१ कोरिन्थि 13 - याम्फुचोप्पाङ बेॽए खा चाहिँ नम्नम 1 के़ॽ याॽमिजिमि खाल खालहा खाप्लानुङ थाङ्सिरि दुतजिमि खाप्लाबेॽनोॽ यामुङाहोङ्सो काबेॽ नम्नम माॽआहोङ, के़ॽ यामुबॽआ खागो मे़नोक्सो झाइ झाइ अथबा ठङ ठङ मुॽइये टेन्जिराडोॽमारेॽ लिये। 2 काबेॽ निवाहाङ्मि अगमबानि इःमे बरदान टुये, लेमानोॽ छॽइहा खा लेहेमे निवा टुये, चोप खालहा खा लेमे निवासो टुये मोबा सुम्लाखा सेङ्हेमे बिस्वास कानुङ टुये, तर काबेॽ नम्नम चाहिँ माॽआहोङ का इमाङ्सो ने़ॽनि। 3 के़ॽ टाङ्बामि चोप याङ्सरावा हाःसुङ्होङ्सो, के़ए़ हिङानोॽ हिॽमामि पिसुङ्होङ्सो काबेॽ नम्नम माॽआहोङ इमाङ्सो फाइदा लिनिबा। 4 नम्नम ले़ःॽखुबा याॽमिडे़ॽ चोप खालहा खा आङ्हेन्डुएनुङ नम्नावा ले़न्डुए, नम्नम ले़ःॽखुबा याॽमिडे़ॽ चेजेवा ले़टुनिबा, टाङायोङ्बा लिनिबा, मोबा टाङ्बा बेॽए रे़ङ्निबा। 5 नम्नम ले़ःॽखुबा याॽमि मङे़ॽमा रामबेॽ राम्निबा, टाङ्बामिनोॽ खाबेॽ येॽयेॽ कानिबा, फोरेन्नोॽ सुरके़ॽनिबा, हाइखाजिडे़ॽ खो मङे़हा ले़ःॽपॽआ खा निवाबेॽ युक्सुनिबा। 6 नम्नम ले़ःॽखुबा याॽमि मङे़ॽमा खाबेॽ साप्थाङ्निबा, तर चाइबमा खाबेॽ चाहिँ साप्थाङ्इये। 7 नम्नम ले़ःॽखुबा याॽमिडे़ॽ चोप खालहा खा आङ्हेन्डुए, चोप खाबेॽ बिस्वास लेन्डुए। चोप खाबेॽ नुबा आसा ले़न्डुए मोबा चोप खालहा दुःखबेॽ योङ पेङ्इये। 8 अगमबानिमि बरदान रुक्खे़ये, हाइको खाप्ला इःमे बरदान रुक्खे़ये, चेन्दुबा निवामि बरदान रुक्खे़ये। तर नम्नम इन्डोक्पेॽसो रुक्खे़ॽनिबा। 9 कानिङ्मि निवामि बरदान पक्का ले़ःॽनिबा, निवाहाङ्डे़ॽ कानिङ पिबॽआ अगमबानिमि बरदान अपुरो ले़ये। 10 तर परिपक्का टोङ्घुबा लेङ्इये मोबा अपुरो खा चाहिँ मे़खे़हा। 11 का पिच्छा टुमाबेॽ पिच्छाडोक्नोॽ यामुसिङे, मिडुङे, लेसुङे तर का वेन्जा लिसिङ पिच्छाडोॽ ले़ःॽमा लेप्पेसुङ। 12 आइगो कानिङे़ॽ मिकच्रेङ्बेॽ खाङ्माबेॽ धोमिलो खाङ्इन्डुङ्मे, तर मो बेलाबेॽ चाहिँ छे़ङ्गै खाङ्मुये। आइ के़ॽ लेबॽआ खा अपुरो ले़ये, तर मो बेला चाहिँ निवाहाङ्डे़ॽ का नुरोॽ लुडिडोॽ के़ॽसो चोप लेनुङे़। 13 हागो बिस्वास, आसानुङ नम्नम सानिङ टुडुङ्घे़ये। तर इघा सुम्जि खाबेॽ चोप्पाङ महान चाहिँ नम्नमनोॽ ले़ये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.