१ कोरिन्थि 14 - याम्फु1 मोडोगे़ॽ हे़निङ चाहिँ नम्नम ले़ःॽखुबाजि लिमा खे़ये। मोबा होङ्निवामि बरदान चुप्मा बेॽलो मिनानिङे, मोबाङ्सो बेॽलो चाहिँ अगमबानि इःमे बरदानमि लागि बोल ले़टानिङे। 2 इन्ढोङ्होङ हाइके खाप्ला यामुखुबा याॽमि याॽमिजिनुङ ने़ॽनि, तर निवाहाङ्नुङ यामुये। खोसे़ॽ इमाङ लुबॽआ लुनुङ असे़ॽसो लेसुनिबा। लेमा छॽइहा खानोॽ खोसे़ॽ पबित्रा होङ्निवामि सक्तिडे़ॽ यामुन्डुए। 3 तर अगमबानि इःघुबा याॽमिडे़ॽ चाहिँ याॽमिजिडे़ॽ लेहेये खाप्लाबेॽनोॽ यामुये। मोसे़ॽ याॽमिजि सक्तिमि लागि, हौसलानुङ सान्तिमि लागि यामुये। 4 हाइके खाप्ला यामुघुबे़ॽ टाङ्बामि आत्मिक फाइदा ले़न्डुए। तर अगमबानि यामुघुबाडे़ॽ चाहिँ मन्डलिबेॽहाजिमि लागि फाइदा ले़न्डुए। 5 के़ॽ हे़निङ चोबे़ॽ हाइके खाप्लाबेॽ यामुसानिङे मिॽइनिम्ने़। मोबाङ्सो बेॽलो अगमबानि इःसानिङे मिॽइनिम्ने़। अगमबानि इःमा बेॽलोनोॽ नुबा खा ले़ये, हाइके खाप्लाबेॽ यामुमाबेॽ मो खाडे़ॽ इःमा योक्पॽआ खा इःबेॽखुबा याॽमिसो टुहोङ इगोसे़ॽ मन्डलिमि लागि नुबा लिये। 6 वावानिसानुङ नानुसाजि, का हे़निङ्मि रुम्बेॽ हे़निङे़ॽ हाइके खाप्लारेॽ यामुसिङ्होङ हे़निङ इमा फाइदा लिये ? तर निवाहाङ्डे़ॽ हे़निङ खाङ्मुमा योक्पॽआ निवादाङ्बा खा अथबा अगमबानि अथबा सिक्छे पिनिम्होङ हे़निङ्मि लागि फाइदानोॽ लिये। 7 बासुरि अथबा बिनायो टेम्माबेॽ मोमि धुन खोरो खोरो मे़खेम्मुहोङ इमाङ मुक्मे़ॽनिङ्सिये लुनुङ इन्डोक्टे लेमे ? 8 मोडोक्नोॽ तुरहि टेम्माबेॽ तुरहिमि धुन छे़ङ्गै खेम्मुनिहोङ ङेः ले़ःॽमामि असाडे पोरोक्इये ? 9 मोडोक्नोॽ हे़निङे़ॽ इःबॽआ खाप्ला खेम्खुबा याॽमिजिबेॽ असे़ॽसो मे़लेसुजिहोङ, मोसे़ॽ इमाङ फाइदा पिये ? हे़निङे़ॽ इःबॽआ खागो हिॽवाबाबेॽ काडिडोॽ लिये। 10 मक्खाम्डेमबेॽ बेॽलो खालहा खाप्ला टुहा, माहा चोप खाप्लाबेॽ इक्को खाप्लासो योम्बोक मे़ॽनिङ्हा माॽआहा। 11 तर इक्को याॽमिडे़ॽ यामुबॽआ खाप्लानोॽ के़ॽ मे़लेसुङ्होङ्गो, का खोमि लागि हाइको देसबेॽए याॽमि लिङे, मोडोक्नोॽ खो काङ्मि लागि हाइको देसबिॽए याॽमि लिये। 12 इडोक्नोॽ हे़निङ पबित्रा होङ्निवामि बरदान सारोनोॽ चुप्मा योॽइटानुमे, मोडोगे़ॽ चोप बिस्वासिजि बोलियो टोङ्खुबा बरदान छना बेॽलो चुप्मा योगानुमे। 13 मोडोगे़ॽ हाइके खाप्लाबेॽ यामुघुबाडे़ॽ खोमटाङ्बे़ॽ इःबॽआ खाडे़ॽ इःमा योक्पॽआ खा, लुहेमे निवासो चुप्रो लुनुङ पारथना ले़टुरो। 14 इन्ढोङ्होङ के़ॽ हाइके खाप्लाबेॽ पारथना ले़ःॽमाबेॽ के़ए़ होङ्निवाडे़ॽ पारथना ले़नुङे, तर के़ए़ निवाडे़ॽ मो इमाङ्सो लेसुङ्नि। 15 मोडोक्होङ के़ॽ इमाङ ले़ःॽमे ? के़ए़ होङ्निवाडे़ॽ पारथना ले़ङेनुङ निवाडे़ॽसो पारथना ले़नुङे। मोबा के़ए़ होङ्निवाडे़ॽ ओहाङ ले़नुङेनुङ निवाडे़ॽसो ओहाङ ले़नुङे। 16 इन्ढोङ्होङ हे़निङ्मि होङ्निवाडे़ॽ हाइके खाप्लाबाङ ओहाक पिन्डानुमे, तर मोमि टुम्बेॽ मे़लेघुबा याॽमिजिडे़ॽ लेसुजिने, मोडोगे़ॽ माहाजिडे़ॽ इन्डोक्टे “आमेन” लुमे ? 17 हे़ने़ए़ ओहाकमि पारथना बेॽलोनोॽ नुबा ले़ःॽहोङ्सो, मोसे़ॽ हाइखा याॽमिजि इमाङ्सो फाइदा पिनिबा। 18 निवाहाङ ओहाक पिनुङे़, इन्ढोङ्होङ हे़निङ्बाङ्सो बेॽलो का हाइके खाप्लाबेॽ यामुङे। 19 तर मन्डलिबेॽ हाइके खाप्लाबेॽ बेॽलो खा इमाबाङ नुबा खा चाहिँ बोरु ए़डे़ॽवाहोङ्सो सिक्छे पिमामि चोबे़ॽ लेमे खाप्लाबेॽ यामुमानोॽ मिॽइनुङे। 20 वावानिसानुङ नानुसाजि, मिॽमे खाबेॽ पिच्छाडोॽ ए़लिसानिङे। मङे़हा खामि टुम्बेॽ चाहिँ पिच्छाडोॽ इमाङ मे़लेघुबा लिसानिङे, तर मिॽमे खाबेॽ चाहिँ पाको याॽमिडोॽ लिसानिङे। 21 धारमिक नेॽचिराबेॽ इडोॽ साप्पॽआ ले़ये- परभुडे़ॽ लुटे़, “के़हा याॽमिजिनुङ हाइके खाप्लाबेॽ का यामुङे। हाइको देसबेॽहा याॽमिजिमि खाप्लाबाङ का यामुङे। तरसो माहाजिडे़ॽ के़ए़ खा खेप्सुजिने।” 22 मोडोगे़ॽ हाइके खाप्लाबेॽ यामुमा चाहिँ बिस्वासिजिमि लागि ने़ॽनि, अबिस्वासिजिमि लागि चिङ्गा ले़ये। तर अगमबानि इःमा चाहिँ अबिस्वासिजिमि लागि ने़ॽनि, तर बिस्वासिजिमि लागि ले़ये। 23 मन्डलिबेॽ सुम्माबेॽ हाइके खाप्ला चोबे़ॽ इःन्डुङ्माहोङ मोबेॽ खिरिस्टबेॽ बिस्वास मे़ले़ःॽपॽआ याॽमिजि अथबा हाइके खाप्लामि टुम्बेॽ मे़लेघुबा याॽमिजि लेम्मिहोङ माहाजिडे़ॽ हे़निङ नक्सुबाङ लुमिनेन्डे ? 24 तर चोबे़ॽ अगमबानि इःमे़ॽनिङ्सिमाबेॽ अबिस्वासि अथबा बरदानमि टुम्बेॽ मे़लेघुबा याॽमि मोबेॽ टुहोङ्सो खोसे़ॽ खेम्बॽआ खाडे़ॽ टाङ्बा पापि ले़ङे़ले़ लुनुङ लेडोक्इन्डुए। मोबा मो अगमबानिबाङ मो याॽमि खोमटाङ्बानोॽ आप्टिकनुङ्मा लिये। 25 खोमि निवाहोङ्सिॽयु चुम्युङ्बॽआ खासो खाङ्मुहा, मोबा खोसे़ॽ टुम्रुक ठोःक्नुङ निवाहाङ ओहाङ ले़न्डुए, मोबा मोसे़ॽ “निवाहाङ हे़निङ्मि रुम्बेॽ टुये” लुनुङ निवाबाङ लुन्डुए। सङ्गतिमि नियम 26 वावानिसानुङ नानुसाजि, के़ॽ हे़निङ लुमायोक्पॽआ खा चाहिँ इडोॽ ले़ये, हे़निङ सुम्माबेॽ इक्कोसे़ॽ सेम इःमे, हाइकोसे़ॽ सिक्छे पिमे, हाइकोसे़ॽ निवाहाङ्डे़ॽ खाङ्मेॽमा योक्पॽआ खा इःमे, हाइकोसे़ॽ हाइके खाप्ला यामुखुबा अथबा मो खाडे़ॽ लुमायोक्पॽआ खा लुमे इघा चोप बरदान हे़निङे़ॽ बिस्वासिजिमि आत्मिक हिङ्मवा बोलियो टोङ्मे योम्बोकपेॽ टिसानुमे। 27 हाइके खाप्ला यामुघुबाजि टुमिहोङ बेॽलोबेॽ निप्पाङ सुम्बाङ्डे़ॽ पालो पालो ले़ःॽनुङ यामुमिरो, मोबा इक्कोसे़ॽ चाहिँ मो हाइके खाप्लाडे़ॽ इःमा योक्पॽआ खा इःसुरो। 28 तर हाइके खाप्लाडे़ॽ लुमायोक्पॽआ खा लेहेघुबा असासो माॽआमिहोङ, मो हाइके खाप्ला यामुखुबा मन्डलिबेॽ योङ उःक्नुङ, खो निवाहाङ्नुङ यामुरो। 29 अगमबानि इःघुबाजिसो निप्पाङ अथबा सुम्बाङ्डे़ॽ इःसुजिरो, मोबा हाइखाजिडे़ॽ चाहिँ इःबॽआ खा चाइबमाडे मे़ॽनोॽमा लुनुङ नुरोॽ जाँच ले़टुजिरो। 30 तर मोबेॽ पेङ्घुबाजिबेॽ इक्को याॽमि निवाहाङ्डे़ॽ खाङ्मुमा योक्पॽआ खा पिसुहोङ याक्लो कामे़ॽनिङ्सिबॽआ याॽमि चाहिँ योङ उक्रो। 31 हे़निङ चोबे़ॽ पालो पालो अगमबानि इःहेन्डानुमे, मोबा खेम्घुबाजिडे़ॽ चिङ्हेन्डुजेनुङ चोबे़ॽ हौसला चुप्मिन्डुजे। 32 अगमबक्ताजिडे़ॽ टाङ्बामि बरदान खोजिमिन्नोॽ अधिनबेॽ युङ्मा खे़ये। 33 इन्ढोङ्होङ कानिङ्मि निवाहाङ माङ्माङ्मा निवाहाङ ने़ॽनि, तर सान्तिनुङ्मा निवाहाङ ले़ये। पबित्रा सेवाकजिडे़ॽ युङ्बॽआ नियमडे़ॽ लुबॽआडोॽ, 34 मेॽनामिॽचि मन्डलिबेॽ सङ्गति लिमे़ॽनिङ्सिमाबेॽ योङ उःक्मिरो। मोडोक्पेॽ माहाजि यामुमा नुबा लिनिबा, तर माहाजि यहुदि नियमडे़ॽ लुडिडोॽ अधिनबेॽ पेम्मा खे़ये। 35 माहाजिडे़ॽ इमाङ इमाङ खा सिम्मा टुहोङ खिमबेॽ टाङ्बा टाङ्बामि बनिबानुङ सिप्सुजिरो। इन्ढोङ्होङ मन्डलिबेॽ मेॽनामिॽचि यामुमा चाहिँ ङेसिमा टे़क्टे़क लिये। 36 इमा निवाहाङ्मि बचन हे़निङ कोरन्थिबाङ तरिक्पॽआडे ? अथबा हे़निङ्बेॽरेॽनोॽ इगो निवाहाङ्मि बचन लेङ्इटे़ ? 37 टाङ्बा अगमबक्ता मिॽइन्डुहोङ, अथबा खोनुङ निवाहाङ्मि आत्मिक बरदान टुहोङ, खोसे़ॽ के़ॽ साप्पॽआ इगो खा परभुमि आग्या ले़ये लुनुङ मिॽटुरो। 38 तर खोसे़ॽ इगो खा खेप्सुनिहोङ खोमिसो खा ए़खेम्मे। 39 के़हा वावानिसानुङ नानुसाजि, अगमबानि इःमामि लागिनोॽ बेॽलो बोल लिसानिङे, मोबा हाइके खाप्ला इःघुबाजि ए़से़गानुमे। 40 तर चोप खा ले़ःॽमाबेॽ नुरोॽनुङ नियमडे़ॽ लुडिडोॽ ले़ःॽमा खे़ये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.