१ कोरिन्थि 15 - याम्फुयेसु सिघे़ॽपॽआबाङ हिङ्बोक्पॽआ 1 हागो वावानिसानुङ नानुसाजि, के़ॽ हे़निङ खेम्मेॽपॽआ सुसमाचारमि टुम्बेॽ हागोसो मिडानुमे लुमा मिॽनिम्ने़। हे़निङे़ॽ खेम्बॽआ सुसमाचारबेॽ बिस्वास ले़टानुमनुङ मो खाबेॽनोॽ हे़निङ टुन्डानिङे। 2 मो सुसमाचारबाङ हे़निङे़ॽ छुट्कारा चुप्मिन्डानुमे। के़ॽ हे़निङ खेम्मेॽपॽआ सुसमाचारबेॽ सानिङ बिस्वास ले़टानुमहोङ मोसे़ॽ हे़निङ सानिङ हिङ्इन्डानिङे। ने़ॽनिहोङ्गो हे़निङ्मि बिस्वास योम्बोक मे़ॽनिङ्मा लिये। 3 के़ॽ चुप्पॽआ इगो चोप्पाङ बेॽए खानोॽ हे़निङ पिबेनिम्ने़। मो खा लुबॽआ धारमिक नेॽचिराडे़ॽ लुडिडोॽ खिरिस्ट कानिङ्हा पापमि लागि सिसा। 4 खो येःॽमाबेॽ युक्सुजि, धारमिक नेॽचिराबेॽ लुडिडोॽ निवाहाङ्डे़ॽ सिघे़ॽपॽआबाङ सुम याकपेॽ हिङ्बोगु। 5 खो पत्रुसनुङ मोबा ए़क्साङ इक्पोङ जना एप्पा चोङ्साजिनुङ खाङ्मुसा। 6 मोबा ए़क्साङ खोबेॽ बिस्वास ले़ःॽखुबाजि ङाउम सयेबाङ्सो बेॽलो याॽमिजिमि पोम्बेॽ इक्खेॽपेॽ खाङ्मुसा। माहाजिबेॽ इन्डोक जना सिघडामि तर बेॽलो जनाजि चाहिँ आयुरोसो टुसिम्मे। 7 मोबा ए़क्साङ येसु याकुबनुङ खाङ्मुसा, मोबा चोप एप्पा चोङ्साजिनुङ खाङ्मुसा। 8 चोप्पाङ ए़क्साङ का पावलनुङ्सो परभु खाङ्मुसा। मोडोगे़ॽ का चाहिँ खोमि ए़क्साङ्ए चोङ्सा अथबा टोक्मे बेला मे़लिरेॽ टोक्पॽआडोॽ ले़ङे। 9 इन्ढोङ्होङ एप्पा चोङ्साजिबेॽ चोप्पाङ ए़डेम्मा चाहिँ कानोॽ ले़ङे। चइबानोॽ लुमाबेॽ का एप्पा चोङ्सा लिमारोमा ले़ःॽङानि, इन्ढोङ्होङ निवाहाङ्बेॽ बिस्वास ले़ःॽखुबा याॽमिजि के़ॽ बेॽलोनोॽ चुङ्जाटुङ्हाजि। 10 का निवाहाङ्मि अनुग्रहाडे़ॽरेॽनोॽ खोमि एप्पा चोङ्सा लिटिङे। मोबा का पिबॽआ अनुग्रहा योम्बोक मे़ॽनिङ्मा मे़लिसा। बोरु के़ॽ हाइखा एप्पा चोङ्साजिडे़ॽ ले़ःॽपॽआबाङ्सो बेॽलो योम्बोक ले़ए़टुङे। तरसो इगो योम्बोक काङ्दाङ्बे़ॽ ने़ॽनि, निवाहाङ्मि अनुग्रहाडे़ॽ काबाङ ले़ए़टुए। 11 मोडोगे़ॽ के़ॽ परचार ले़ःॽपॽआहोङ्सो अथबा एप्पा चोङ्साजिडे़ॽ परचार ले़ःॽपॽआहोङ्सो, मो सुसमाचार इक्कोनोॽ ले़ये, मोबा हे़निङे़ॽ बिस्वास ले़ःॽपॽआसो मोनोॽ ले़ये। निवाहाङ्डे़ॽ सिघे़ॽपॽआजि हिङ्बोगुजि 12 निवाहाङ्डे़ॽ खिरिस्ट सिघे़ॽपॽआबाङ हिङ्बोगु लुनुङ कानिङे़ॽ परचार ले़न्डुङ्मे, तर हे़निङ्मि रुम्बेॽ आढाजिडे़ॽ चाहिँ सिघे़ॽपॽआजि हिङ्बोक्मिने लुसाङ राम्इम्मे। इडोॽ इन्डोक्टे लिहेये ? 13 याॽमिजि सिघे़ॽपॽआबाङ हिङ्बोगुजिनिहोङ्गो खिरिस्टसो मे़हिङ्बोगु। 14 चइबानोॽ खिरिस्ट मे़हिङ्बोक्पॽआहोङ्गो कानिङे़ॽ ले़ःॽपॽआ परचारनुङ हे़निङे़ॽ ले़ःॽपॽआ बिस्वास इनामा लिये। 15 इगो खाबाङ्सो बेॽलो चाहिँ कानिङ निवाहाङ्मि टुम्बेॽ मे़ॽनोक्हा खा इःघुबा लिन्डिङ्मा, इन्ढोङ्होङ निवाहाङ्डे़ॽ खिरिस्ट सिघे़ॽपॽआबाङ हिङ्बोक्इटुए लुनुङ कानिङे़ॽ साक्छि पिटुङ्मे। तर चइबानोॽ सिघे़ॽपॽआजि हिङ्बोक्मिनिहोङ्गो खोसे़ॽ खिरिस्ट मे़हिङ्बोगु। 16 सिघे़ॽपॽआजि हिङ्बोक्मिनेहोङ्गो निवाहाङ्डे़ॽ खिरिस्टसो मे़हिङ्बोगु। 17 खिरिस्ट हिङ्बोक्पॽआ ने़ॽनिहोङ्गो हे़निङ्मि बिस्वाससो मे़ॽनोॽमा ले़ये। हे़निङ हागोसो टाङ्बामि पापबेॽनोॽ टुन्डानिङे। 18 मोडोक्होङ्गो खिरिस्टबेॽ बिस्वास ले़ःॽनुङ सिघे़ॽपॽआजिसो नासि लिटामे। 19 इगो हिङ्मवामि लागिरेॽ कानिङे़ॽ खिरिस्टबेॽ आसा युङ्बॽआहोङ्गो कानिङ्मि हालत बिस्वास मे़ले़ःॽखुबा याॽमिजिबाङ्सो बेॽलो नम्नम मिॽमारोहाजि ले़न्डिङ्मा। 20 तर खिरिस्ट चइबानोॽ सिघे़ॽपॽआबाङ हिङ्बोगु। सिघे़ॽपॽआबाङ हिङ्बोक्पॽआजिबेॽ खोनोॽ याक्लोमा लिबॽआसे़ॽ बिस्वास ले़ःॽखुबाजि सिघे़ॽनुङ्सो निवाहाङ्डे़ॽ हिङ्बोइन्डुजे। 21 इन्ढोङ्होङ इक्को याॽमिबाङ चोप याॽमिजि सिमा सिॽटा। मोडोक्नोॽ सिघे़ॽपॽआजिसो इक्को याॽमिबाङ्नोॽ हिङ्बोॽइम्मे। 22 इडोॽ इक्को आदमडे़ॽ ले़ःॽमे़ॽ चोप याॽमिजिबेॽ सिमवा लेस्सा, मोडोक्नोॽ इक्को खिरिस्टडे़ॽ ले़ःॽमे़ॽ चोप याॽमिजिबेॽ हिङ्मवा लेस्सा। 23 तर चोप ताङ्बा ताङ्बामि पालो लेङ्इये, चोप्पाङ याक्लो हिङ्बोक्पॽआ खिरिस्टनोॽ ले़ये। मोडोक्नोॽ फेरि खो लेम्माबेॽ खोबेॽ बिस्वास ले़ःॽखुबाजि हिङ्बोक्इम्मे। 24 मोबा ए़क्साङ चोप रुक्खे़हा। मोडोक्पेॽ खिरिस्टडे़ॽ हाइखा चोप सासन, चोप अधिकारनुङ सक्ति नास ले़ःॽनुङ निवाहाङ पाबामि हुकपेॽ राज्य पिन्डुए। 25 इन्ढोङ्होङ खोसे़ॽ चोप सतुरजि खोमि सराङेॽ मे़सिक्लो खोसे़ॽ राज्य ले़ःॽमानोॽ खे़ये। 26 चोप्पाङ ए़क्साङ नास लिये सतुर चाहिँ सिमवानोॽ ले़ये। 27 इन्ढोङ्होङ धारमिक नेॽचिराडे़ॽ इडोॽ लुन्डुए, “निवाहाङ्डे़ॽ चोप थोक खिरिस्टमि सराङ्फे़क्माहोङ्बेॽ युङ्इन्डुए।” चोप थोक लुबॽआ निवाहाङ्सो खोमि अधिनबेॽ युङ्इन्डुए लुबॽआगो ने़ॽनि, तर निवाहाङ्डे़ॽनोॽ चोप खा खिरिस्टमि अधिनबेॽ युङ्बेन्डुए लुबॽआ ले़ये। 28 चोप खा खिरिस्टमि अधिनबेॽ युङ्सेॽनुङ खिरिस्ट टाङ्बा चाहिँ चोप खा खोमि अधिनबेॽ युङ्खुबा निवाहाङ्मि अधिनबेॽ पेङ्इये, मोबा निवाहाङ्डे़ॽनोॽ चोपसोक्पेॽ राज्य ले़न्डुए। 29 हागो याॽमिजि हिङ्बोक्मिनिहोङ्गो सिघे़ॽखुबाजिमि लागि बप्तिस्मा लानुङ इमा ले़ःॽमे ? मोडोॽ सिघे़ॽपॽआजि हिङ्बोक्मिनेहोङ्गो इन्ढोङ माहाजिमि लागि बप्तिस्मा पिन्डुजे ? 30 कानिङ चाहिँ इन्ढोङ फोरेन फोरेन किस्सिमारोमा खेःबेॽ सानिङ सिॽइन्डिङ्मे़। 31 के़हा वावानिसानुङ नानुसाजि, कानिङ्मि परभु येसु खिरिस्टबेॽ हे़निङे़ॽ बिस्वास ले़ए़टानुमे इगो खा मिॽनुङ का काङायोङ्बा लिटिङे, मोबा “का चोप याक सिमा पोरोइङे।” 32 याॽमिमिन्नोॽ खा इःमाहोङ्गो एफिसस सहरबेॽ का नाम्भुङ्लाबेॽहा जिवातडोॽहा याॽमिजिनुङ कगिङ लुमाबेॽ का इमाङ फाइदा लिये ? सिघे़ॽपॽआबाङ हिङ्बोगुनिहोङ्गो, “कानिङ चामा, उङ्मा इन्ढोङ्होङ वागियागो सिघे़ॽपेन्डि।” 33 मोडोक्हा खाबेॽ ए़ॽफाङ्सिघडानिङे, इन्ढोङ्होङ “मङे़ॽमा याॽमिजिनुङ लङ्गाम ले़ःॽमाबेॽ नुबा याॽमिसो नासि लिये।” 34 होसियार पेम्मा खे़ये, इगो खा चाहिँ नुबा ले़ये हागोएम्बाङ पाप ए़ले़टानुमे। हे़निङ्बेॽ इन्डोक जनाडे़ॽको निवाहाङ्नोॽ मे़लेडिॽटानुमे। हे़निङ नेम्माबेॽ सिॽमेॽमामि लागिनोॽ के़ॽ इगो खा लुनिम्ने़। 35 तर इन्डोगे़ॽ मिॽइन्डुजे, “सिघे़ॽपॽआजि इन्डोक्टे हिङ्बोक्मेनुङ माहाजिमि हिङा इन्डोक्मा लिये ?” 36 होउ उम्बरिङ! चरि टुॽमाबेॽ मो चरि मे़ङ्किम्घे़ॽलो रिङ्नोॽ के़ॽनिबा। 37 हे़निङे़ॽ गहुँ अथबा चममि खेति टिमाबेॽ याक्लो चरि टुॽमिन्डामे, डाङ्नोॽको टुबानुम्निबा। 38 तर निवाहाङ्डे़ॽ खोसे़ॽ मिॽपॽआडोॽ चोप खालहा चरि खे़न्जाये डाङ पिन्डुजे। 39 चोप जिवातजिमि इक्को खालमा हिङा माॽआहा। याॽमिजिमि हिङा इक्को खालमा ले़ये मोबा जिवातजिमि हिङा हाइकोनोॽ ले़ये, मोबा चोप सोङाजिमि हिङा इक्को खालमा ले़येनुङ ङामि हिङा हाइको खालमा ले़ये। 40 मोबा नान्द्रुङ्माबेॽहा नम, लानुङ साङ्गेजिमि टाङ्बामिनोॽ काम्नुये नरिङ टुहा, मक्खाम्डेमबेॽ टुघुबा याॽमिजि, जिवातजिनुङ सोङाजिमि टाङ्बा टाङबामिनोॽ काम्नुहा हिङा टुहा। 41 नमनुङ इक्को खालमा काम्नुये जोति टुये, लामि हाइको खालमा काम्नुये जोति टुये, साङ्गेजिमि छना हाइकोनोॽ खालमा काम्नुये जोति टुये। माहा साङ्गेजिबेॽसो खोरो खोरो खालहा काम्नुहा जोति टुहा। 42 सिघे़ॽपॽआबाङ हिङ्बोक्माबेॽसो मोडोक्नोॽ लिये। येःॽमाबेॽ युङ्माबेॽ हिङा नास लिमामि युङ्इये, तर हिङ्बोक्माबेॽ नास मे़लिघुबा हिङा लिये। 43 कानिङ्मि हिङा येःॽमाबेॽ युङ्माबेॽ मङे़ॽमानुङ थोःप्थोःप्मा लिये, तर फेरि हिङ्बोक्माबेॽ नुबानुङ सक्तिनुङ्मा लिये। 44 येःॽमाबेॽ युङ्माबेॽ सानुङ से़ॽकोॽवानुङ्मा हिङा युङ्इये, फेरि हिङ्बोक्माबेॽ आत्मिक हिङा लिनुङ हिङ्बोॽइन्डुए। सानुङ से़ॽकोॽवानुङ्मा हिङा टुडिडोक्नोॽ आत्मिक हिङासो टुये। 45 मोडोगे़ॽ धारमिक नेॽचिराबेॽ इडोॽ साप्पॽआ ले़ये, “याक्लोमा याॽमि आदम हिङ्मवा चुप्खुबा याॽमि ले़टा।” तर ए़क्साङ्ए आदम अथबा खिरिस्ट चाहिँ हिङ्मवा पिघुबा होङ्निवा ले़ये। 46 तरसो थाङ्सिरिबेॽए हिङा याक्लोमा ने़ॽनि, मक्खाम्डेमबेॽए हिङा याक्लोए ले़टा, मोबा ए़क्साङ चाहिँ थाङ्सिरिबेॽए हिङा लेस्सा। 47 याक्लोए आदम इगो मक्खाम्डेममि आक्खामाबाङ टोक्सा। हाइको आदम अथबा खिरिस्ट चाहिँ थाङ्सिरिबाङ लेस्सा। 48 मक्खाम्डेमबेॽहा याॽमिजि आक्खामाबाङ टोङ्बॽआडोॽ ले़म्मे। थाङ्सिरिबेॽहा याॽमिजि चाहिँ थाङ्सिरिबाङ लेम्बॽआजिडोक्नोॽ लेम्मे। 49 आयु कानिङ याॽमिजिमि हिङा आक्खामामि टुये, मोडोक्नोॽ ए़क्साङ थाङ्सिरिबेॽए याॽमिमि हिङा चुप्मिन्डुङ्मे। 50 वावानिसानुङ नानुसाजि के़ॽ हे़निङ लुमायोक्पॽआ चाहिँ इगो ले़ये, सानुङ हरिमि हिङा थाङ्सिरिमि राज्यमि हकदार लिहेनिबा। नासि लिये हिङाडे़ॽ नासि मे़लिघुबा हक चुप्हेसुनिबा। 51 खेप्सानुमे के़ॽ इक्को लेमा छॽइये खा इःनुङे, कानिङ चोपको सिसिङ्मानिबा, तर चोपनोॽ फेङ्घे़न्डिङ्मा। 52 मो बेलाबेॽ मिकमि इक झिमिकपेॽ चोप्पाङ ए़क्साङ्मा तुरहि मिःॽमासोरोॽ सिघे़ॽपॽआजि फेरि निवाहाङ्डे़ॽ नासि लिनिबा हिङाबेॽ हिङ्बोॽइन्डुजे, सिघे़ॽपॽआजि नासि मे़लिघुबा टोङ्नुङ हिङ्बोक्इन्डुजे मोबा कानिङ्मि हिङासो फेङ्इये। 53 इन्ढोङ्होङ नास लिये हिङा नास मे़लिघुबा लिमा खे़ये, सिघे़ॽपॽआजि ए़ॽसिमे हिङाबेॽ फेम्मा खे़ये। 54 इन्डोक्पेॽ नास लिघे़ये हिङा नास मे़लिघुबा लिये मोबा सिघे़ये हिङा सिघे़ॽनिबा लिनुङ फेङ्इये, मोडोक्पेॽ धारमिक नेॽचिराबेॽ इडोॽ साप्पॽआ बचन पुरा लिये, “सिमवा हेजाटुङ्मे,” 55 “ए सिमवा, हे़ने़ॽ इमाङ हेजोसुए ? सिमवा, खोइ हे़ने़ए़ बोल ?” 56 सिमवामि बोल पाप ले़ये, पापमि बोल चाहिँ यहुदि धारमिक नियमडे़ॽ लेमेये। 57 तर निवाहाङ ओहाक पिन्डुङ्मे, खोसे़ॽ कानिङ्मि परभु येसु खिरिस्टबाङ हेजामा पिसा। 58 मोडोगे़ॽ के़हा वावानिसानुङ नानुसाजि, बिस्वासबेॽ पक्का लिसानिङे, खोबेॽ सानिङ हे़निङ्मि निवा टिसानुमे। सानिङ परभुमि योम्बोक ले़ःॽमा बोल ले़टानिङे, इन्ढोङ्होङ परभुमि योम्बोकपेॽ दुःख ले़ःॽपॽआ के़न्डिॽखे़ॽनिबा लुमे खा हे़निङे़ॽ लेन्डानुमे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.