१ कोरिन्थि 11 - याम्फुमेॽनामिॽचिडे़ॽ निन्डवाँ टे़क्मे खा 1 खिरिस्टडे़ॽ ले़टिडोॽ के़ॽ ले़नुङे, हे़निङे़ॽसो के़ॽ ले़टिडोक्नोॽ ले़टानुमे। 2 हे़निङे़ॽ सानिङ का मिॽपॽआनुङ के़ॽ पिबॽआ सिक्छेडे़ॽ लुबॽआडोॽ ले़ःॽपॽआसे़ॽ हे़निङ्मि ओहाङ ले़नुङे। 3 तर हे़निङे़ॽ इगो खा नुरोॽ लेसानुमे लुनुङ के़ॽ मिॽइनिम्ने़, खिरिस्ट चाहिँ चोप वडाङ्पसाजिमि निन्डवाँ ले़ये। मोबा बनिबा चाहिँ बनिमामि निन्डवाँ ले़ये, खिरिस्टमि निन्डवाँ चाहिँ निवाहाङ ले़ये। 4 वडाङ्पसाडे़ॽ पारथना ले़ःॽमाबेॽ अथबा अगमबानि इःमाबेॽ टाङ्बामि निन्डवाँ टे़गुहोङ खिरिस्टमि अपमान लिये। 5 मेॽनामिॽडे़ॽ टाङ्बामि निन्डवाँ मे़न्टे़क्लेॽ पारथना ले़टुहोङ अथबा अगमबानि इःसुहोङ खोमि बनिबामि अपमान ले़न्डुए। इडोॽ ले़ःॽमा लुबॽआ खोमि टाङ खोबॽआडोक्नोॽ लिये। 6 इन्ढोङ्होङ मेॽनामिॽडे़ॽ निन्डवाँ टे़गुनिहोङ खोसे़ॽ टाङ हे़क्मानोॽ खे़ये। तर खोसे़ॽ टाङ हे़क्मा अथबा खोमा लुबॽआ चाहिँ खोमि लागि नेम्मा खा लियेन्से़ॽ खोसे़ॽ निन्डवाँ टे़क्मानोॽ खे़ये। 7 वडाङ्पसाडे़ॽ निन्डवाँ टे़क्मा पाप्निबा। इन्ढोङ्होङ वडाङ्पसा चाहिँ निवाहाङ्मि नरिङ्बेॽ टोङ्बॽआनुङ निवाहाङ आदर पिमामि लागि टोङ्बॽआ ले़ये। तर मेॽनामिॽ चाहिँ वडाङ्पसामि गरब ले़ये। 8 इन्ढोङ्होङ वडाङ्पसा मेॽनामिॽबाङ टोङ्बॽआ ने़ॽनि। तर मेॽनामिॽ चाहिँ वडाङ्पसाबाङ टोङ्बॽआ ले़ये। 9 मोबा वडाङ्पसा मेॽनामिॽमि लागि टोङ्बॽआ ने़ॽनिबा, तर मेॽनामिॽ चाहिँ वडाङ्पसामि लागि टोङ्बॽआ ले़ये। 10 मोडोगे़ॽ थाङ्सिरि दुतजिमि पोम्बेॽ मेॽनामिॽडे़ॽ टाङ्बामि बनिबामि अधिनबेॽ टुङे लुनुङ खाङ्मुमामि निन्डवाँ टे़क्मा खे़ये। 11 मोडोॽसो परभुमि पोम्बेॽ वडाङ्पसाबाङ मेॽनामिॽ फुक्का लिनिबानुङ मेॽनामिॽबाङ वडाङ्पसासो फुक्का लिनिबा। 12 एडो, मेॽनामिॽ वडाङ्पसाबाङ टोङ्बॽआ ले़ये, तर वडाङ्पसा मेॽनामिॽबाङ टोॽइये। मोबा चोप थोक निवाहाङ्बाङ्नोॽ लेङ्इहा। 13 हे़निङ टाङ्बे़ॽनोॽ मिॽखाक्सानुमे, इमा मेॽनामिॽडे़ॽ निन्डवाँ मे़न्टे़क्लेॽ निवाहाङ्मि पोम्बेॽ पारथना ले़ःॽमा खेन्जोन्डुए ? 14 वडाङ्पसाडे़ॽ किएम्मा टाङ कुमाबेॽ खोमि लागि ङेसिमा लिये खागो हे़निङ चोबे़ॽ लेन्डानुम। 15 तर मेॽनामिॽमि किएम्मा टाङ्गो खोमि निङ खिघुबा ले़ये। इन्ढोङ्होङ मेॽनामिॽमि टाङ खो टे़क्मामि लागिनोॽ पिबॽआ ले़ये। 16 इगो खामि बिरोधबेॽ हाइखा खा इःघुबा टुन्डानिङ्होङ, के़ॽ लुनिम्ने़ इगोबाङ हाइखा कानिङ्मि इमाङ्सो नियम माॽआहा, मोबा निवाहाङ्बेॽ बिस्वास ले़ःॽखुबजिबेॽ हाइखा इमाङ्सो नियम माॽआहा। परभुमि भत्तेर 17 तर के़ॽ हे़निङ इमा इमा ले़टानुमे लुमाबेॽ हे़निङ्मि ओहाङ ले़टुङ्नि, इन्ढोङ्होङ हे़निङ सङ्गतिबेॽ सुम्माबेॽ नुबा ने़ॽनि मङे़हा खा बेॽलो इःन्डानुमे। 18 चोप्पाङ याक्लोए खा, सङ्गतिबेॽ सुम्माबेॽ हे़निङ्मि रुम्बेॽ खा टोङ्निबा लुमे खासो के़ॽ खेम्इटुङे। चइबानोॽ के़ॽ मिॽमाबेॽ आक्टोॽ लिइसो होला। 19 निवाहाङ्डे़ॽ नेन्जाबॽआ याॽमि लिमामि लागि हे़निङ्मि रुम्बेॽ खोरो खोरोगो लिमानोॽ खे़ये। 20 हे़निङ इक्को ठाउँबेॽ सुम्नुङ चामाबेॽरेॽ मो परभुमि भत्तेर लिनिबा। 21 इन्ढोङ्होङ हे़निङ टाङ्बा चामाबेॽ टाङ्बा टाङ्बे़ॽ लाजे़ॽपॽआ खा चान्डानुमे, मे़ङ्काप्खुबा चाहिँ साक्मेन्जा सिॽइम्मे, कोहि चाहिँ इडे़ॽ सेक्खे़म्मे। 22 चामा उङ्मामि लागिगो इमा हे़निङ टाङ्बा टाङ्बामि खिम माॽआये ? इमा निवाहाङ्मि मन्डलि इमाङ्सो ने़ॽने मिॽइन्डानुमे ? मोबा इमाङ्सो मे़ङ्काप्खुबाजि नेम्मा टोङ्इन्डानुमे ? इगो खामि टुम्बेॽ के़ॽ हे़निङ इमा लुमे ? इमा हे़निङे़ॽ नुबा योम्बोक ले़ए़टानुमे लुमे ? ने़ॽनि के़ॽ आक्टोक लुहेसुङ्नि। 23 इन्ढोङ्होङ के़ॽ हे़निङ पिबॽआ इगो सिक्छे परभुबाङ्नोॽ चुप्मिटुङे। परभु येसु खोमि सतुरजिडे़ॽ राःप्मे याकमि सेन्डा खोसे़ॽ हुकपेॽ चरेपा लासु, 24 मोबा निवाहाङ ओहाक पिनुङ खोसे़ॽ मो चरेपा एॽनुङ लुसु, “इगो हे़निङ्मि लागि पिबॽआ काङ्मि हिङा ले़ये। का मिॽमामि लागि इगो ले़टानुमे।” 25 मोडोक्नोॽ चरेपा चाबेनुङ खोसे़ॽ खोरिया याङ्मानुङ लुसु, “इगो खोरिया चाहिँ निवाहाङ्नुङ याॽमिमि रुम्बेॽ हुप्पॽआ चोङ हेन्ज्रुङ ले़ये। इगो हेन्ज्रुङ काङ्मि हरिबाङ तरिक्पॽआ ले़ये। इन्डोक्पेॽ हे़निङे़ॽ इगो उङ्इन्डानुमे, का मिॽयुङ्मामि इडोक्नोॽ ले़टानुमे।” 26 इन्ढोङ्होङ हे़निङे़ॽ इन्डोक इन्डोक्पेॽ चरेपा चान्डानुमेनुङ इगो खोरियाबाङ उङ्इन्डानुमे, परभु मे़लेङ्रोठोक खो सिघे़ॽपॽआ खा परचार ले़न्डानुमे। 27 मोडोगे़ॽ असे़ॽ असे़ॽ इमाङ मे़मिन्रेॽ परभुमि चरेपा चोन्डुएनुङ खोमि खोरियाबाङ उङ्इन्डुए, मोसे़ॽ परभुमि हिङानुङ हरि हेला ले़ःॽपॽआसे़ॽ आप्टिकनुङ्मा लिये। 28 मोडोगे़ॽ चोप याॽमिजिडे़ॽ याक्लो टाङ्बे़ॽ ले़ःॽपॽआ चोप योम्बोक जाँच ले़टुजिरो, मोबाङ्रेॽ परभु भत्तेरमि चरेपा चोसुजिरो मोबा खोरियाबाङ उक्सुजिरो। 29 इन्ढोङ्होङ असे़ॽ परभुमि हिङानुङ हरि आदर मे़ले़ःॽरेॽ चोन्डुएनुङ उङ्इन्डुए मोसे़ॽ टाङ्बामि हिङ्मवाबेॽ दन्डा लाःजे़न्डुए। 30 मोडोगे़ॽनोॽ हे़निङ्बेॽ बेॽलो जना थोःप्थोॽहाजिनुङ टुक्खुबाजि ले़न्डानिङे, मोबा इन्डोक जना चाहिँ सिघे़ॽपेटानिङे। 31 तर याक्लोनोॽ टाङ्बा नुरोॽ जाँच ले़टानुमहोङ निवाहाङ्मि दन्डाबेॽ सिॽटानिङ्नि। 32 निवाहाङ्डे़ॽ कानिङ न्याय ले़ःॽमाबेॽ मक्खाम्डेमबेॽहा पापिजिडोॽ दोसनुङ्हाजि मे़लिरो लुनुङ खोसे़ॽ कानिङ अधिनबेॽ युङ्इये। 33 मोडोगे़ॽ वावानिसानुङ नानुसाजि, हे़निङ परभु भत्तेर चामामि सुम्माबेॽ इक्कोसे़ॽ हाइको हुक्सानुमे। 34 परभुमि भत्तेर चामाबेॽ हे़निङ आप्टिकनुङ्मा लिमा मे़न्सिॽलो लुनुङ सगे़ॽ सिबॽआजि चाहिँ खिमबेॽनोॽ चामिरो, मोबा हाइखा ले़ःॽमा खे़ये खामि टुम्बेॽ चाहिँ का लेन्नुङ्नोॽ लुनिम्ने़। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.