१ कोरिन्थि 1 - याम्फु1 निवाहाङ्मि निवाबाङ खिरिस्ट येसुमि एप्पा चोङ्सा लिमामि के़ःॽपॽआ का पावलनुङ सोस्थेनेस निसाबाङ इगो पत्रा साप्मे़ॽनिङ्सिन्जुङे। 2 कोरन्थिबेॽ टुहा निवाहाङ्मि बिस्वासिजि इगो पत्रा पाङ्मे़ॽनिङ्सिन्जुङे, हे़निङ निवाहाङ्मि पबित्रा याॽमिजि लिमामि के़ए़टे़। मोबा खोसे़ॽनोॽ चोप ठाउँबेॽ परभु येसु खिरिस्टमि पुकारा ले़ःॽखुबाजिडोॽ हे़निङ्सो पबित्रा टोङ्इटे़। खो काजिङ्मिनुङ माहाजिमि परभु ले़ये। 3 कानिङ्मि निवाहाङ पाबानुङ परभु येसु खिरिस्टडे़ॽ हे़निङ अनुग्रहानुङ सान्ति पिरो। पावलडे़ॽ निवाहाङ ओहाक पिबॽआ 4 खिरिस्ट येसुबेॽ निवाहाङ्डे़ॽ हे़निङ पिबॽआ अनुग्रहामि लागि सानिङ के़ॽ निवाहाङ ओहाक पिनुङे़। 5 इन्ढोङ्होङ हे़निङ निवाहाङ्डे़ॽ खिरिस्टबेॽ चोप खालहा आसिस पिटे़। मोडोगे़ॽ हे़निङ्बेॽ चोप खालहा यामुहेमे सक्तिनुङ लेहेमे निवा टुहा। 6 इन्ढोङ्होङ खिरिस्टमि टुम्बेॽ पिबॽआ साक्छि चाइबमा ले़ये लुनुङ निवाहाङ्डे़ॽ हे़निङ्बेॽ पक्का ले़ए़टुए। 7 मोडोगे़ॽ कानिङ्मि परभु येसु खिरिस्टमि राम खाङ्साङ हुङ्माबेॽ हे़निङ इमाङ बरदानमिसो खाँचो सिॽनिबा। 8 कानिङ्मि परभु येसु खिरिस्ट लेङ्इये याकपेॽ हे़निङ आप्टिक मे़ॽनिङ युङ्मामि खोसे़ॽ ए़क्साङ्रो बिस्वासबेॽ बोलियो टोङ्इये। 9 निवाहाङ बिस्वासनुङ्मा ले़ये, मोडोगे़ॽनोॽ खोमि पसा परभु येसु खिरिस्टमि सङ्गतिबेॽ हे़निङ के़ए़टे़। 10 के़हा वावानिसानुङ नानुसाजि, कानिङ्मि परभु येसु खिरिस्टमि निङ्बेॽ हे़निङ बिन्ति ले़निम्ने़, हे़निङ चोप इक्को निवानुङ्हाजि लिसानिङे, मोबा हे़निङ्मि रुम्बेॽ फाटो मे़लिरो, तर हे़निङ सानिङ इक्को निवानुङ चोबे़ॽ इक्कोनोॽ खाबेॽ निवा टिसानुमे। 11 इन्ढोङ्होङ के़हा वावानिसानुङ नानुसाजि, हे़निङ टाङ्बा खिन्डानिङे लुमे खा के़ॽ क्लोएमि खिमबेॽहा याॽमिजिबाङ खेम्इटुङे। 12 के़ॽ लुमायोक्पॽआ खा चाहिँ इगो ले़ये, हे़निङ्बेॽ “आढा का पावलमि”, “आढा का अपोल्लोसमि”, “आढा का पत्रुसमि” मोबा “आढाजि का खिरिस्टमि” लुनुङ कान्डानिङ्रो। 13 इमा खिरिस्ट हाघे़टे़ ? इमा पावल हे़निङ्मि लागि काप्सिङ्बेॽ बलि लिसे़ ? इमा हे़निङे़ॽ पावलमि निङ्बेॽ बप्तिस्मा लासानुमे ? 14 निवाहाङ ओहाक पिनुङे़, किरिस्पसनुङ गायसबाङ हाइखा असासो के़ॽ बप्तिस्मा मे़म्पिडिॽ। 15 मोडोगे़ॽ का पावलमि निङ्बेॽ बप्तिस्मा लिसिङा लुनुङ हे़निङ असे़ॽसो लुडोक्टानुम्नि। 16 (पिमागो के़ॽ स्तिफनसमि खिमबेॽहाजि बप्तिस्मा पिसुङ। इगोबाङ हाइखा असाजिसो के़ॽ बप्तिस्मा मे़म्पिडिॽ, इघाबाङ हाइखाजि पिटुङ्जि लुनुङ के़ॽ लेसुङ्नि।) 17 इन्ढोङ्होङ खिरिस्टडे़ॽ का बप्तिस्मा पिसिॽ ने़ॽनि, सुसमाचार खेम्मेॽसिॽ चाहिँ पाङ्बॽआ ले़ये। के़ॽ परचार ले़ःॽमाबेॽ याॽमिमि चेन्दुबा निवाबाङ मे़ले़टुङ, मोडोक्होङ्गो काप्सिङ्बेॽ खिरिस्टडे़ॽ पिबॽआ बलिमि सक्तिनोॽ योम्बोक मे़ॽनिङ्मा लिघे़ये। निवाहाङ्मि निवा 18 खिरिस्ट काप्सिङ्बेॽ सिबॽआ खामि परचार चाहिँ नासि लिघुबाजिमि लागि उम्बरिङ खा ले़ये, तर कानिङ उद्धार चुप्खुबाजिमि लागि चाहिँ निवाहाङ्मि सक्ति ले़ये। 19 इडोक्नोॽ धारमिक नेॽचिराबेॽ निवाहाङ्डे़ॽ लुबॽआ ले़ये, “निवादाङ्बाजिमि निवा नास ले़नुङे, चेन्दुबाजिमि बाठो योम्बोक बिफल ले़पेनुङे।” 20 खोइ निवादाङ्बा हाम्बेॽटे टुये ? यहुदि नियम इःॽखुबा हाम्बेॽटे टुये ? खोइ इगो युगमि निवादाङ्बा काघुबा हाम्बेॽटे टुये ? इमा निवाहाङ्डे़ॽ याॽमिजिमि निवा योम्बोक मे़ॽनिङ्मा मे़न्टोक्सुए ? 21 याॽमिजिमि टाङ्बामिनोॽ निवाडे़ॽ निवाहाङ लेहेसुजिने लुमे़ खा निवाहाङ्डे़ॽ लेबॽआसे़ॽ खोमिनोॽ निवामि सक्तिबाङ सुसमाचार खेम्मेॽमाबेॽ याॽमिजिडे़ॽ उम्बरिङ मिॽटुजे, मो सुसमाचारनोॽ खेम्नुङ बिस्वास ले़ःॽखुबा याॽमिजि निवाहाङ्डे़ॽ हिङ्मेॽमा मिॽटु। 22 यहुदिजिडे़ॽ परमानमि लागि खरिमा चिङ्ग ङाःइन्डुजे मोबा गिरिक जातिहा याॽमिजिडे़ॽ निवामि खा योॽइन्डुजे। 23 तर कानिङे़ॽ चाहिँ काप्सिङ्बेॽ बलि लिबॽआ खिरिस्टमि सुसमाचार परचार ले़न्डुङ्मे। इगो खा यहुदिजिमि लागि बाधा पिघुबा खा, मोबा अयहुदिजिमि लागि उम्बरिङ खा ले़ये। 24 तर निवाहाङ्मि याॽमिजि लिमामि लागि के़ःॽपॽआ यहुदिनुङ अयहुदि निप्पाङे़ॽ खिरिस्टनोॽ निवाहाङ्मि सक्तिनुङ निवा ले़ये लुनुङ लेटुजे। 25 इन्ढोङ्होङ निवाहाङ्मि उम्बरिङ खा याॽमिजिमि निवाबाङ महान ले़ये मोबा निवाहाङ्मि कमजोर खा याॽमिजिमि सक्तिबाङ्सो सक्तिमान ले़ये। 26 के़हा वावानिसानुङ नानुसाजि, निवाहाङ्मि याॽमिजि लिमामि लागि के़ःॽमाबेॽ हे़निङ इन्डोक जना बेॽहा याॽमि मे़ले़टानिङ, इन्डोक जना सक्तिदाङ्बा मे़ले़टानिङ्नुङ बेॽए खिमबेॽहा याॽमिसो मे़ले़टानिङ। 27 तर निवाहाङ्डे़ॽ निवादाङ्बाजि नेम्मा टोङ्मामि याॽमिजिडे़ॽ उम्बरिङ मिॽपॽआ याॽमिजि से़नुजि, मोबा सक्तिदाङ्बा याॽमिजि नेम्मा टोङ्मामि लागि थोःप्थोप्हा याॽमिजि से़नुजि। 28 मक्खाम्डेमबेॽहा याॽमिजिडे़ॽ बेॽहा मिॽपॽआ चोप याॽमिजि योम्बोक मे़ॽनिङ्हा टोङ्मामि लागि याॽमिजिडे़ॽ ए़डे़म्मा मिॽपॽआ, चिक्चि मिॽपॽआनुङ योम्बोक मे़ॽनिङ्हा मिॽपॽआ याॽमिजि निवाहाङ्डे़ॽ से़नुजि। 29 निवाहाङ्मि पोम्बेॽ असे़ॽसो काङायोङ्बा मे़लिमिरो लुनुङ्नोॽ खोसे़ॽ इडोॽ ले़टु। 30 निवाहाङ्डे़ॽ हे़निङ येसु खिरिस्टबेॽ लाप्मिटे़। निवाहाङ्डे़ॽ खिरिस्ट येसु कानिङ्मि लागि निवामि मुहान टोङ्बेॽनुङ खिरिस्टडे़ॽ कानिङ निवाहाङ्मि पोम्बेॽ आप्टिक मे़ॽनिङ्हाजिनुङ पबित्रा टोङ्इये। मोबा कानिङ्मि पापबाङ छुट्कारा पिये। 31 मोडोगे़ॽ धारमिक नेॽचिराबेॽ इडोॽ साप्पॽआ ले़ये, “असे़ॽ काङायोङ्बा खा इःमा मिॽइन्डुए, मोसे़ॽ परभुडे़ॽ ले़ःॽपॽआ योम्बोकपेॽनोॽ काङायोङ्बा खा इःसुरो।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.