१ कोरिन्थि 5 - याम्फु1 हे़निङ्मि रुम्बेॽ बेभिचारि योम्बोक लिटे़रो लुनुङ के़ॽ खेम्इटुङे। इडोक्को खिरिस्टबेॽ बिस्वासनोॽ मे़ले़ःॽपॽआ याॽमिजिडे़ॽसो ले़टुजिने। हे़निङ्मि रुम्बेॽ इक्कोसे़ॽको खोम से़ङ्मानोॽ खोमि ठाॽमा युङ्इटुरो! 2 तर हे़निङ्गो बेॽए रे़ङ्इन्डानिङ! हे़निङे़ॽको सोक ले़ःॽमा खडे़, मोबा इडोक्मा योम्बोक ले़ःॽखुबा हे़निङ्मि रुम्बेॽ ए़युक्सानुमे। 3 का हिङाबेॽ ओः टुङासो काङ्मि निवागो हे़निङ्नुङ्नोॽ टुये। का आक्कोबेॽनोॽ टुडिडोॽ अक्टोॽ ले़ःॽखुबा याॽमि परभु येसुमि निङ्बेॽ इन्डोक्मा दन्डा पिमा खे़ये लुनुङ के़ॽ मिॽपेटुङे। 4 इन्डोक्पेॽ हे़निङ कानिङ्मि परभु येसुमि निङ्बेॽ सुम्इन्डानिङे मोडोक्पेॽ काङ्मि निवासो हे़निङ्नुङ्नोॽ टुये, मोबा कानिङ्मि परभु येसुमि सक्ति मोबेॽ टुये। 5 हे़निङे़ॽ मो याॽमिमि पापि आनिबानि नासि लिरो लुनुङ सैतानमि हुकपेॽ पिमा खे़ये। मोडोॽ ले़ःॽमाबेॽ परभुमि याकपेॽ खोमि होङ्निवा चाहिँ हिङ्हेयेन्डे ? 6 हे़निङे़ॽ बेॽहा खा इःमा फे़न्निबा। ए़डे़ॽवा खमिरडे़ॽ बेॽलो खाॽमिनोॽ खमिर लिहा लुमे खा हे़निङे़ॽ लेसानुम्ने ? 7 हे़निङ चोङ लिमामि लागि याक्लोए खमिरडोक्मा खा राप्पेमा खे़ये। मोबा हे़निङ चइबानोॽ खमिर मे़एम्बॽआ खाॽमिडोॽ ले़न्डानिङे, इन्ढोङ्होङ कानिङ छुट्कारा पिघुबा थुमा खिरिस्ट कानिङ्मि लागि बलि लिबेटे़। 8 मोडोगे़ॽ कानिङे़ॽ छुट्कारामि चाड चामाबेॽ खमिरबाङ टोङ्बॽआ चरेपा ए़ॽचामा लुबॽआ चाहिँ बिस्वासि हिङ्मवाबेॽ मङे़हानुङ दुस्ट निवा खिनुङ ने़ॽनि, चाइबमानुङ पबित्रा लिमानुङ हिङ्मे़ लुबॽआ ले़ये। 9 के़ॽ साप्पॽआ नेॽचिराबेॽ हे़निङ बेभिचारि याॽमिजिनुङ लङ्गाम ए़ले़ःॽमे लुनुङ्नोॽ साप्पॽआ ले़टे़। 10 के़ॽ लुमायोक्पॽआ चाहिँ बिस्वास मे़ले़ःॽपॽआ बेभिचारिजि, खिक्तुबाङ्जि, मोबा ठगुवाजि, मुरतिमि सम्माङ ले़ःॽखुबाजिनुङ इन्डोक्पेॽसो लङ्गाम ए़ले़ःॽमे लुबॽआ ने़ॽनिबा, मोडोक्होङ्गो हे़निङ इगो मक्खाम्डेमबाङ्नोॽ खे़ॽपेमा खे़ये। 11 तर के़ॽ लुबॽआ चाहिँ बिस्वास ले़ःॽनुङ्सो बेभिचार ले़ःॽखुबा, खिक्तुबाङ, मुरतिमि सम्माङ ले़ःॽखुबा, याॽमि इःजाघुबा, सेॽखे़ॽखुबानुङ हाइखाजि रेम्जाखुबाजिमि टुम्बेॽकोरे लुबॽआ। इडोक्हा याॽमिजिनुङ्गो सोरि पेन्नुङ चासो ए़च्चासानिङे। 12 बिस्वास मे़ले़ःॽपॽआ याॽमिजिमि न्याय ले़ःॽमा के़ए़ योम्बोक ने़ॽनिबा। तर मन्डलिहोङ्सिॽहाजिडे़ॽ पापि योम्बोक ले़ःॽमाबेॽ हे़निङे़ॽ न्याय ले़ःॽमानोॽ खे़ये ने़ॽनेन्डे ? 13 बिस्वास मे़ले़ःॽपॽआ याॽमिजिमि न्यायगो निवाहाङ्डे़ॽनोॽ ले़न्डुए। तर धारमिक नेॽचिराडे़ॽ लुये “हे़निङ्मि रुम्बाङ दुस्ट योम्बोक ले़ःॽखुबा याॽमिजि यिक्पेसानुमे।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.