१ कोरिन्थि 6 - याम्फुबिस्वासिजिमि रुम्बेॽ खिमाचुमा 1 हे़निङ्मि रुम्बेॽ खिमा चुमामि खा टोङ्सिॽ निवाहाङ्मि पबित्रा याॽमिजिबेॽ मे़ङ्खे़ॽनुङ, बिस्वास मे़ले़ःॽपॽआ अधरमि याॽमिजिबेॽ खे़ॽमे आट ले़न्डानुमे ? 2 खिरिस्टमि याॽमिजिडे़ॽनोॽ मक्खाम्डेममि न्याय ले़न्डुजे लुमे खा इमा हे़निङे़ॽ लेसानुम्ने ? मक्खाम्डेममिनोॽ न्याय ले़ःॽखुबाजिडे़ॽ इडोक्हा ए़द्रिहा खिमाचुमा चाहिँ टोङ्हेसुजिने ? 3 कानिङे़ॽ थाङ्सिरि दुतजिमिसो न्याय ले़न्डुङ्मे लुमे खा हे़निङे़ॽ लेसानुम्ने ? मोडोक्होङ इगो हिङ्मवा हिक्सिरो लिहा खागो इमाङ्सो ने़ॽनि। 4 मोडोक्हा खिमाचुमा इन्ढोङ माहा याॽमिजिमि पोम्बेॽ युङ्इन्डानुमे ? माहाजिगो बिस्वासिजिडे़ॽ इमाङ्सो मिॽटुजिने। 5 हे़निङ इगो खाबाङ ङेसिमा खे़ये। हे़निङ्मि रुम्बेॽहा खिमाचुमा खा टोङ्हेखुबा हे़निङ्मि रुम्बेॽ इक्को निवादाङ्बासो माॽआये ? 6 इक्को बिस्वासि निसानुङ हाइको निसा खिमे, मोबाङ्सो मो खा टोङ्सिॽ अबिस्वासि याॽमिबेॽ खे़ॽमे ? 7 हे़निङ्मि रुम्बेॽ खिमाचुमा लिमानोॽ हे़निङ्मि लागि ङेसिमारोमा खा लिये। हे़निङे़ॽ अन्याय आङ्मानोॽ नुबा लिसे़। बोरु हे़निङे़ॽ हेलानोॽ आङ्मा चुये। 8 तर हे़निङ टाङ्बा टाङ्बानोॽ अन्याय लेन्डानुमे, टाङ्बामि बिस्वासि वावानिसाजिनोॽ रेम्जान्डानुमे। 9 अधरमिजि निवाहाङ्मि राज्यबेॽ पे़खे़ॽटोक्मिने लुमे खा हे़निङे़ॽ लेसानुम्ने ? आम्निटाङ्बे़ॽ टाङ्बानोॽ धोका ए़ॽपिसानुमे। छाडा योम्बोक ले़ःॽखुबाजि, मुरतिमि सम्माङ ले़ःॽखुबाजि, बेभिचारिजि, वडाङ्पसाडे़ॽ वडाङ्पसानुङ बेभिचार ले़ःॽखुबाजि, 10 खुसुबाङ्जि, खिक्तुबाङ्जि, सेॽखे़ॽखुबाजि, हाइखामि खा इःजाघुबाजिनुङ नाप्चाखुबाजिडे़ॽ थाङ्सिरिमि राज्यमि हक चुप्टुजिने। 11 हे़निङ इन्डोक जनाजि याक्लो इडोक्नोॽ ले़टानिङ। तर हागो हे़निङ पापबाङ पबित्रा चोखो लिटानिङे। निवाहाङ्डे़ॽ हे़निङ चोखो टोङ्इटे़। परभु येसु खिरिस्टमि निङ्बेॽ निवाहाङ्मि पबित्रा होङ्निवाबाङ हे़निङ निवाहाङ्मि पोम्बेॽ धरमि लिटानिङे। 12 इन्डोक जनाडे़ॽ इःन्डुजे, “के़ॽ इमाङ ले़ःॽमासो नुये।” तर चोप खाडे़ॽ हे़निङ्मि नुबा लिनिबा। के़ॽसो लुहेसुङ, “के़ॽ इमा ले़ःॽमासो नुये।” तर का इमाङ खामिसो सेउते लिनोॽलिङानि। 13 “चामाहा खा रुङ्मामि लागि ले़ये, रुङ्मा चामाहा खामि लागि ले़ये।” याॽमिजिडे़ॽ लुन्डुजे इगो खा चाइबमा ले़ये, तर निवाहाङ्डे़ॽ इगो निच्चिनोॽ नास ले़न्डुए। याॽमिमि हिङा बेभिचारमि लागि ने़ॽनिबा, परभुमि योम्बोक ले़ःॽमामि लागि ले़ये, मोबा हिङामि लागि पाप्मिहा चोप खा परभुडे़ॽनोॽ पोरोक्पेये। 14 निवाहाङ्डे़ॽ परभु सिघे़ॽपॽआबाङ हिङ्बोगु मोबा खोमिन्नोॽ सक्तिडे़ॽ कानिङ्सो हिङ्बोक्इये। 15 हे़निङ्मि हिङा खिरिस्टमि अङ्ग ले़ये लुमे खा हे़निङे़ॽ लेसानुम्ने ? मोडोक्होङ इमा के़ॽ खिरिस्टमि अङ्ग याङ्घे़ॽनुङ बेस्यामि अङ्गनुङ ठुमे ? इडोॽ इन्डोक्पेॽसो ले़ःॽमानोॽ फे़न्निबा। 16 बेस्याबेॽ खे़ॽखुबाजि बेस्यामि हिङानुङ ठुम्मे लुमे खा इमा हे़निङे़ॽ लेसानुम्ने ? धारमिक नेॽचिराडे़ॽ इडोॽ लुटे़, “मो निप्पाङ इक्कोनोॽ हिङा लिन्जे।” 17 तर खिरिस्टनुङ टोङ्खुबा चाहिँ खोनुङ होङ्निवाबेॽ इक्कोनोॽ लिये। 18 बेभिचार योम्बोकबाङ ओःनोॽ पेनानिङे। हाइखा पाप योम्बोक ले़ःॽखुबा याॽमिडे़ॽ टाङ्बामि हिङामि बिरोधबेॽ पाप ले़टुनिबा, तर बेभिचार ले़ःॽखुबा याॽमिडे़ॽ चाहिँ टाङ्बामिनोॽ हिङामि बिरोधबेॽ पाप ले़न्डुए। 19 इमा हे़निङ्मि हिङा पबित्रा होङ्निवामि मन्दिर ले़ये लुमे खा हे़निङे़ॽ लेसानुम्ने ? निवाहाङ्डे़ॽ पिबॽआ पबित्रा होङ्निवानोॽ हे़निङ्मि हिङाहोङ्सिॽयु पेङ्इये। हे़निङ टाङ्बानोक्सो हे़निङ्मि ने़ॽनिबा। 20 हे़निङ निवाहाङ्डे़ॽ मोल फोङ्नुङ इम्बॽआ ले़ये। मोडोगे़ॽ हे़निङे़ॽ टाङ्बामि हिङाडे़ॽ निवाहाङ्मि महिमा ले़टानुमे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.