१ कोरिन्थि 4 - याम्फुएप्पा चोङ्साजिमि योम्बोक 1 मोबा हे़निङे़ॽ कानिङ खिरिस्टमि सेवाकनुङ निवाहाङ्मि लेमा छॽइये खा लुहेखुबा योम्बोकमि जिम्मा चुप्पॽआ याॽमि मिॽमा खे़ये। 2 योम्बोकमि जिम्मा चुप्पॽआ याॽमि चाहिँ बिस्वास ले़ःॽहेमारोमा लिमानोॽ खे़ये। 3 का हे़निङे़ॽ अथबा हाइखा अदालतडे़ॽ आप्टिक टिमिहोङ्सो सुरता ले़ःॽङानि, मोबा काङ्दाङ्बे़ॽसो टाङ्बामि न्याय ले़टुङ्नि। 4 काङ्टाङ्बामि आप्टिक के़ॽ लेसुङ्नि, तर मोसे़ॽ का चइबानोॽ आप्टिक मे़ॽनिङ्मागो लिङानि। का न्याय ले़ःॽखुबागो परभुनोॽ ले़ये। 5 मोडोगे़ॽ हे़निङे़ॽ असामिसो न्याय ए़ले़टानुमे, परभु मे़लेङ्रो हुक्सानुमे। खोसे़ॽ सेन्जुगुप्पेॽ चुम्युङ्बॽआ खा खाङ्मुन्डुहानुङ याॽमिमि निवाहोङ्सिॽयुहा खा खाङ्मुन्डुहा। मोबा चोप याॽमिजिडे़ॽ चुप्मा खे़ये ओहाक निवाहाङ्बाङ चुप्मिन्डुजे। 6 वावानिसानुङ नानुसाजि, हे़निङे़ॽ “धारमिक नेॽचिराडे़ॽ लुडिडोॽ” नुरोॽ लेसानुमे लुनुङ्नोॽ के़ॽ अपोल्लोसनुङ काङ्मि टुम्बेॽहा खा इःसाङ पत्राबेॽ साप्मिटुङे। हे़निङे़ॽ धारमिक नेॽचिराडे़ॽ लुडिडोक्नोॽ ले़टानुमे। मोबा हे़निङ असे़ॽसो इक्कोमि पक्छेबेॽ काङायोङ्बा लिनुङ हाइके हेला ए़ले़टानुमे। 7 असे़ॽ हे़निङ हाइखा याॽमिजिबाङ्सो बेॽए टोक्से़ ? इमा हे़निङ्नुङ टुहा चोप खा निवाहाङ्डे़ॽनोॽ हे़निङ पिबॽआ ने़ॽने ? मोडोक्होङ इन्ढोङ माहा चोप हे़निङ टाङ्बे़ॽ चे़ःॽपॽआडोॽ काङायोङ्बा रे़ङ्इन्डानिङे ? 8 हे़निङ पाप्मिहा चोप खा चुप्पेॽटानुम्रो ? हे़निङ टाङायोङ्बा लिबेटानिङेरो ? कानिङ मे़ॽनिङ्सो हे़निङ हाङ्बा लिटानिङ्रो ? चइबानोॽ हे़निङे़ॽ राज्य ले़ःॽपॽआहोङ्सो नुडे़, हे़निङे़ॽ राज्य ले़ःॽमाबेॽ कानिङ्सो हे़निङ्नुङ्नोॽ राज्य ले़टुङ्मेन्डे ? 9 इन्ढोङ्होङ के़ॽ इडोॽ मिॽइनुङे, निवाहाङ्डे़ॽ कानिङ एप्पा चोङ्साजि चाहिँ सिमे दन्डा चुप्नुङ सारोनोॽ दुःख पिसाङ सेॽनेबॽआ खाङ्जामामि युङ्बॽआ याॽमिजिडोॽ टोङ्इटे़, इडोॽ कानिङ मक्खाम्डेमबेॽहा याॽमिजिनुङ थाङ्सिरिदुतजिमि पोम्बेॽ तमासा लिटिङ्मे़। 10 कानिङ खिरिस्टमि सेवाक लिबॽआसे़ॽ याॽमिजिमि लागि उम्बरिङ लिटिङ्मे़, तर हे़निङ चाहिँ खिरिस्टबेॽ निवादाङ्बा लिटानिङे। कानिङ बोल मे़ॽनिङ्मा लिटिङ्मा, हे़निङ बोलियो लिटानिङे। कानिङ नेम्मा टोङ्इम्मे, तर हे़निङ सम्मान ले़म्मे। 11 आयुसो कानिङ चामा उङ्मा मे़ॽनिङ साक्मेन्जा ले़न्डिङ्मा, नाःक्खे़ॽपॽआ चेॽ चाङ्इटुङ्मा, कानिङे़ॽ मोःक्मा खेः आङ्इटुङ्मे, कानिङ्मि खिमसो माॽआये। 12 मोबा चामा उङ्मामि लागि कानिङ्मिनोॽ हुगे़ॽ योम्बोक ले़चान्डिङ्मा। हाइखाजिडे़ॽ कानिङ चापहिमाबेॽसो कानिङे़ॽ चाहिँ आसिस पिन्डुङ्मे। याॽमिजिडे़ॽ कानिङ चुङ्जामाबेॽसो आङ्इन्डुङ्मे। 13 कानिङ नेम्मा चुङ्माबेॽसो कानिङे़ॽ नुरोक्नोॽ यामुन्डिङ्मा, हागोरोसो कानिङ मक्खाम्डेमबेॽ योम्बोक मे़ॽनिङ्हा थोकनुङ इगोबेॽहा से़क्चिबाडोक्नोॽ लिटिङ्मे़। 14 हे़निङ नेम्मा चुङ्मामि लागि ने़ॽनि, के़ॽ नम्नम ले़ःॽपॽआ पिच्छाजिडोक्नोॽ अरति पिमामि इगो खा साप्मे़ॽनिङ्सिनुङे। 15 इन्ढोङ्होङ खिरिस्टबेॽ हे़निङ्मि बेॽलो बेॽलो अगुवाजि टुमिहोङ्सो, तर बेॽलो पाबाजिगो माॽआम्मे। तर सुसमाचार खेम्मेॽनुङ येसु खिरिस्ट लेमाराप्खुबा का हे़निङ्मि पाबा लिटिङे। 16 मोडोगे़ॽ काङ्मि हिङ्मवा खाङ्नुङ चिनानुमे लुनुङ बिन्ति ले़ःॽनिम्ने़। 17 मोडोगे़ॽ के़ॽ तिमोथि हे़निङ्बेॽ पाङ्इटुङे। खो परभुबेॽ के़ॽ नम्नम ले़ःॽपॽआ बिस्वासिनुङ्मा पसा ले़ये। के़हा चोप ठाउँबेॽनुङ खिरिस्टमि चोप मन्डलिबेॽ इःॽपॽआडोक्नोॽ खिरिस्टबेॽ काङ्मि हिङ्मवा इन्डोॽ ले़ये लुमे चोप खा हे़निङ खोसे़ॽ इःबेये। 18 हे़निङ्बेॽ इन्डोक जनाजिडे़ॽ चाहिँ हागो का आक्कोबेॽ लेन्निबा मिॽनुङ बेॽए रे़ङ्इम्मिरो। 19 परभुडे़ॽ का आक्कोबेॽ पाङ्मा मिॽङाहोङ चान्डोनोॽ हे़निङ्बेॽ लेङ्इङे़, मोबा माहा बेॽहा रे़ङ्घुबाजिमि खा ने़ॽनि, तर खोजिमि सक्ति चाहिँ इमाङ ले़येले़ लुनुङ खाङ्इनुङे। 20 इन्ढोङ्होङ निवाहाङ्मि राज्य चाहिँ खाबेॽ ने़ॽनि, सक्तिडे़ॽ ले़ःॽपॽआ योम्बोकपेॽ खाङ्मुये। 21 हे़निङे़ॽ इमाङ नेन्जान्डानुमे ? का टोङ्इरा याङ्नुङ लेम्मेन्डे ? ए़डेम्मा लिघुबा निवा मोबा नम्नमनुङ लेम्मे़ ? |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.