१ कोरिन्थि 2 - याम्फु1 होउ वावानिसानुङ नानुसाजि, हे़निङ निवाहाङ्मि लेमा छॽइये खा खेम्मेॽसिॽ लेम्माबेॽ का बेॽए रे़ङ्मानुङ चेन्दुबा खा इःमानुङ मे़लेस्सिङ। 2 इन्ढोङ्होङ हे़निङ्नुङ टुमाबेॽ के़ॽ येसु खिरिस्ट मोबा खो काप्सिङ्बेॽ सिबॽआ खाबाङ हाइखा इमाङ खासो इःमा मे़मिॽटुङ। 3 का हे़निङ्बेॽ लेम्माबेॽ कमजोर ले़टिङानुङ किस्सिमे़ॽ योङ्मानुङ लेस्सिङ। 4 के़ॽ अरतिनुङ परचार ले़ःॽमाबेॽ चेन्दुबानुङ बेॽहा बेॽहा निवादाङ्बा खा मे़इःसुङ, तर के़ॽ परचार ले़ःॽपॽआ खा चाइबमा ले़ये लुनुङ पबित्रा होङ्निवामि सक्ति खाङ्मुसुङ। 5 मोडोगे़ॽ हे़निङ्मि बिस्वास याॽमिमि निवानुङ चेन्दुबा खाबेॽ ने़ॽनि, तर निवाहाङ्मि सक्तिबेॽ युङ्इटानुमे। 6 मोडोॽसो कानिङ बिस्वासबेॽ पाको याॽमिजिनुङ यामुमाबेॽ निवादाङ्बा खानुङ यामुन्डिङ्मा, तर मो इगो युगमि निवा ने़ॽनि, मोबा इगो युगमि हाङ्बाजिमि निवासो ने़ॽनि। राज्य ले़ःॽखुबा हाङ्बाजि इक्याक नासि लिघे़म्मे। 7 बोरु निवाहाङ्मि असे़ॽसो मे़लेबॽआ निवादाङ्बा खा कानिङे़ॽ परचार लेन्डुङ्मा। इगो खा याॽमिजिबाङ चुम्बॽआ ले़टे़। निवाहाङ्डे़ॽ मो खा मक्खाम्डेम टोङ्मा याक्लोबाङ कानिङ्मि आदरमि लागि पोरोक्पेॽटा। 8 इगो युगबेॽहा हाङ्बाजिडे़ॽ मो खा मे़लेसुजि। खोजिडे़ॽ लेबॽआ ले़टाहोङ महिमा पिमा खे़ये परभु काप्सिङ्बेॽ मे़ङ्किङ्नेसुजि होला। 9 तर धारमिक नेॽचिराबेॽ इडोॽ साप्पॽआ ले़ये, “याॽमिजिमि मिगे़ॽ मे़ङ्खाङ्बॽआ, ने़ए़कडे़ॽ मे़ङ्खेम्बॽआ, मोबा निवाबेॽ मे़मिॽपॽआ खानोॽ निवाहाङ्डे़ॽ खो नम्नम ले़ःॽखुबा याॽमिजिमि लागि पोरोक्युङ्इटुहा।” 10 निवाहाङ्डे़ॽ कानिङ्मि लागि पबित्रा निवाबाङ मो खा खाङ्मुटे़। इन्ढोङ्होङ पबित्रा होङ्निवाडे़ॽ चोप खा योॽइन्डुहा, निवाहाङ्मि गहिरो गहिरो खासो योॽइन्डुहा। 11 याॽमिमि निवाहोङ्सिॽयु इमाङ इमाङ खा टुहा, खोमदाङ्बे़ॽरेॽ लेन्डुहा। मोडोक्नोॽ निवाहाङ्डे़ॽ मिॽपॽआ चोप खा खोमि होङ्निवाडे़ॽरेॽनोॽ लेन्डुहा। 12 कानिङे़ॽ मक्खाम्डेमबेॽहा निवादाङ्बा खा ने़ॽनि, तर निवाहाङ्डे़ॽ पिमा मिॽनुङ पिबॽआ चोप खा लेमामि लागि खोमि पबित्रा होङ्निवा चुप्मिटुङ्मे। 13 मोडोगे़ॽ कानिङे़ॽ इःॽपॽआ खा याॽमिजिमि निवाडे़ॽ इःॽपॽआ ने़ॽनि, तर पबित्रा होङ्निवाडे़ॽ इःॽपॽआडोॽ कानिङे़ॽ होङ्निवामि चाइबमा खा नुरोॽ इःन्डुङ्मे। 14 हाम्बे याॽमिबेॽ निवाहाङ्मि होङ्निवा माॽआये, मोसे़ॽ निवाहाङ्मि होङ्निवाबाङ्ए खाबेॽ बिस्वास ले़टुनि, इन्ढोङ्होङ खोमि लागि मो उम्बरिङ खा लिये। मोसे़ॽ माहा खा लेहेसुनिबा, मोडोक्हा खागो पबित्रा होङ्निवामि निवाबाङ्रेॽनोॽ लेहेहा। 15 निवाहाङ्मि होङ्निवा काप्खुबा याॽमिडे़ॽ चाहिँ इमाङ खाहोङ्सो नुरोॽ मिॽनुङ जाँच ले़ःॽहेन्डुए, तर खो असे़ॽसो जाँच ले़ःॽहेसुजिने। 16 इन्ढोङ्होङ धारमिक नेॽचिराबेॽ साप्पॽआ ले़ये, “परभुमि निवा असे़ॽ लेहेन्डुए मोबा असे़ॽ खो इःॽहेन्डुए ?” तर कानिङे़ॽ चाहिँ खिरिस्टबाङ्ए निवा चुप्मिटुङ्मे़। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.