१ कोरिन्थि 3 - याम्फुनिवाहाङ्मि सेवाकजि 1 होउ वावानिसानुङ नानुसाजि, हे़निङ्नुङ यामुमाबेॽ आत्मिक याॽमिजिनुङ्डोॽको का मे़यामुहेसिङ। तर मक्खाम्डेमबेॽहा याॽमिजि अथबा खिरिस्टबेॽ ओङे़क बिस्वासिजिनुङ यामुबॽआडोॽ यामुमा सिॽटा। 2 मोडोगे़ॽ के़ॽ हे़निङ छॽइहा चामाया ने़ॽनि डुडु हिङ्मा खडा, इन्ढोङ्होङ हे़निङे़ॽ छॽइहा चामाया खा याक्लोसो मे़न्चाहेसानुम, मोबा हागोसो चाहेसानुम्नि। 3 हे़निङ हागोसो पापि आनि बानिमि अधिनबेॽ टुघुबा याॽमिजिडोॽ ले़न्डानिङे, मोबा हे़निङ्मि रुम्बेॽ चेजेवानुङ खिमाचुमा ले़न्डानिङ। मोडोगे़ॽ हे़निङ मक्खाम्डेमबेॽहा याॽमिजिडोॽ ले़ःॽसिन्डानिङे ने़ॽनेन्डे ? 4 इन्ढोङ्होङ हे़निङ इक्कोसे़ॽ “का पावलमि” हाइकोसे़ॽ “का चाहिँ अपोल्लोसमि” लुनुङ मक्खाम्डेमबेॽहा याॽमिजिडोॽ कान्डानिङ्होङ्गो मक्खाम्डेमबेॽहा याॽमिजिडोॽ मे़लिसानिङे ? 5 अपोल्लोस असाडे ? पावल असाडे ? काजिङ निप्पाङ्नोॽ परभुमि योम्बोक ले़ःॽखुबा सेवाक ले़न्जिङे, मोबा हे़निङ बिस्वासबेॽ कोघुबा ले़न्जिङे। परभुडे़ॽनोॽ पिबॽआ योम्बोक काजिङेॽ ले़न्जुङ्मा। 6 के़ॽ चरि रिडुङ, अपोल्लोसडे़ॽ योङा एन्डु, तर वाबुक्खुबा निवाहाङ्नोॽ ले़ये। 7 मोडोगे़ॽ रिःॽखुबानुङ योङा ए़ङ्घुबा निप्पाङ्नोॽ बेॽए ने़ॽनि, तर वाबोक्मेॽखुबा निवाहाङ चाहिँ बेॽए ले़ये। 8 रिःॽखुबानुङ योङा ए़ङ्घुबा इक्कोनोॽ ले़न्जे। निवाहाङ्डे़ॽ चोपजि टाङ्बा टाङ्बे़ॽ ले़ःॽपॽआ योम्बोकमि इनाम पिन्डुजे। 9 इन्ढोङ्होङ कानिङ चाहिँ निवाहाङ्मि योम्बोक ले़ःॽखुबा सेवाकजि ले़न्डिङ्मा, हे़निङ चाहिँ निवाहाङ्मि रोपा ले़न्डानिङे, मोबा हे़निङ मन्दिर ले़न्डानिङे। 10 निवाहाङ्डे़ॽ का पिबॽआ अनुग्रहाडे़ॽ ले़ःॽमे़ॽ सिपालु करमिडे़ॽ गारो सोक्टिडोॽ के़ॽ खिममि जग एन्डुङ। मोबा हाइखाजिडे़ॽ मो जगसोक्पेॽ गारो सोक्खे़न्डुजे, तर माहा खिम आङ्खुबाजिडे़ॽ इन्डोॽ आङ्घे़ॽमा खे़ये लुमे खाबेॽ नुरोॽ निवा टिमा खे़ये। 11 इन्ढोङ्होङ मो जग चाहिँ येसु खिरिस्ट ले़ये। खोबाङ हाइखा असे़ॽसो हाइको जग ए़ङ्हेसुजिनि। 12 इगो जगसोक्पेॽ आढा याॽमिडे़ॽ सुना, सिसे़ङ अथबा बेॽलो मोल सिॽइये पत्थर टिनुङ खिम टोङ्इन्डुजे। हाइखाजिडे़ॽ सिङ्बु, रिङ अथबा पराल टिनुङ खिम टोङ्इन्डुजे। 13 तर चोप याॽमिजिमि नुबानुङ मङे़हा योम्बोक न्यायमि याकपेॽ निवाहाङ्डे़ॽ जाँच ले़न्डुहा। माहाजिडे़ॽ ले़ःॽपॽआ योम्बोक इन्डोॽ ले़ये लुनुङ मिबाङ जाँच लिहा। 14 याॽमिडे़ॽ मो जगसोक्पेॽ टोङ्बॽआ योम्बोक मिबेॽ युङ्नुङ जाँच ले़ःॽमाबेॽ खरनि मे़लिहोङ मोसे़ॽ इनाम चुप्मिन्डुए। 15 मो याॽमिमि योम्बोक मिबेॽ हिॽखे़ॽहोङ मोसे़ॽ चुप्मे इनाम मे़चोबेन्डुए, तर खो चाहिँ मिबाङ लेॽखे़ॽटिडोॽ हिङ्इये। 16 इमा हे़निङ निवाहाङ्मि मन्दिर ले़न्डानिङे मोबा खोमि होङ्निवा हे़निङ्बेॽ पेङ्इये लुमे खा लेसानुम्ने ? 17 असे़ॽ निवाहाङ्मि मन्दिर नासि ले़न्डुहोङ निवाहाङ्डे़ॽसो खो नास ले़न्डुए। इन्ढोङ्होङ निवाहाङ्मि मन्दिर पबित्रा ले़ये, मो मन्दिर हे़निङ्नोॽ ले़न्डानिङे। 18 असे़ॽसो टाङ्बा मे़रेम्डेडुरो। हे़निङ्बेॽ असे़ॽ इगो मक्खाम्डेमबेॽ टाङ्बा निवादाङ्बा मिॽइन्डुए, खो चाइबमा निवादाङ्बा लिमामि लागि उम्बरिङ्डोॽ लिमा खे़ये। 19 इन्ढोङ्होङ मक्खाम्डेममि निवा निवाहाङ्मि पोम्बेॽ उम्बरिङ खा लिये। धारमिक नेॽचिराबेॽ इडोॽ साप्पॽआ ले़ये, “निवाहाङ्डे़ॽ मक्खाम्डेमबेॽहा निवादाङ्बाजि खोजिमि चेन्दुबा खाबेॽनोॽ रेम्इन्डुजे।” 20 धारमिक नेॽचिरामि हाइको ठाउँबेॽ इडोॽ साप्पॽआ ले़ये, “निवादाङ्बाजिमि निवा इमाङ्सो ने़ॽनिबा लुनुङ परभुडे़ॽ लेन्डुए।” 21 मोडोगे़ॽ असे़ॽसो याॽमिजिडे़ॽ ले़ःॽहेमे योम्बोकपेॽ काङायोङ्बा ए़लिमिरो। इन्ढोङ्होङ चोप थोक निवाहाङ्बाङ्नोॽ हे़निङे़ॽ चुप्मिटानुमे, 22 पावलहोङ्सो, अपोल्लोसहोङ्सो, केफासहोङ्सो, मक्खाम्डेम, हिङ्मवा अथबा सिमा, आइ अथबा वागिया चोप हे़निङ्मिनोॽ ले़हा। 23 मोबा हे़निङ चाहिँ खिरिस्टमि ले़न्डानिङ, खिरिस्ट चाहिँ निवाहाङ्मि ले़ये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.