Wahyu 9 - Allah Wene Hurumbik Keron

¹ Ariroho uruk atisimu, eke at malaikat misihen ambinggon uneap sirisi-o. Uneap suruk atisimu, nilanggen lahaboho wereg neyeheg, soholoal misig boholmen kweanma bule ambik waharuk atisimu, kwean etno kahal ariog ulug ahuli larisi-o.

² Ahuli la­ruk atisireg suon kahal atuk atisimu, soholoal etno kwean apma ambirisi-o. Amburuk atisimu, ombolim, sahno naruk wilil hubu laharuk etno hag, hondok hubu suon etno laharuk wilil, mo il yatukon etno hik atisi-o.

³ Hik atuk atisimu, hubu etno fene horen bulue anggolo kweanma ambik waharusa-o. Ambik waharuk atusama, walo hukalowen aphe bal inaptuk etno hag bal inaptuk amag ulug inahe enggat werehon umburusa-o.

⁴ Ariroho umburusa famen, isinggangge inim, e inim, engga werehon epmano inim naruk am fug-o; eke it aphe duma At Allahen angge ulug inilaho­ag fam holal elehon halug hinayeg bal inaptuk amiek-o, ulug yig isarusa-o.

⁵ Yig isaruk atusareg, eke fobik it bulue epmano yig isaruk wilil, “Aphe hinayeg bal inabuhubon epmano mondog war inabeheg eleg, we oloken suruk amag ulug bikalem fuaben angge fam hinayeg bal inaptuk amuhup-o. Eke ap misig walo hukalowen ayeg baltukmu oloken suruk etno hag, it aphe hit horen bulue epmanowen hinayeg bal inaptukmu oloken suhup-o.

⁶ Bikalem fuaben angge wilil oloken suruk amuhup ari fam, it apheyen an waram nindi-o, ulug inahla buruk wilil, war amuog ulug suhubon oke, mondog war amuhup fug-o,” ulug yig isarusa-o.

⁷ Ariroho yig isaruk atusama, eke horen bulue nilanggen isarikikon epmano wam kuda wim abuog ulug surukon etno hag inolohore seg atusa-o. Ariroho wilil, it inunggulasum emas fam sehon etno ilitoho wanteg wilil, inolohore aphe neken welatusa-o.

⁸ Ariroho wilil, iniruk epmano hweap iniruk hag wilil, it inayeg wam singa ayeg neken welatusa-o.

⁹ Eke inamihoag fam sing bisuemanggen fam yihikon neken wilil, inaherabul une kereta wam kudaen walug larukon etno fam wim abuog ulug larukon une etno hag welatisi-o.

¹⁰ Eke it inahesele walo hukalo ahesele werehon etno hag wilil, etno fam bikalem fuaben angge wilil it aphe oloken suruk amag ulug inayeg bal inaptusa-o.

¹¹ Bal inaptuk heheg, at kwean kahaleg ambeg unde werehon etno inowe welatisi-o. Inowe werehon etno inuk it Ibrani inune fam Abadon, ari it Yunani inune fam Apoli­on, ari nit ninune fam Mialtukon ulug soaleg welatisi-o.

¹² Ariroho weregma, it horen bulue epmanowen aphe inayeg bal inap­tu­sama, olo­ken suru­sa-o. Misihim oloken suruk atusama, eke fobik birenam, henaha­nam oloken suhup-o, ulug inahla burusa-o.

¹³ Inahla buruk atu­sama, eke fobik at malaikat misihen ambing­gon uneap sirisi-o. Uneap suruk atisimu, nesanggo holtuk heheg, At Allah olohotma o At ake umburuk ambeg enggatgat femag fema­g epmanowen une misig irisi-o.

¹⁴ Une uruk atisireg, eke fobik une etnowen malaikat ambinggon senehon etno yig ituk wilil, “It malaikat inebe empat ik suon inuk Efrat etno ayegma hele ware­hon epmano hibilin-o,” ulug yig itisi-o.

¹⁵ Yig ituk atisimu, it malaikat inebe empat etano hele hibiltisi-o. Hibil­tuk atisimu, it malaikat inebe empat etanowen o ari sambit aphe anggolo war inabuog ulug surusa-o.

¹⁶ Suruk atusama, it inosi inebe dua ratus juta wereg-o, ulug yig nitusa-o.

¹⁷ Yig nituk atusama nilanggen isaruk heheg, it wam kuda inim, inamboloag fam laru­kon epmano inim obog sing wantehon waharusa-o. It waha­ruson epmano inasing nin olohore mebon wanteheg, eke nin olohore bohol sinon neken wanteheg, eke nin olohore selehenon wanteheg suruk atusa-o.

¹⁸ Ariroho surukmu, it inanggom kuda inungguluag wam singa neken wilil, inelmen hondok anggen wilik waharukon etno fam aphe war inabeheg, eke inahe walo ungguluag neken werehon etnowen aphe ayeg bal inabeheg surusa-o. Ariroho suruk wilil, inelmen hondok ambulpul inim, hubu inim, eke hondok anggen etno inim wilik waharisi-o.

¹⁹ Wilik waharuk atisimu, hondok ambulpul inim, hubu inim, hondok anggen inim etnowen inarisimu, aphe anggolo waratusa-o.

²⁰ Waratuk atusama, eke it nin iniluk welatuson epmanowen du Allah ilitoho ulug ininggi­ken haloko umburuson etno sohorep isarusa fug-o. Sohorep iseheg eleg wilil, iblis iren angge emas, perak inim, eke helep e inim fam halehon etno inilanggen wereg oke, yet isaruk elehon, ine­sanggo wereg oke holtuk elehon, iniog wereg oke laruk elehon epmano-at obam inindi ebetusa-o.

²¹ Ariroho ebetuk wilil, it aphe epmanowen ap war inabeheg, eke usa seheg, eke wanggik seheg, eke inalomnangge herahakeg surukon epmano sohorep isarusa fug-o.