङ हाम्बे तिरिङ्गाडे़ॽ योम्बोक ले़न्डुए ? इमा अङ्गुरमि खेति टिखुबे़ॽ मोमि चा चोसुने ? इमा गोठ्लाडे़ॽ टाङ्बामि पिकमि टुडु उक्सुने ? 8 इगो खा के़ॽ याॽमिमि निवाबाङ्रेॽ मे़इःडिॽ, यहुदि धारमिक नियमडे़ॽसो इडोक्नोॽ लुये। 9 इन्ढोङ्होङ मोसाडे़ॽ पिबॽआ यहुदि नियमबेॽ इडोॽ साप्पॽआ ले़ये, “दाँइ ले़ःॽखुबा सुःक्मामि याबुकपेॽ काक्पा ए़ॽटिमे़।” इमाङ इगो खा निवाहाङ्डे़ॽ सुःक्मामि लागिरेॽ लुबॽआडे ? 10 इमाङ खोसे़ॽ इगो खा कानिङ्मि लागि लुबॽआ ने़ॽने ? एइ, कानिङ्मिनोॽ लागि इगो लुबॽआ ले़ये, इन्ढोङ्होङ रोपा चेॽखुबानुङ दाँइ ले़ःॽखुबा निप्पाङेॽनोॽ योम्बोकमि नमयाक चुप्मिये लुनुङ्नोॽ ले़न्जुए। 11 काजिङे़ॽको हे़निङ्मि रुम्बेॽ आत्मिक चरि टुप्मिचुङे। मोमि साटोबेॽ हे़निङे़ॽ काजिङ ए़डे़ॽवा पिमा सारो सिॽइये ? 12 हाइखाजिडे़ॽ हे़निङ्बाङ इमाङ थोक चुप्मिन्डुजेहोङ कानिङे़ॽको माहाजिबाङ्सो बेॽलो चुप्मा खे़ये ने़ॽने़न्डे ? तर कानिङे़ॽ इगो हक योक्मामि साटो खिरिस्टमि सुसमाचार खेम्मेॽमाबेॽ इमाङ्सो बाधा मे़सिॽलो लुनुङ कानिङे़ॽ चोप खा आक्सुङ्मा। 13 मन्दिरबेॽ योम्बोक ले़ःॽखुबाजिडे़ॽ मोबेॽ चेॽटिबॽआनोॽ चोन्डुजे। मोबा थानाबेॽ भोग पिमे योम्बोक ले़ःॽखुबाजिडे़ॽ मोबाङ्नोॽ खोजिमि भाग हाःन्डुजे लुमे खा इमा हे़निङे़ॽ लेसानुम्ने ? 14 इडोक्नोॽ सुसमाचार परचार ले़ःॽखुबाडे़ॽ सुसमाचारमि योम्बोकबाङ्नोॽ चामा उङ्मा चुप्टुजिरो लुमे परभुमि आग्या टुये। 15 तर के़ॽ इघा इमाङ अधिकारसो मे़लाडिॽटुङ। हागो काङ्मि लागि इघा पिमाजे लुनुङ लुबॽआसो ने़ॽनिबा। मोडोॽ ले़ःॽमाहोङ्गो बोरु का सिघे़ॽमा चुये। असे़ॽसो काङ्मि इगो काङायोङ्बा ले़ःॽमे खा योम्बोक मे़ॽनिङ्मा ले़ये लुहेसुने। 16 के़ॽ सुसमाचार खेम्मेॽमाबेॽ का काङायोङ्बा लिमा खेन्जाङानि। इन्ढोङ्होङ इगो खा के़ॽ खेम्मेॽमानोॽ खे़ये। के़ॽ सुसमाचार मे़ङ्खेम्मेॽटुङ्होङ का इनामा लिङे। 17 के़ॽ नेन्जानुङ इगो योम्बोक ले़ःॽपॽआहोङ नमयाक टोक्मे आसा युङ्मा खडे़। तर के़ॽ इगो योम्बोक ले़ःॽमानोॽ खे़ये मिॽनुङ ले़ःॽमे़ॽनिङ्सिनुङे। निवाहाङ्डे़ॽनोॽ का इगो योम्बोकमि जिम्मा पिटिङे। 18 मोडोक्होङ के़ए़ नमयाक चाहिँ इमाङ्डे ? काङ्मि हकबाङ चुप्मिये नमयाक मे़ॽनिङ्नोॽ सुसमाचार परचार ले़टोक्मानोॽ के़ए़ नमयाक ले़ये। 19 का असामिसो सेउते ने़ॽनिबा, मोडोक्होङ्सो बेॽलो याॽमिजि खिरिस्टबेॽ बिस्वास ले़ःॽमेॽमामि का चोपमि सेउतेडोॽ लिटिङे। 20 यहुदिजिमि रुम्बेॽ योम्बोक ले़ःॽमाबेॽ खोजिडे़ॽ खिरिस्टबेॽ बिस्वास ले़टुजिरो लुनुङ का यहुदिजिडोक्नोॽ लिसिङा। मोसाडे़ॽ पिबॽआ यहुदि चलन पालना ले़ःॽखुबाजिमि रुम्बेॽ टुमाबेॽ खोजिडे़ॽ खिरिस्टबेॽ बिस्वास ले़टुजिरो लुनुङ के़ॽसो मोनोॽ नियम पालना ले़टुङ। 21 नियम पालना मे़ले़ःॽखुबा अयहुदिजिमि रुम्बेॽ योम्बोक ले़ःॽमाबेॽ खोजिडे़ॽसो खिरिस्टबेॽ बिस्वास ले़टुजिरो लुनुङ यहुदि नियम मे़लेडिडोॽ ले़टुङ। तर निवाहाङ्मि नियम पालना मे़ले़ःॽपॽआगो ने़ॽनिबा, के़ॽको खिरिस्टमि नियम पालना ले़नुङे। 22 मोबा थोःप्थोःप्हा याॽमिजिमि रुम्बेॽ कासो खोजिडोक्नोॽ लिसिङ। याॽमिजिडे़ॽ इन्डोॽहोङ्सो खिरिस्टबेॽ बिस्वास ले़टुजिरो लुनुङ खाल खालहा चोप याॽमिजिनुङ कासो खोजिडोक्नोॽ लिसिङा। 23 सुसमाचार चोबे़ॽ खे़म्डोक्टुजिरो लुनुङ्नोॽ के़ॽ इघा चोप ले़ःॽमे़ॽनिङ्सिनुङे मोबा इगोबाङ आसिस चुप्मिनुङे लुमे आसाबेॽ इडोॽ ले़नुङे। 24 चइबानोॽ पिम्मागो चोपनोॽ पिङ्इम्मे, तर इनाम चाहिँ इक्कोसे़ॽरेॽ चुप्मिन्डुए लुनुङ हे़निङे़ॽ लेन्डानुमे। मोडोक्नोॽ हे़निङ्सो इनाम चुप्मामि लागि पिनानिङे। 25 पिम्मामि लागि भाग लाघुबे़ॽ चोप खाबेॽ टाङ्बा अधिनबेॽ युङ्मा खे़ये। माहाजिडे़ॽ नास लिघे़ये इनाम चुप्मामिनोक्सो मोडोॽ ले़न्डुजे, तर कानिङे़ॽ चाहिँ इन्डोक्पेॽसो नासि लिनिबा इनाम चुप्मामि इडोॽ ले़न्डुङ्मा। 26 मोडोगे़ॽनोॽ का पिम्माबेॽ इनाम चुप्मामि पिङ्इङे। हिॽवाबाबेॽ हुगे़ॽ उप्टिडोॽ माङ माङ के़ॽ उबुङ्नि। 27 हाइखा याॽमिजि अरति पिनुङ टाङ्बा चाहिँ योम्बोक मे़ॽनिङ ए़ॽलिमा लुनुङ पिङ्खुबाडे़ॽ टाङ्बामि हिङा अधिन ले़टिडोॽ काङ्मि हिङा अधिनबेॽ नुरोॽ युङ्इनुङे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.