Yohanes 3 - Allah Wene Hurumbik Keron

At Nikodemus etno Yesus inim wene balfahon wene 3:1-21

¹ Eke fobik it Farisi ap misig inuk Nikodemus etno welapag. At ap etno it Yahudi ap inowe neken wilil,

² o misihim hubanggo At Yesus ambeg wapareg, yig ituk wilil, “Ninowe yanggul nisarukon wai, Haren yanggul nisawag ulug At Allahen lahap habik waharisi etno nit niniluk-o. Eke at ap misig Allah inim welatlep fugmen, Haren sukfugangge suruk ahenon epmano suruk atlep fug-o,” ulug yig epag.

³ Yig ituk apagma, At Yesus etnowen yig ituk wilil, “Wene demat urukon etno yig hisamin-o. Ap misig ebe birenam endag atuk eleg halug, At Allah weregma kuk ari hai-o,” ulug yig ituk apagma,

⁴ at Nikodemus etnowen yig ituk wilil, “Ap misig ebe anggog atlug ebe birenam endag am ehen ari keroho ulug ehen-o? At etno isina ahla lahalug, birenam endag am ulug ehen ano?” ulug yig ituk apagma,

⁵ eke At Yesus etnowen yig ituk wilil, “Ari halug, An wene demat urukon etno yig hisamin-o. Ap misig ik fam inim, Roh Kudus fam inim endag atuk eleg halug, At Allah weregma kuk ari hai-o.

⁶ Eke it aphe kweanmon epmanowen inudaki kweanmon-at endag inaptuk oke, At Roh Kudus etnowen inindi keron-at og isaruk-o.

⁷ Eke Anden hit obog birenam neken endag amuhuben ulug yig hirihion etno fam wi ulug fog suk fug-o.

⁸ Eke at hiahne etno abusag-at fil ha waharuk-o. Fil ha waharuk wilil, une urukon-at hesanggo holtuk ahenon oke, ebe kemen fil ha waharuk-o, kema laruk-o ulug hapeleg-at welahen-o. Ari ilitoho it Roh Kudusen endag inaptukon epmano ariroho-at wereg-o,” ulug yig epag.

⁹ Yig ituk apagma, at Nikodemus etnowen yig ituk wilil, “Ariroho ehen ari, keroho surukmu ehen-o?” ulug yig ituk apagma,

¹⁰ At Yesus etnowen yig ituk wilil, “Hat hebe it Israel aphe epmano yanggul inaptuk ahenon-at oke, An wene yig hirihion etno hapeleg atuk ano?

¹¹ Ari halug, wene demat urukon etno yig hibmin-o. Ariroho yig hituk wilil, nil harikikseg niluk atision etno-at yig hisaruk ahion oke, hiren An wene yig hisaruk ahion epmano eberoko waruk ahep fug-o.

¹² Eke ariroho yi wene di wene kweanma dumen surukon epmano yig hisaruk ahion oke eberoko waruk ahep fug ari, eke Anden yi wene di wene boholmen surukon epmano yig hiselemen, keroho eberoko welep-o?

¹³ Eke at ap misig etno o boholma lahabag fug-o. An Allahen minduhup naharision etno hag boholmen ambik waharuk seyag-o.

¹⁴ Eke bilin o limu aphe eleg ambeg epmano at Musaen walo etno e fam homako minduhupfebag etno hag, fobik An Allahen minduhup naharision etno e fam lenggaloko minduhup nahakup-o.

¹⁵ Ariroho minduhup naharuk amuhupmu, it yi aphe di aphe epmanowen An nobam ebetuk isalug, iniluk welamon etno-at holahup-o.

¹⁶ Eke At Allahen it aphe o kweanma duma werehon epmano mondog indi hunduhuk welapag etno fam, At Amloho misig aron oke og isebag-o. Ariroho og isebag ari, it yi aphe di aphe obohen At obam ebetuk isalug, fobik waraheg eleg iniluk mondog welamon etno holawag ulug og isebag-o.

¹⁷ Ariroho og isebag ari, it aphe o kweanma dumon epmano oag deloko o dagma imbisawag ulug At Allahen Amloho etno belabik wapag fug-o. Aren it aphe o kweanma duma werehon epmano inili wawag ulug-at belabik wapag-o.

¹⁸ Ari halug, it yi aphe di aphe obohen At Allahen Amloho etno obam ebetuk isalug, oag deloko o dagma imbisahu fug-o. Eke it nin At Allah Amloho misig aron etno obam ebetuk eleg isalug, inebe arat oag deloko imbisarisi-o.

¹⁹ Inebe oag deloko imbisarisi etno, iren duroho suruk isalug imbisarisi-o, At o seleg etno o kweanma duma waharision oke, it aphe epmano dag-at suruk ari fam, o seleg etno sohorep isalug, o hubanggo welamon etno holarusa-o.

²⁰ Eke it yi aphe di aphe dag surukon epmanowen o seleg etno inambit haruk wilil, at o seleg wereg ambeg epmano wamon inambit haruk-o. Eke iren dag surukon epmano bukal am nowen ulug at o seleg wereg ambeg epmano wamon inambit haruk-o.

²¹ It nin ariroho inambit harukon oke, it nin wene demat urukon etno ilitoho suruk isalug, at o seleg etno ambeg waharuk ari, iren fanoroho surukon etno At Allah une ninesanggo holtuk wilil surukuk-o, ulug selegma amag ulug at o seleg etno ambeg waharuk-o,” ulug yig epag.

At Yohanesen At Yesus ebe suon-at wereg-o ulug yig isebahon wene 3:22-30

²² Eke fobik, At Yesus omini epmano inim o Yudea etno lebag. Lebareg epmano wilil, aphe ikma belap inaptuk apag.

²³ Belap inaptuk epmano weregma, at Yohanes o Ainon etno o Salim horogsoho epmanowen aphe ikma belap inaptuk apag. O etno ik anggolo weregma, it yi aphe di aphe obog at ambeg laruk apag.

²⁴ Laruk apagma, at Yohanes etno awan hele waroko umburuk eleg iseheg wilil, aphe epmano ikma belap inaptuk apag.

²⁵ Belap inaptuk apareg weregma, at Yohanes omini nin epmanowen it Yahudi ap inim winimug apag ari, alem yi angge di angge usaroho ulug ho surukon epmano fam inim winimug apag.

²⁶ Winimug aptuk apareg, fobik at Yohanes ambeg wapag. Waharuk apareg, yig ituk wilil, “Ninowe yanggul nisarukon wai, hat bilin ap misig hinim ik Yordan le femag wilil, At awene yig isaruk atikinon epmano hindi ebetuk ahen ano? At ap etno kidia aphe ikma belap inaptuk halug, it yi aphe di aphe obog At ambeg-at laruk-o,” ulug yig epag.

²⁷ Yig ituk apagma, at Yohanes etnowen yig isaruk wilil, “At Allahen yi angge di angge og nisaruk eleg halug, it apheyen holao ari hai-o.

²⁸ Eke anden hit bilin yig hisaruk wilil, ‘An nebe At Kristus ilitoho welahi fug-o, At fobik wamag ulug an bilin lahap nabik waharisi-o,’ ulug yig hisarikikon etno hit hiniluk-o.

²⁹ Eke hwe misig ahun etnowen-at uhwe holaruk-o. Eke at hwe etno ahun omini epmano inim dambuksoho wilil, at ahun etno une inesanggo holtug inahien haruk-o. Ari ilitoho at une etno nesanggo holtug nahien haruk ahi-o.

³⁰ Eke At inuk hag suontepfuruk wilil, an ninuk seberepfuk ari fano-o,” ulug yig isebag.

At boholmen ambik waharukon etno hag ebe suon-at wereg-o ulug yig isebahon wene 3:31-36

³¹ At Yohanesen yig isaruk wilil, “It aphe kweanmon epmano doron-at-o. At ebe boholmen ambik waharukon etno hag suon-at wereg-o. Eke it aphe kweanmon epmano hag, inebe kweanmon etnowen iren yi angge di angge kweanmon epmano-at uruk-o. It ariroho urukon epmano inebe doron-at wereg iseheg, At boholmen ambik waharukon etno hag suon-at wereg-o.

³² Eke At boholmen ambik waharukon etnowen yi angge di angge ilanggen harukon epmano inim, esanggo holtukon epmano inim obog-at yig isarukon oke, iren At awene etno eberoko waruk eleg-o.

³³ Eke it ninen At awene etno eberoko waruk isalug, ari fam At Allahen demat uruk-o ulug selegmaroho bukaloko yig nisaruk-o.

³⁴ Eke it At Allahen lahap isa waharukon epmano, At Allahen Roh Kudus suroho og isaruk etno fam At Allah awene etno-at yig isaruk-o.

³⁵ Eke At Ikni etno Amloho indi hunduhuk wilil, yi angge di angge obog unde welamag ulug inggikmu imbirisi-o.

³⁶ Eke it yi aphe di aphe obohen At Amloho etno obam ebetuk isalug, iniluk welamon etno-at holaruk-o. Eke it nin At Amloho etno une inesanggo holtuk eleg wilil, iniluk welamon etno holaruk eleg isalug, At Allahen nintul nantul asine inobam umburuk aruhu-o,” ulug at Yohanesen yig isebag.