१ कोरिन्थि 8 - याम्फुमुरतिबेॽ चेॽटिबॽआ खा 1 हागो के़ॽ मुरतिबेॽ चेॽटिबॽआ चामे थोकमि टुम्बेॽ इःनुङे। कानिङे़ॽ लेन्डुङ्मा, “कानिङ चोबे़ॽ लेमे निवा चुप्मिटुङ्मे”। तर लेमे निवाडे़ॽ काङायोङ्बा टोङ्इये, तर नम्नमडे़ॽ हाइखाजिमि लागि छना बेॽलो नुबा ले़न्डुए। 2 इक्को याॽमिडे़ॽ “चइबानोॽ के़ॽ लेनुङे़” मिॽइन्डुहोङ, खोसे़ॽ लेमा खे़ये खा चाहिँ इमाङ्सो लेसुनिबा। 3 तर असे़ॽ निवाहाङ नम्नम ले़न्डुए खो निवाहाङ्डे़ॽ लेन्डुए। 4 हागो मुरतिबेॽ चेॽटिबॽआ थोकमि टुम्बेॽ खा इःमाबेॽ हे़निङे़ॽ लुडिडोॽ “मक्खाम्डेमबेॽहा मुरति इमाङ्सो ने़ॽनिहा” मोबा “इक्कोरेॽनोॽ निवाहाङ टुये, खोबाङ हाइको निवाहाङ माॽआये” लुमे खा कानिङे़ॽ लेन्डुङ्मे़। 5 नान्द्रुङ्मानुङ मक्खाम्डेमबेॽ बेॽलो निङ्रेॽहा देबि देउताजि टुम्मे। (चइबानोॽ देबिदेबतानुङ परभु मिॽपॽआजि बेॽलो टुम्मे) 6 तरसो कानिङ्मि लागि चाहिँ इक्कोरेॽनोॽ निवाहाङ पाबा टुये। खोसे़ॽनोॽ चोपमि सिरिस्टि ले़टु। खोमि लागिनोॽ कानिङ हिङ्इन्डिङ्मे कानिङ्मि लागि इक्कोरेॽनोॽ परभु, येसु खिरिस्ट टुये। खोबाङ्नोॽ चोप खा लिजसानुङ खोबाङ्नोॽ कानिङ हिङ्इन्डिङ्मे। 7 तर खिरिस्टबेॽ बिस्वास ले़ःॽखुबा चोप याॽमिजिडे़ॽ इगो खामि टुम्बेॽ लेसुजिनिबा। इन्डोक याॽमिजि मुरति सम्माङ्बेॽ बानि लिबेबॽआसे़ॽ, बिस्वासि लिनुङ माहाजिडे़ॽ मुरति सम्माङ्बेॽहा चामाहा खा चामाबेॽ मुरतिबेॽ चेॽटिबॽआ मिॽइन्डुजे। माहाजिमि नुबानुङ मङे़हा लेमे निवा कमजोर ले़ःॽपॽआसे़ॽ मुरति सम्माङ्बेॽ चेॽटिबॽआ थोक चामाबेॽ असुद्ध लिसिङ्मा मिङ्इम्मे। 8 तर चामाहा खाडे़ॽ कानिङ निवाहाङ्बेॽ लाघे़ॽनिबा। ए़ॽचामाबेॽसो कानिङ इमाङ्सो लिनिबा, चामाबेॽसो इमाङ्सो लिनिबा। 9 तर होसियार ले़टानिङे, हे़निङे़ॽ इमाङ्गो इमाङ चामाबेॽ कमजोर बिस्वासिजि पापबेॽ मे़सिॽमिरो। 10 इडोॽ कमजोर बिस्वासिजिडे़ॽ हे़निङ नुबानुङ मङे़हा लेमे निवा काप्खुबाजिडे़ॽ मुरतिमि मन्दिरबेॽ पेन्नुङ चामे़ॽनिङ्सिबॽआ खाङ्डोगुजिहोङ मुरतिबेॽ चेॽटिबॽआ थोक चामा नुये मिॽनुङ खोसो चामा मिम्बोक्निबा ? 11 मो कमजोर बिस्वासि निसा हे़ने़ए़ मो निवाडे़ॽ ले़ःॽमे़ॽ खो नासि लिये। खोमि लागिसो खिरिस्ट काप्सिङ्बेॽ बलि लिबॽआ ले़ये। 12 इडोॽ हे़निङे़ॽ बिस्वासबेॽ कमजोर निसामि बिस्वास फोःप्सेॽपॽआसे़ॽ खोमिनुङ खिरिस्टमि टेडिघरिक याॽमिडे़ॽ ले़ःॽमे पाप ले़न्डानुमे। 13 मोडोगे़ॽ के़ॽ चाबॽआ मोडोक्हा चामायाडे़ॽ कानिङ्हा कमजोर बिस्वासि निसा पापबेॽ सिॽमेन्डुङ्होङ के़ॽ इन्डोक्पेॽसो सा चासुङ्नि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.