Yohanes 10 - Allah Wene Hurumbik Keron

At Yesusen yig isaruk wilil it ap wam domba aso werehon sok ele baleke-at kuruk-o ulug ilitoho neken yig isebahon wene 10:1-6

¹ Eke fobik At Yesusen yig isaruk wilil, “Ari halug, An wene demat uruk amon etno yig hisamin-o. At ap misig etno wam domba inalehet oho ambeg kiog ulug suruk wilil, sok ele baleke kuk sohorep isalug, lehet bog kuruk halug, at ap etno inalomnangge heraharukon etno inim, ap watukon etno inim ilitoho-at wereg-o.

² Eke at ap misig sok ele baleke etno kurukon halug, wam domba inaso werehon etno ari at-o.

³ Eke at ap misig sok elma aso werehon etnowen sok hut haruk-o. Eke at ap etno kulug anggom domba epmano ininuk inakeleg sik-at wol isaruk halug, it anggom domba epmanowen at une holtuk-o. Une holtuk isalug, at etnowen og inaplug wilik waharuk-o.

⁴ Wilik watlug, at bilin larukmu, it anggom domba epmano at une holtukon nowen mutlug laruk-o.

⁵ Eke iren ap werlekon mug inaplug laruk eleg-o. It ap werlekon inune inapelehon halug, it wam domba epmanowen sohorep isalug, hite laruk-o,” ulug yig isebag.

⁶ Ari, At Yesusen wene ilitoho neken yig isebahon oke, iren ebe du farim yig nisehek ulug inahla beheg eleg-at welapag.

At Yesusen it wam domba fanoroho inaso welahion etno An at-o ulug yig isebahon wene 10:7-21

⁷ Ariroho weregma, eke At Yesusen fobik dahagsoho yig isaruk wilil, “Ari halug, Anden wene demat uruk amon etno yig hisamin-o. It wam domba kuruk ambeg inasok etno ilitoho An-at welahi-o.

⁸ Eke it obog An waharuk eleg neyeheg waharuk atuson etno, aphe inalomnangge heraharukon etno inim, ap watukon etno inim ilitoho waharuk atusa-o. Ariroho waharuk atusa etno fam, it An nanggom domba epmanowen it inune holtuk atusa fug-o.

⁹ Eke sok ebe etno ilitoho An-at welahi-o. It inebe sok etno fam kuruk isalug, inili wahuk-o. Eke it ariroho waharukon halug, keheg wilip aheg suruk wilil, iren isinggangge fanowon epmano heag sahup-o.

¹⁰ Eke it ap inalomnangge heraharukon etno lehet bog kuruk ari, inalomnangge herahakeg, war inabeheg, muko wilip iseheg suog ulug-at kuruk-o. Eke An hag it nanggom domba epmano iniluk inabeheg, yi angge di angge obog-at og iseheg suruk ariog ulug waharikik-o.

¹¹ Eke at wam domba fanoroho inaso werehon etno An at-o. Eke at wam domba fanoroho inaso werehon etno ebe anggom domba etno inake waram fano ulug ahla buruk-o.

¹² Eke at yangge asineon ap misig yuhunon etno anggom domba eleg wilil, fanoroho inaso wereg elehon etno, yangge asineon etno waharukmu, ilanggen haruk atlug, wam domba epmano sohorep isalug, hite wilip atuk-o. Ariroho hite wilip atuk halug, at yangge asineon etnowen wam domba epmano war inaptuk wilil, nin muko wilip isaruk-o.

¹³ Eke yuhunon etno anggom eleg wilil, ebe anggimbu yuhunon neken wereg etno fam, hite wilip atuk wilil, wam domba inaso fanoroho wereg eleg-o.

^14-15 At etno ariroho wereg oke, eke wam domba fanoroho inaso welahion etno An at-o. Eke At An Nikni etnowen An nebe iluk weregma, Anden At ebe niluk welahi etno hag, Anden it nanggom domba epmano inebe niluk wereg nealug, iren An nebe iniluk wereg-o. Ari halug, An nebe etno it inake waram fano ulug nahla buruk ahi-o.

¹⁶ Eke it An nanggom domba nin o werlekma lehet oko werehon epmano inim-at og inaplug waruhuk-o. Og inaplug waharuk aruhukmu, iren An nune inesanggo holtuk amuhupmu, inebe obog misigmu-at dambuksoho imbisalug, At inaso werehon etno misig-at welaruhu-o.

¹⁷ Eke An fobik niluk ariog ulug nahla buruk ahi etno fam, At An Nikni etnowen An nebe indi hunduhuk wereg-o.

¹⁸ Eke An nebe etno it aphe nin inakeleg-at inahla buruk amuhupseg, nowabuhup fug-o. An nonggarehen it inake nowabukag ulug nahla buruk atikikon etno fam-at nowabuhup-o. Eke An nebe niluk welariog ulug, eleg aheg, wereg aheg, sukon etno unde welamag ulug An Niknien-at minduhup naharisi-o,” ulug yig isebag.

¹⁹ Ariroho yig isaruk apagma, it Yahudi ap epmanowen Aren yig isebahon etno fam inebe healeg neken welapag.

²⁰ Ariroho wilil, it ninen, “Ap du setan indimu wilil, nenek neken urukon du keroho ulug At une holtuk ahep-o,” ulug uruk apagma, eke it ninen, “Eleg-o, At setan indimu welatlepmen, wene ariroho elep fug-o.

²¹ Eke at setan etnowen ap inilanggen buhon fenggen inaptuk eleg-o,” ulug uruk apag.

It Yahudi ap epmanowen At Yesus inambit hebahon wene 10:22-42

²² Eke fobik it Yahudi ap epmanowen o Allah ibam ari sambit falfag ulug inindi ebebuog ulug esoho esebukon arat fanggog uruk heheg, o Yerusalem o sohik anggolo welapag.

²³ Ariroho weregma, At Yesus o Allah ibam at Salomo asok elma etano larukmu,

²⁴ it Yahudi ap At ambeg wonggalik waharuk apareg, yig ituk wilil, “Hat wene herako-at yig nisaruk ahen du, o maram selegmaroho bukaloko yig nisahun-o? Ari halug, At Kristus waruhu ulug yig nisebahon, Hat-at halug, kidia bukaloko yig nisimin-o,” ulug yig epag.

²⁵ Yig ituk apagma, eke At Yesusen yig isaruk wilil, “An arat yig hisarikikon oke, hit hag nobam ebetuk ahep fug-o. Eke Anden yi yabuk di yabuk Nikni inuk fam suruk nealug, ari fam An nawene selegma atuk-o.

²⁶ Eke hit hag An nandomba neken welahep fug epmanowen nobam ebetuk ahep fug-o.

²⁷ Eke it An nandomba epmano hag An nune inesanggo holtuk-o. Eke Anden inebe niluk welahi fam, iren An mug naplug laruk-o.

²⁸ Eke Anden iniluk welamon og isaruk nealug, mondog waramuhup fug-o. Eke it inebe epmano An ninggikmu weregma, ap misihen diloko og inabuhu fug-o.

²⁹ Eke At An Nikni it inebe og nepahon epmano akeleg-at suon wereg-o. Ari halug, inebe At An Nikni inggikmu weregma, ap misihen diloko og inabuhu fug-o.

³⁰ Eke nit An Nikni ninim ninebe misig-at welahe-o,” ulug yig isebag.

³¹ Ariroho yig isaruk apagma, it Yahudi ap epmanowen fobik inim wabuog ulug helep ininggikmu webag.

³² Waruk apagma, At Yesusen yig isaruk wilil, “At An Nikni etnowen ariroho sukag ulug yig nepareg fam, yi yabuk di yabuk fanowon epmano obog-at hinil fam suruk atikikon oke, eke alem fanowon misig keroho sirikikmu helep fam nowabuog ulug suruk ahep-o,” ulug yig isebag.

³³ Yig isaruk apagma, eke it Yahudi ap epmanowen yig ituk wilil, “Hat alem fanowon misig sirikinmu, helep fam howabuog ulug suruk ahe fug-o. At Allah inuk seberepfuruk ahen fam howabuog ulug suruk ahe-o. Eke Hat hebe ap ilitoho-at oke, Haren An Allah ilitoho-at welahi ulug uruk ahen-o,” ulug yig epag.

³⁴ Ariroho yig ituk apagma, eke At Yesus etnowen yig isaruk wilil, “Hit wene duroho suruk amuk eke duroho suruk am fug ulug ebahon fam, At Allahen yig hisaruk wilil, ‘Hit hinebe At Allah ilitoho suon welahep-o,’ ulug yig hisebahon Alkitab wene baleg fam wereg-o.

³⁵ Ariroho wereg halug, yi wene di wene Alkitab fam yig nisaruk ari, demat yig nisaruk hiniluk-o. Eke At Allahen, hit hinebe At Allah ilitoho suon welahep, ulug yig isebag it ap At awene yanggul isebahon epmano-at yig isebag-o.

³⁶ Ari halug, eke At An Nikni etnowen nebe heako minduhup naharuk atisireg, o kweanma duma lahap nahik waharisi-o. Eke Anden An nebe At Allah Amloho-at welahi-o, ulug irikikon oke, hiren Hat At Allah inuk seberepfuruk ahen ulug yig nituk ahep ari, keroho ulug yig nituk ahep-o?

³⁷ Eke An At Niknien suruk etno hag suruk eleg nealug, hiren An nobam ebebuk fug-o.

³⁸ Eke An At Niknien suruk etno hag ilitoho suruk nealug, hiren An nobam eberoko wao sohorep isalug, Anden yabuk suruk ahion epmano eberoko waruk amuk-o. Ariroho waruk amuk ulug yig hisihi ari, hiren At Amloho Ikni inim inebe misig-at wereg-o, eke At Ikni Amloho inim inebe misig-at wereg-o, ulug hinahla buruk wilil, hit hinindi demat ebebuhuben ulug waruk amuk yig hisihi-o,” ulug yig isebag.

³⁹ Yig isaruk apagma, it epmanowen fobik inim-at ebe senebuog ulug sebahon oke, ininggikmuen wilip apag.

⁴⁰ Wilip atuk apareg, At Yesus etno ik Yordan baloko ayeg lema fil lebag. Laruk apareg, at Yohanesen bilin aphe ikma belap inaptuk ambeg epmano welapag.

⁴¹ Epmano weregma, it yi aphe di aphe obog At ambeg wonggalik waharuk apareg uruk wilil, “At Yohanesen bilin sukfuganggeroho suruk atisi fuhon oke, ap du ahurumbik yig nisaruk atision etno demat hehe-o,” ulug uruk apareg,

⁴² it yi aphe di aphe obohen At obam ebetuk apag.