१ कोरिन्थि 7 - याम्फुफुङ्सयामि टुम्बेॽ सिम्बॽआ खा 1 हागो के़ॽ हे़निङे़ॽ साप्पॽआ पत्राबेॽ “वडाङ्पसाडे़ॽ मेॽनामिॽ के़क्नोॽ ए़के़क्मा नुबा लिये” लुबॽआ खामि टुम्बेॽ इःनुङे। 2 तर मोबेॽ बेॽलो बेभिचार लिबॽआसे़ॽ चोप मेॽनामिॽमि खोम बनिबा काप्टुरो, मोडोक्नोॽ चोप वडाङ्पसामिसो खोमबनिमा काप्टुरो। 3 वडाङ्पसे़ॽ ले़ःॽमे योम्बोक येॽपेसुरो, मेॽनामिॽडे़ॽसो ताङ्बामि योम्बोक पुरा ले़टुरो, इडोॽ निप्पाङेॽनोॽ खोजि टाङ्बा पाप्मिहा पिघुसे़ॽचुमिरो। 4 हागो बनिमाडे़ॽ टाङ्बामि हिङाबेॽ अधिकार ले़टुनि, तर बनिबाडे़ॽ खोमि हिङाबेॽ अधिकार ले़न्डुए। मोडोक्नोॽ बनिबामि हिङा खोमि ने़ॽनि तर बनिमामि अधिकार लिये। 5 बनिबा बनिमामि रुम्बेॽ इक्कोसे़ॽ हाइकोसे़ॽ लुबॽआ खसिमा खे़ये। पारथना ले़ःॽमाबेॽ ओः पेनानिङ्होङ्सो बनिबा बनिमा सल्लहा ले़ःॽनुङ्नोॽ पेम्मे, मोबा हाइखा बेलाबेॽ सोरिनोॽ पेनानिङे। ने़ॽनिहोङ निवा मे़हुप्हेमाबेॽ सैतानडे़ॽ रेम्एङ्इये। 6 के़ॽ इगो खा हे़निङे़ॽ ले़ःॽमानोॽ खे़ये लुबॽआ ने़ॽनि, तर इडोॽ ले़ःॽमाबेॽ नुबा लिये चाहिँ लुबॽआ। 7 चोप याॽमि काडोक्नोॽ फुङ्सया मे़ले़ःॽलेॽ पेनामिहोङ नुबा मिॽइनुङे। तर चोप याॽमिडे़ॽ निवाहाङ्बाङ खोरो- खोराहा बरदान चुप्मिन्डुजे। इक्कोसे़ॽ इक्को खालमा बरदान मोबा हाइकोसे़ॽ हाइको खालमा बरदान चुप्मिन्डुजे। 8 हागो फुङ्सया मे़ले़ःॽखुबानुङ राङ्मिॽमाजि लुनिम्ने़। हे़निङ काडोक्नोॽ फुङ्सया मे़ले़ःॽरेॽ पेम्मा नुबा लिये। 9 तर माहाजिडे़ॽ टाङ्बामि निवा हुप्हेसानुम्निहोङ फुङ्सया ले़ःॽमानोॽ चुये। इन्ढोङ्होङ माहाजि सानिङ तिरसनाबेॽ पेम्माबाङ्गो बोरु फुङ्सया ले़ःॽमा नुबा लिये। 10 फुङ्सया ले़ःॽपेबॽआजि के़ॽ आग्या पिनिम्ने़, तर इगो काङ्मि आग्या ने़ॽनिबा, परभुमि आग्या ले़ये। बनिमाडे़ॽ टाङ्बामि बनिबाबाङ ए़हाघे़ॽमिरो। 11 बनिमा हाघे़ॽनुङ पेङ्होङ्सो हाइकोनुङ फुङ्सया मे़ले़टुरो, बरु खोमि बनिबानुङ्नोॽ टोङ्जारो। मोबा बनिबाडे़ॽसो खोमबनिमा मे़लेडुरो। 12 के़ॽ हाइखाजिसो लुनिम्ने़, इगो खा परभुबाङ्गो ने़ॽनिबा, काबाङ्ए ले़ये, तर खिरिस्टबेॽ बिस्वास ले़ःॽखुबा इक्को निसामि चाहिँ अबिस्वासि बनिमा टुये, खो खोनुङ्नोॽ पेम्मा मिङ्इहोङ मो निसे़ॽ टाङ्बामि बनिमा ए़लेॽपेमे। 13 मोडोक्नोॽ खिरिस्टबेॽ बिस्वास ले़ःॽखुबा नानुसामि अबिस्वासि बनिबा काप्मिन्डुएहोङ, खो खोमि बनिमानुङ्नोॽ पेम्मा मिङ्इहोङ बनिमाडे़ॽ एलेॽमे। 14 इन्ढोङ्होङ अबिस्वासि बनिबा बिस्वासि बनिमाबाङ पबित्रा लिये, मोडोक्नोॽ अबिस्वासि बनिमा बिस्वासि बनिबाबाङ पबित्रा लिये। इडोॽ मे़लिबॽआहोङ गो माहाजिमि पसाजि असुद्ध लिसामे। तर माहाजिगो पबित्रा लिटामे। 15 तर अबिस्वासि बनिबा अथबा बनिमा चाहिँ हाघे़ॽमा मिङ्इहोङ हाघे़ॽमेॽटानुमे। इडोक्मा बेलाबेॽ चाहिँ माहा बिस्वासि निसानुङ नानुसाजि फुक्का लिन्जे। निवाहाङ्डे़ॽको हे़निङ सान्तिमि लागि से़ङ्इटे़। 16 असे़ॽ इमा लेमा, बिस्वासि बनिमाडे़ॽ टाङ्बामि अबिस्वासि बनिबा अथबा बिस्वासि बनिबाडे़ॽ टाङ्बामि अबिस्वासि बनिमा येसुबेॽ हिङ्मेहेन्डुएन्डे ? 17 परभुडे़ॽ से़न्माबेॽ हे़निङ इन्डोक ले़टानिङ्नुङ इन्डोक्मा बेलाबेॽ निवाहाङ्डे़ॽ से़नानिङ हे़निङ चोप मोडोक्नोॽ हिक्सानिङे। के़ॽ चोप बिस्वासिजि इःॽपॽआ खासो इगोनोॽ ले़ये। 18 असा याॽमि निवाहाङ्डे़ॽ के़ःॽमा याक्लोनोॽ खतना ले़ःॽपेबॽआ ले़येहोङ खोसे़ॽ खतना मे़ॽनिङ्मा लिमा मे़योगुरो। मोबा असा निवाहाङ्डे़ॽ के़ःॽमाबेॽ खो खतना मे़ले़ःॽपॽआ ले़टे़होङ्सो मो याॽमिडे़ॽ खतना ले़ःॽमा मे़योगुरो। 19 इन्ढोङ्होङ खतना लिमा अथबा ए़लिमा इमाङ्सो ने़ॽनि। तर निवाहाङ्मि आग्याडे़ॽ लुबॽआडोॽ ले़ःॽमा चाहिँ बेॽए खा ले़ये। 20 निवाहाङ्डे़ॽ चोप के़ःॽमाबेॽ इन्डोक्हा ले़टामे, चोप मोडोक्हाजिनोॽ लिमिरो। 21 निवाहाङ्डे़ॽ के़ःॽमाबेॽ हे़न सेउते ले़टाहोङ इमाङ्सो ए़मिन्ने, तर हे़न फुक्का लिडोॽइयेहोङ फुक्का लिसे। 22 इन्ढोङ्होङ सेउते चाहिँ परभुमि फुक्का याॽमि लिमामि लागि के़ए़टे़, मोडोक्नोॽ फुक्का याॽमि चाहिँ खिरिस्टमि सेउते लिमामि लागि से़न्इटे़। 23 निवाहाङ्डे़ॽ मोल फोङ्नुङ हे़निङ इम्बॽआ ले़ये। मोडोगे़ॽ याॽमिमि सेउते ए़ॽलिसानिङे। 24 मोडोगे़ॽ वावानिसा नानुसाजि, हे़निङ इन्डोक्हा ले़ःॽमाबेॽ निवाहाङ्डे़ॽ के़ए़टे़ मोडोक्हानोॽ लिनुङ निवाहाङ्नुङ पेनानिङे। 25 फुङ्सया मे़ले़ःॽपॽआ राङ्मिॽ पिच्छाजि पिमाहा आग्या परभुडे़ॽ का इमाङ्सो मे़म्पिडिॽ। तर परभुमि नम्नावाबाङ चुप्पॽआ निवाबाङ बिस्वासनुङमा सल्लाह पिनिम्ने़। 26 हागोए दुःख मिॽमाबेॽ इन्डोॽ ले़न्डानिङे, मोडोक्नोॽ पेम्मा नुबा लिये। 27 फुङ्सया ले़पेटानिङेहोङ टाङ्बामि बनिमानुङ ए़हाघडानिङे। हागोरो फुङ्सयानोॽ मे़ले़ःॽटिॽटानिङ्होङ फुङ्सयामि बन्धनबेॽ सिॽमा ए़ॽयोगानिङे। 28 हे़निङे़ॽ फुङ्सया ले़टानुमहोङ्सो पापगो लिनिबा। मोडोक्नोॽ फुङ्सया मे़ले़ःॽपॽआ मेॽनामिॽडे़ॽसो फुङ्सया ले़ःॽमाबेॽ पापगो सिॽनिबा। तर फुङ्सया ले़ःॽखुबाजिडे़ॽ बेॽलो खालहा खेः आङ्मा खे़ये। मोडोगे़ॽ के़ॽ हे़निङ इगोबाङ जोगबा ले़ःॽमा मिॽइनिम्ने़। 29 के़हा वावानिसानुङ नानुसाजि, हे़निङ लुनिम्ने़, परभुमि योम्बोक ले़ःॽमे बेला माॽआये, हागोएम्बाङ बनिमा काप्खुबाजि बनिमा मे़ङ्काप्खुबाजिडोक्नोॽ लिमिरो। 30 हाःप्खुबाजि दुःख मे़ॽसिटिडोॽ, यिचाघुबाजि मे़साप्थाङ्टिडोॽ लिनुङ पेनानिङे। टाङ्बे़ॽ इन्जे़ॽपॽआ खासो टाङ्बामिडोॽ मे़लिरो। 31 मक्खाम्डेमबेॽहा थोकबेॽ बेॽलो निवा टिघुबाजि, माहा थोकबेॽ निवा मे़न्टिसुजिरो, इन्ढोङ्होङ इगो मक्खाम्डेम चान्डोनोॽ नासि लिघे़ये। 32 के़ॽ हे़निङ लुनिम्ने, चोप खालहा सुरता पिरबाङ ओः पेनानिङे। फुङ्सया मे़ले़ःॽपॽआ याॽमिडे़ॽ इन्डोॽ ले़ःॽमाबेॽ परभु साप्थाङ्इये लुनुङ मो खामिरेॽ सुरता ले़न्डुए। 33 फुङ्सया ले़ःॽपॽआ याॽमिडे़ॽ इन्डोॽ खोमबनिमा साप्थाङ्मेॽमे़ लुनुङ मक्खाम्डेमबेॽहा खाबेॽनोॽ निवा टिन्डुए। 34 इडोक्मा याॽमिमि निवा निच्चिलाम खे़ये। मोडोक्नोॽ फुङ्सया मे़ले़ःॽपॽआ मेॽनामिॽडे़ॽ खोमि हिङानुङ निवा चोप परभुमिनोॽ लुनुङ मो खाबेॽ निवा टिन्डुए। तर फुङ्सया ले़ःॽपॽआ मेॽनामिॽडे़ॽ चाहिँ टाङ्बामि बनिबा इन्डोॽ साप्थाङ्मेॽमे़ लुनुङ मक्खाम्डेमबेॽहा खाबेॽ निवा टिन्डुए। 35 के़ॽ इगो खा हे़निङ्मिनोॽ नुबामि लागि लुमे़ॽनिङ्सिनुङे। के़ॽ हे़निङ फुङ्सया ए़ले़टानुमे लुनुङ से़क्पॽआ ने़ॽनि। तर हे़निङे़ॽ नुबा योम्बोक ले़टानुमे मोबा हे़निङ्मि चोप निवा परभुबेॽ टिहेसानुमे लुमा योॽइटुङे। 36 इक्को याॽमिडे़ॽ टाङ्बानुङ साक्खि राःप्पॽआ राङ्मिॽ पिच्छानुङ मङे़ॽमा बेबहार लिबॽआ मिॽइन्डुएनुङ, मो पिच्छानुङ सोरि पेम्मामि सानिङ तिरसनाबेॽ पेङ्इयेहोङ खोसे़ॽ फुङ्सया ले़ःॽहेन्डुए। इडोॽ ले़ःॽमाबेॽ पाप लिनिबा। खोजिडे़ॽ फुङ्सया ले़ःॽमानोॽ खे़ये। 37 तर असामिसो करबेॽ मे़सिॽलेॽ मो याॽमि टाङ्बे़ॽनोॽ फुङ्सया ले़ःॽङानि लुनुङ पक्का ले़ःॽनुङ टाङ्बामि निवा हुप्हेन्डुहोङ मो साख्खि राःप्पेबॽआ राङ्मिॽ पिच्छा फुङ्सया ले़ःॽमा मिॽटुनिहोङ मो नुबा लिये। 38 मोबा असे़ॽ मो साक्खि राःप्पेबॽआ राङ्मिॽ पिच्छा फुङ्सया ले़न्डुए, मोसे़ॽ नुबानोॽ ले़न्डुए, तर फुङ्सयानोॽ मे़ले़टुहोङ छना नुबा लिये। 39 बनिबा हिङ्रो हाइकोनुङ फुङ्सया ले़टोक्टुनिबा। तर बनिबा सिघे़ॽहोङ खोसे़ॽ नेन्जाबॽआ असा याॽमिनुङ्होङ्सो फुङ्सया ले़हेन्डुए। तर मो याॽमि चाहिँ परभुबेॽ बिस्वास ले़ःॽखुबानोॽ लिमा खे़ये। 40 तर मो मेॽनामिॽ फुङ्सया मे़ले़ःॽरेॽसो पेङ्हेयेहोङ खो छना बेॽलो साप्थाङ्मानुङ पेङ्इये, के़ॽ लुबॽआ इगो खा निवाहाङ्मि निवाबाङ लेम्बॽआ लुनुङ के़ॽ मिॽइनुङे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.