१ कोरिन्थि 10 - याम्फुमुरति पुजा ए़ले़ःॽमे टुम्बेॽ सिक्छे 1 वावानिसानुङ नानुसाजि, बेॽलो निङ याक्लो रे़क्रे़क्मा ठाउँबेॽ कानिङ्मि टुबालाबाजिमि हिङ्मवाबेॽ लिबॽआ खामि टुम्बेॽ हे़निङे़ॽ नुरोॽ लेसानुमे लुनुङ के़ॽ मिॽइनुङे। मिस्रा देस लेॽनुङ राम्बोक्माबेॽ खोजिमि पोम्बेॽ पोम्बेॽ खिम्मिॽवा राप्सा, माहोङ्मामि रुम्बाङ कानिङ्मि टुबालाबाजि राम्खडामि। 2 मोबा मोसामि ए़ङ्गुवा ए़ङ्गुवा राम्घुबाजि चोप खिम्मिॽवा टिङ्मानुङ माहोङ्मामि रुम्बाङ राम्माबेॽ माहाजिडे़ॽ बप्तिस्मा लाबॽआडोॽ लिसा। 3 मोबा चोबे़ॽ निवाहाङ्डे़ॽ पिबॽआ इक्कोनोॽ चामाहा खा चोसुजि। 4 निवाहाङ्डे़ॽ पिबॽआ इक्कोनोॽ योङा चोबे़ॽ उक्सुजि। इन्ढोङ्होङ खोजिनुङ सोरि सोरि राम्खुबा रुङ्गोॽवाबाङ निवाहाङ्डे़ॽ पिॽपॽआ योङा उक्सुजि। मो योङा पिघुबा रुङ्गोॽवा चाहिँ खिरिस्टनोॽ ले़टे़। 5 मोडोॽसो माहाजिबेॽ बेॽलो याॽमिजिमि योम्बोकबाङ निवाहाङ मे़साप्थाक्सा, मोडोगे़ॽ माहाजि रे़क्रे़क्मा ठाउँबेॽ सिघडामि। 6 माहाजिडे़ॽ ले़टिडोॽ मङे़हा निवा ए़ॽखिसानुमे लुनुङ इघा खा कानिङ होसियारि ले़ःॽमामि लागि ले़हा। 7 माहाजिबेॽ इन्डोक जनाजिडे़ॽ मुरतिमि सम्माङ ले़टिडोॽ हे़निङे़ॽ ले़ःॽमा फे़न्निबा। धारमिक नेॽचिराबेॽ इडोॽ साप्पॽआ ले़ये, “याॽमिजि चासिॽ, उङ्सिॽ पेनामिनुङ छाडा योम्बोक ले़ःॽसिॽ येपोगामि।” 8 माहाजिडे़ॽ बेभिचार ले़टुजि, तर कानिङे़ॽ चाहिँ ले़ःॽमा फे़न्निबा। माहाजिडे़ॽ बेभिचार ले़ःॽपॽआसे़ॽ इक्याकपेॽनोॽ निक्पोङ सुम हजार याॽमिजि सिसामि। 9 कानिङे़ॽ खिरिस्टमि जाँच ले़ःॽमा फे़न्निबा, माहाजिबेॽ इन्डोक जनाडे़ॽ मोडोॽ ले़ःॽपॽआसे़ॽ पुसे़ॽजिडे़ॽ ओःक्नुङ सिसामि। 10 माहाजिडोॽ कानिङ कुनुक कुनुक कामा फे़न्निबा। माहाजिबेॽ इन्डोक जनाडे़ॽ मोडोॽ कुनुक कुनुक काबॽआसे़ॽ सिमवामि दुतडे़ॽ सेॽनेसुजि। 11 माहाजिबेॽ लिबॽआ इघा चोप खा कानिङ चेतावनि पिमामि लागि धारमिक नेॽचिराबेॽ साप्पॽआ ले़हा। कानिङ हागो मक्खाम्डेम रुक्खे़ॽसिॽपोरोक्पॽआ बेलाबेॽ लेङ्इटिङ्मे। 12 मोडोगे़ॽ असे़ॽ टाङ्बा बिस्वासबेॽ बोलियो ले़ङे मिॽइन्डुए, खोसे़ॽ खोमि बिस्वास मे़ङ्काङ्लो लुनुङ होसियारि लिनुङ येःप्मा खे़ये। 13 हे़निङ्बेॽ लेङ्इये जाँच चोप याॽमिजिबेॽ लेङ्इयेडोॽमानोॽ ले़ये। निवाहाङ बिस्वासनुङ्मा ले़ये, खोसे़ॽ हे़निङे़ॽ मे़आङ्हेरोमा जाँचबेॽ सिॽमेॽनिबा, तर खोसे़ॽ जाँचबाङ लेक्खे़ॽमे रामसो टोङ्बेॽये। इडोॽ हे़निङ जाँचबेॽ सिॽमाबेॽ मो आङ्हेन्डानुमे। 14 मोडोगे़ॽ के़हा वावानिसानुङ नानुसाजि, हे़निङे़ॽ मुरतिमि सम्माङ ले़ःॽनोॽ ए़ले़ःॽमे़। 15 हे़निङ्गो निवादाङ्बा याॽमि मिॽनुङ के़ॽ लुमे़ॽनिङ्सिनिम्ने़। के़ॽ लुबॽआ खा हे़निङ टाङ्बे़ॽ नुरोॽ मिॽखाक्सानुमे। 16 परभु भत्तेरमि खोरिया याङ्नुङ कानिङे़ॽ निवाहाङ ओहाक पिन्डुङ्मे। इमा मो खोरियाबाङ उङ्माबेॽ कानिङ खिरिस्टमि हरिबेॽ सोरि लिबॽआ ने़ॽनेन्डे ? मो एॽपॽआ चरेपा चामाबेॽ इमा कानिङ खिरिस्टमि हिङाबेॽ सोरि लिबॽआ ने़ॽनेन्डे ? 17 चरेपा इक्कोनोॽ टुये, मो इक्को चरेपा कानिङ चोबे़ॽ चाटुङ्मे। मोडोगे़ॽ कानिङ बेॽलो टुन्डिङ्मारोसो खिरिस्टबेॽ इक्कोनोॽ हिङा ले़न्डिङ्मा। 18 इस्राएलि याॽमिजि खाक्सानुमे थानाबेॽ चेॽटिबॽआ थोक चाघुबाजि निवाहाङ्मि सेवाबेॽ सोरि मे़लिसामे ? 19 के़ॽ इमाङ लुमे़ॽनिङ्सिनुङे ? मुरतिबेॽ चेॽटिबॽआ थोक इमाङ्डे ? अथबा मुरति लुबॽआ इमाङ्डे ? इघा इमाङ्सो ने़ॽनिहा। 20 के़ॽ लुमायोक्पॽआ खा चाहिँ बिस्वास मे़ले़ःॽपॽआ याॽमिजिडे़ॽ बलि चेॽटिमाबेॽ निवाहाङ्मि निङ्बेॽ ने़ॽनि, तर मङे़ॽमा चापमि निङ्बेॽ चेॽटिन्डुजे, मोडोगे़ॽ हे़निङ माहा मङे़हा चापजिनुङ सोरि ए़लिसानिङे। 21 हे़निङे़ॽ परभुमि खोरियानुङ मङे़ॽमा चापमि खोरिया निच्चिबाङ्नोॽ उङ्हेसानुम्ने। 22 इमा कानिङे़ॽ परभु सुरिके़ॽमेॽमे ? इमा परभुबाङ कानिङ बेॽलो बोलियो ले़न्डिङ्मे़ ? 23 हे़निङे़ॽ लुन्डानुम, “चोप खा ले़ःॽमा नुये”, तर चोप खाडे़ॽ नुबा ले़ःॽनिबा। “कानिङे़ॽ चोप थोक ले़टोक्इये” लुन्डुङ्मे, तर चोप खाडे़ॽ कानिङ नुबा लिनिबा। 24 असे़ॽसो टाङ्बामि लागि नुबा लिहा खा ने़ॽनि तर हाइखाजिमि लागि नुबा लिये खा योक्मा खे़ये। 25 निवाहोङ्सिॽयु इमाङ मे़मिॽलेॽ हाटाबेॽ इन्जामा युङ्बॽआ सा हाम्बाङ लाजे़ॽपॽआ मे़न्सिम्लेॽ इन्जासानुमे। 26 इन्ढोङ्होङ धारमिक नेॽचिराडे़ॽ लुये, “मक्खाम्डेमनुङ मोबेॽ टुबॽआ चोप थोक परम परभुमिनोॽ ले़हा।” 27 बिस्वास मे़ले़ःॽखुबा याॽमिडे़ॽ हे़निङ चामा चासिॽ के़ःॽमाबेॽ खडानिङे, मोबेॽ हे़निङ चामा पिबॽआ थोक निवाबेॽ इमाङ मे़मिॽलेॽनुङ हाम्बाङ लाजे़ॽपॽआ लुनुङ मे़सिम्लेॽ चासानुमे। 28 तर कोहि याॽमिडे़ॽ “इगोगो मुरतिबेॽ चेॽटिबॽआ” लुहोङ याॽमिनुङ निवामि लागि ए़ॽचासानुमे। 29 के़ॽ लुबॽआ हे़ने़ए़ निवामि लागि ने़ॽनि, तर मो लुघुबा याॽमिमि लागि ले़ये। हे़निङे़ॽ लुन्डानुम होला हाइखाजिमि निवामि लागि का इन्ढोङ हिःक्चिमुमे़ ? 30 के़ॽ निवाहाङ ओहाक पिनुङ चानुङ्होङ के़ॽ ओहाक पिनुङ चाबॽआ खाबेॽ इन्ढोङ हाइखाजिडे़ॽ आप्टिक टिमे ? 31 मोडोगे़ॽ हे़निङे़ॽ चामाबेॽसो, उङ्माबेॽसो अथबा इमाङ ले़ःॽमाबेॽसो माहा चोपनोॽ निवाहाङ्मिनोॽ महिमामि लागि ले़टानुमे। 32 हे़ने़ॽ हिङ्बॽआ हिङ्मवाडे़ॽ यहुदिजि अथबा अयहुदिजि मोबा बिस्वासिजि हाप्सेॽमा फे़न्निबा। 33 के़ॽ हाइखा चोपमि लागि चोप नुबा योम्बोक ले़ःॽमा योॽइनुङे। हे़निङे़ॽसो के़ॽ ले़टिडोक्नोॽ ले़टानुमे। माहा योम्बाक काङ्मि लागि ने़ॽनि, तर बेॽलो याॽमिजिमि नुबामि लागि ले़नुङे, मो योम्बोकबाङ खोजिडे़ॽ मुक्ति चुप्हेसुजिरो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.