Yakobus 3 - Allah Wene Hurumbik Keron

Inambilik famen ebahon wene 3:1-12

¹ Nomini-o, hit obohen, an ap yanggul isarukon welaruhuk ulug uk fug-o. It aphe werlekon hag inaren baluhu oke, nit ap yanggul isarukon etno hag fikfag ninaren baltuk aruhureg, hinog anggolo og ninabuhu oke, niren dahan fahan suruk aheon epmano niniluk-o.

² Eke at ap misig nintul nantul dahan fahan uruk elehon halug ari, fano mondog motoho suruk-o.

³ Eke wam etno ebe suon oke, e kal doron fam isu suruk ahe-o.

⁴ Eke ikma luog ulug so ebe suon oke, kwalem motoho lawag ulug at so watuk ilukon etnowen esonggat doron fam watuk-o.

⁵ Eke ninambilik etno doron-at oke, yi wene di wene epmano alem suon-at uruk ahe-o. Halug ariroho uruk aheon epmano ilitoho neken wene misig yig hisamin-o. Eke misig, hondok anggen doron oke, monggalepfurukmu, ambulpul su atuk etno hag,

⁶ ninambilik fam yi wene di wene uruk ahe oke, alem ari fam dahon epmano obogsoho ninobam ombataruk ahe-o. Eke alem misig du, isinggama yuhun-at sahno umburukmu naruk etno hag, dahon epmano ninambilik fam uruk nisalug, o hondok olokma welamon etno imig saruk ahe-o.

⁷ Eke it aben bak inim, sue inim, wam inim, walo inim obog-at ininggiken senoko inune elehepfuruk oke, eke it apheyen inambilik fam inune urukon epmano elehepfuk ari hai-o.

⁸ Inambilik fam urukon ari, inune dahon inim, eke dahan fahan urukon inim, eke imag neken werehon etno inim obog-at uruk-o.

⁹ Eke ariroho uruk wilil, ninele misig-at weregma, misihim Ninikni Allah etno inim, eke Ninowe etno inim wa ulug inobam sembahyang eheg, eke misihim it ninomini Allahen imbisebahon epmano ninune dahon inobam denggeleheg suruk ahe-o.

¹⁰ Ariroho uruk wilil, sembahyang urukon etno inim, eke ninune dahon urukon epmano inim, alem ninambilik misig-at wereg oke, ariroho uk ari hai-o, nomini.

¹¹ Ik induk dahon inim, ik induk fanowon inim eleruk ambimen wilip atuk eleg-o, nomini.

¹² Eke eyen helak yihiruk eleg-o, eke helaken sak yihiruk eleg-o. Eke ik werlekon etno saho induk hag atuk eleg-o.

Boholmen ninindi fanoroho ebetukon etno og nisebahon wene 3:13-18

¹³ Eke ap indi enggaron misig hinim welahep ano eleg ano? Ebe wereg halug, indi enggatoho wilil, yi angge di angge fanoroho seheg, obabut fano mondog wilil onggarehen seberepateheg suruk halug, ap arion-at welamag-o.

¹⁴ Eke hit hinuneyen nambit hambit eheg, eke hinindi famen hinasine heheg, eke yi angge di angge an-at hulik ulug hinahla beheg suruk wilil, an-at suon ulug, fano wene etno sohorep isalug hinenggal wene etno uruk am fug-o.

¹⁵ Eke ariroho surukon ari, alem boholmen waharuk eleg-o; kweanmen-at wereg atuk ari, at setanen suruk epmano hag suruk-o.

¹⁶ Eke it apheyen nambit hambit eheg, yi angge di angge an-at hulik ulug inahla beheg, suruk ambeg epmanowen it aphe obog healeg wilil, yi dag di dag suruk-o.

¹⁷ Ariroho surukmu, boholmen inindi iniluk amag ulug og isarukon ari fam, fano wene etno eheg, aphe inim dambuksoho welaheg, eke inune fanowon-at yig iseheg, eke nabua habua seheg, eke yi angge di angge fanoroho seheg, eke nambit hambit ukon etno sohorep iseheg suruk-o.

¹⁸ Eke ap misihen fohot yaltukon i angge etno yaruhu halug, fobik fano mondog welamon etno holahu-o.