Yakobus 4 - Allah Wene Hurumbik Keron

Kweanmen surukon etno ilitoho suk fug ulug yig isebahon wene 4:1-10

¹ Hit hinindi fam winimug aptuk ahep etno, alem kemen waharuk buruk ahep-o? Ari alem hinindimuen nindi nindi uruk ahep ari famen winimug uruk ahep-o.

² Eke yi angge di angge nindi nindi ulug oke, holawon hai atuk halug, ap wabuog ulug seheg, winimug abeheg suruk ahep-o. Ariroho suruk wilil, At Allahen og nisawag ulug sembahyang uruk elegma, yi angge di angge holawon epmano hai atuk-o.

³ Eke At Allahen og nisawag ulug sembahyang uruk wilil oke, an suon-at welaruhuken og nemag ulug uruk ahep ari famen yi angge di angge holawon epmano hai atuk-o.

⁴ Eke hit hinindi fanoroho ebetuk ahep fug-o. It kweanmen dag surukon epmano ninim dambuksoho wereg nisalug, At Allahen sohorep nisaharuk-o. Eke it kweanmen dag surukon epmano nomin ulug inim wereg isalug, ari At Allah inim healeg wereg-o.

⁵ Eke Alkitab fam weregma, yig nisaruk ari, “At Allahen ninindi og nisiog ulug, yi angge di angge nindi nindi urukon epmano inim-at og nisebag-o,” ulug wene holal embebahon etno ebe undama werehon hinahla buruk ahep fug ano?

⁶ Eke nindi nindi urukon epmano arat og nisarision oke, obam seberoho ninobabut fano welamon etno og nisarision ari, Alkitab fam yig nisaruk wilil, “Ap nin inonggarehen suontepatarukon halug, At Allahen seberep isahu-o. Eke it ap nin inonggarehen seberepatarukon halug, suontep isahu-o,” ulug holal embebahon etno fam yig nisaruk-o.

⁷ Ari halug, nomini-o, hit hinebe epmano hiren At Allah apma seberoho welamiek-o. Eke at iblis etnowen hinindi kahalik waharuk halug, hiren lag ulug yig imuhupmu, sohorep hisahalug hite lahu-o.

⁸ Eke hit hinebe At Allah hinim welamuog ulug ambeg horogsoho laruk amiek-o. Hit dag suruk ahebon halug, hininggik sabele ho simiek-o. Eke hit hinune hinenggal-at uruk ahebon halug, sohorep isaruk amiek-o.

⁹ Eke hit hinebe hinindi dag atuk wilil, ioba yatuk amiek-o. Eke unda yatuk ahebon epmano sohorep isalug, ioba yatuk amiek-o. Eke hinahien suruk ahebon epmano sohorep isalug, At Allah il fam, an dag-at suruk ahi-o, ulug hinindi seberoho welamiek-o.

¹⁰ Eke At Allah il fam hinonggarehen seberepataruk hisalug, aren lehep hisahuk-o.

Homin obam denggeluk fug ulug yig nisarukon wene 4:11-12

¹¹ Nomini-o, hat misihen homin misig obam denggeleheg, eke hat misig homin misig obam denggeleheg ari suruk am fug-o. Eke homin misig hinune dahon obam umburuk wilil, obam denggeltuk hisalug, wene duroho suruk amuk eke duroho suruk am fug ulug ebahon wene etno inim-at obam denggeltuk ahep-o. Eke wene duroho suruk amuk eke duroho suruk am fug ulug ebahon wene etno obam denggeltuk wilil, wene ebahon etno hinesanggo holuk sohorep isalug, hinapma umburuk ahep oke, eke komo yig nisaruk wilil, ninaren baltukon ari At Allah-at wereg-o.

¹² Ariroho wilil, At Allahen-at o dagma imbiseheg, eke o fanoma imbiseheg suruk-o. Eke hit hat hinomini inobam denggeltuk ahep du, an suon ulug, hinahla buruk wilil suruk ahep ano?

Hinuneyen ari suhuk ulug suontepata fug ulug yig isebahon wene 4:13-17

¹³ Eke hit ninen uruk wilil, “Sono ano hao ano o misig lalug, epma tahun misig wilil, yi angge di angge anggolo suruk amuhukseg, uang anggen anggolo hundubuhuk-o,” ulug uruk ahebon halug,

¹⁴ sono niluk welaruhuk, ulug hinapeleg wilil, keroho ulug uruk ahep-o? Hit hinebe e anggen yihilug fahe bug atukon etno ilitoho welahep-o.

¹⁵ Ariroho halug, hiren, “At Allahen fano uruk halug, ninebe niniluk wilil, yi angge di angge epmano suhuk,” ulug ariroho uruk am fano-o.

¹⁶ Eke hinonggareg hinuneyen, “Ari suhuk, ari suhuk,” ulug suontepataruk ahep ari, dag-at suruk ahep-o.

¹⁷ Eke ap misig fanoroho sukon etno iluk wilil oke, ilitoho suruk eleg halug ari, dag-at suruk-o, ulug hinahla buruk wilil, hinesanggo fanoroho holtuk amiek-o.