१ कोरिन्थि 12 - याम्फुपबित्रा होङ्निवामि बरदान 1 वावानिसानुङ नानुसाजि, पबित्रा होङ्निवाडे़ॽ पिबॽआ बरदानमि टुम्बेॽ हे़निङ चाइबमा खा नुरोॽ लुमा मिॽइनुङे। 2 हे़निङे़ॽ लेन्डानुमे, परभुबेॽ बिस्वास मे़ले़ःॽपॽआ बेलाबेॽ यानोॽ यामुहेनिहा खाल खालहा मुरतिबेॽ हे़निङ फाङ्सिघे़ॽपॽआ ले़टानिङ। 3 हे़निङे़ॽ इगो खा लेसानुमे, निवाहाङ्मि होङ्निवाडे़ॽ लुडिडोॽ यामुघुबा याॽमिडे़ॽ इन्डोक्पेॽसो “येसु चापहिसुनिबा।” मोबा असे़ॽसो पबित्रा होङ्निवाडे़ॽ लुसे लुनुङ्रेॽ “येसुनोॽ परभु ले़ये” लुन्डुए। 4 पबित्रा होङ्निवामि बरदान बेॽलो खालहा टुहा। तर बरदान पिघुबा पबित्रा होङ्निवा इक्कोरेॽनोॽ टुये। 5 परभुमि लागि ले़ःॽमाहा योम्बोक बेॽलो खालहा टुहा। तर कानिङे़ॽ इक्कोरेॽनोॽ परभुमि लागि योम्बोक ले़न्डुङ्मा। 6 निवाहाङ्डे़ॽ बेॽलो खालहा योम्बोक ले़न्डुहा, तर मो इक्को निवाहाङ्डे़ॽनोॽ कानिङ खाल खालहा योम्बोक ले़ःॽमे बोल पिये। 7 चोप बिस्वासिजिमि लागि नुबा लिरो लुनुङ्नोॽ पबित्रा होङ्निवामि योम्बोक खाङ्मुमामि चोप याॽमिजि खाल खालहा बरदान पिये। 8 आढाजि पबित्रा होङ्निवाडे़ॽ चेन्दुबा निवामि बचन इःमे बरदान पिये। आढाजि मोनोॽ होङ्निवाडे़ॽ निवामि खा इःमे बरदान पिये। 9 मोनोॽ पबित्रा होङ्निवाडे़ॽ आढाजि चाहिँ बिस्वास पियेनुङ मो पबित्रा होङ्निवाडे़ॽनोॽ टुक्खुबाजि नुबुक्मे बरदान पिये। 10 आढा चाहिँ खरिहा योम्बोक ले़ःॽमे बरदान पिये, आढा अगमबानि इःमे, आढाजि इन्डोक्मा होङ्निवा लुनुङ लेहेमे निवा पिये। मोडोक्नोॽ आढाजि खाल खालहा खाप्लाबाङ यामुमे बरदान, आढाजि चाहिँ माहा खाप्लाडे़ॽ लुमायोक्पॽआ खा लेमे बरदान पबित्रा होङ्निवाडे़ॽनोॽ पिये। 11 इघा चोप बरदान मो इक्कोनोॽ पबित्रा होङ्निवाबाङ्नोॽ लिबॽआ योम्बोक ले़हा। पबित्रा होङ्निवाडे़ॽ असा असा इमाङ इमाङ बरदान पिमा मिॽइन्डुए मोनोॽ बरदान पिये। 12 इन्ढोङ्होङ इन्डोॽ कानिङ्मि इक्को हिङाबेॽ खाल खालहा अङ्ग टुहा, मोडोक्नोॽ इघा खोरो खोरोहा अङ्गबाङ इक्को हिङा लिये। इगो खाडे़ॽ खिरिस्टसो इडोक्नोॽ ले़ये लुनुङ खाङ्मुये। 13 कानिङ बिस्वासिजिसो इक्कोनोॽ हिङाडोॽ ले़न्डिङ्मा, इन्ढोङ्होङ यहुदिहोङ्सो, गिरिक होङ्सो, सेउतेहोङ्सो, फुक्का होङ्सो कानिङ चोबे़ॽ इक्कोनोॽ पबित्रा होङ्निवाबाङ इक्कोनोॽ हिङाबेॽ बप्तिस्मा लाटुङ्मे़, मोबा चोबे़ॽ इक्कोनोॽ पबित्रा होङ्निवा चुप्मिटुङ्मे़। 14 इन्ढोङ्होङ याॽमिमि हिङा इक्को अङ्गडे़ॽ टोङ्बॽआ ने़ॽनिबा, तर बेॽलो अङ्ग इक्को लिनुङ टोङ्बॽआ ले़ये। 15 सराङ्डे़ॽ का हुक ने़ॽनिबा, मोडोगे़ॽ का इगो हिङामि अङ्ग ने़ॽनि लुमाबेॽ इमा मो हिङामि अङ्ग लिनिबा ? 16 मोबा ने़ए़कडे़ॽ “का मिक ने़ॽनिबा, मोडोगे़ॽ का हिङामि अङ्ग ने़ॽनि” लुमाबेॽ मो हिङामि अङ्ग लिनिबा ? 17 चोप हिङानोॽ मिक लिसाहोङ इमाङेॽटे खेम्मे ? मोबा ने़ए़करेॽ टुहोङ इमाङेॽटे नाम्मे़ ? 18 निवाहाङ्डे़ॽ मिप्पॽआडोॽ हिङामि चोप अङ्ग टोङ्नुङ युङ्बेटे़। 19 इक्कोनोॽ अङ्गनोॽ हिङा ले़टाहोङ्गो हिङानोॽ मे़लिसे़। 20 अङ्ग बेॽलो टुहा, तर हिङा चाहिँ इक्कोरेॽनोॽ टुये। 21 मिगे़ॽ हुक “का हे़न पाप्ङानि” लुहेसुनिबा। मोडोक्नोॽ निन्डवाँडे़ॽसो सराङ “का हे़न पाप्ङानि” लुहेसुनिबा। 22 बोरु हिङाबेॽहा कमजोर खाङ्मुहा अङ्गनोॽ बेॽलो योम्बोकनुङ्मा, मोबा कानिङ मोनोॽ बेॽलो पाप्मिये। 23 हाम्बे अङ्ग कानिङे़ॽ ए़डेम्मा मिॽइन्डुङ्मे़, मोमिनोॽ बेॽलो मान ले़न्डुङ्मे। मोबा कानिङ्मि खाङ्मुमा फे़न्निहा अङ्ग चाहिँ छना नुरोॽ चुम्इन्डुङ्मे। 24 खाङ्मुहा अङ्गगो कानिङे़ॽ ले़क्खो ले़टुङ्मानि। तर कमजोर अङ्ग बेॽलो मान ले़ःॽमामि लागि निवाहाङ्डे़ॽ कानिङ्मि हिङामि अङ्ग इडोॽ नुरोॽ युङ्बेटे़। 25 मो हिङाबेॽहा चोप अङ्ग इक्को लिनुङ टोङ्जामिरो लुनुङ इक्कोसे़ॽ हाइको अङ्गमि ले़ख्खो ले़टुरो। 26 इक्को अङ्गडे़ॽ खेः आङ्माबेॽ चोप हिङाडे़ॽनोॽ खेः आङ्इन्डुए, इक्को अङ्गडे़ॽ ओहाङ चुप्टुहोङ चोप अङ्गनोॽ सोरि साप्थाङ्इम्मे। 27 मोडोक्नोॽ हे़निङ चोपजि खिरिस्टमि हिङा ले़न्डानिङे। हे़निङ चोप खोमि इक्को इक्को अङ्ग ले़न्डानिङे। 28 निवाहाङ्डे़ॽ मन्डलिबेॽ याक्लो एप्पा चोङ्साजि, मोबा ए़क्साङ अगमबक्ताजि, मोबा ए़क्साङ सिक्छे इःॽखुबाजि, मोबा खरिहा योम्बोक ले़ःॽखुबाजि, मोबा टुक्खुबा याॽमिजि नुबोक्खुबाजि, मोबा हाइखाजि साहेता ले़ःॽखुबाजि, मोबा याॽमिजि खाङ्खुबाजि मोबा खाल खालहा खाप्लाबाङ यामुमे बरदान चुप्खुबाजि युङ्बेटे़। 29 चोप एप्पा चोङ्साजि, चोप अगमबक्ताजि, चोप सिक्छे इःॽखुबाजि ले़ःॽमिने। चोबे़ॽ खरिहा योम्बोक ले़टुजिने। 30 चोबे़ॽ नुबुक्मे बरदान चुप्टुजिने। चोप हाइके खाप्लाबेॽ यामुमिने। चोबे़ॽ हाइखा खाप्लाबेॽ लुमायोक्पॽआ खा लुहेसुजिने। 31 तर हागोसो पबित्रा होङ्निवाडे़ॽ पिमे चोप्पाङ बेॽए बरदान चुप्मामि बोल ले़टानिङे। मोबा के़ॽ हे़निङ छना नुबा राममि टुम्बेॽ लुबेनिम्ने़। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.