Wahyu 8 - Allah Wene Hurumbik Keron

At Wam Domba Udag etnowen holal baleg hele homahowon misig yumbuk surukmu ilanggen hebahon wene 8:1-5

¹ Eke fobik At Wam Domba Udag etnowen holal baleg hele homahowon etno atog filon arat yumbuk suruk atisimu, setengah jam wereg heheg, boholmen yi angge di angge une obog eleg atisi-o.

² Eleg atuk atisimu, nilanggen haruk heheg, it malaikat inebe sabiren angge At Allah olohotma minduhuk werehon epmano inambing­gon sabiren angge og isarusa-o.

³ Og isaruk atusama, eke at malaikat misig ik oag emas fam halehon kemenyan umburukon etno inggikmu senoko waharuk atisireg, o Allah ake umburuk ambeg At horie uruk ambeg etno horogsoho etano waharisi-o. Waharuk atisi­mu, it Allah udaki epmanowen sembahyang urukon obam seberoho umbukag ulug kemenyan anggolo og ituk atusama, At Allah ake umburuk ambeg etnowen hondok yaltisi-o.

⁴ Yaltuk atisimu, keme­nyan etno hondok naruk wilil, hubu etno inim, eke it Allah udakien sembahyang urukon epmano inim, at malaikat Allah olohotma werehon etno inggik famen laharisi-o.

⁵ Laharuk atisimu, at malaikat etnowen ik oag kemenyan welatision etno waruk atisireg, hondok aro Allah ake umburuk ambeg yalepfirision etno ik oag fam imbirisi-o. Umburuk atisireg, ik oag etno inim leko kweanma hik harisi-o. Hik haruk atisimu, kweanmen o serlemban inim, sehenyabog inim, o yugul inim sirisi-o.

It malaikat etnowen inambinggon uneap su­rukmu ilanggen hebahon wene 8:6–9:21

⁶ Eke fobik it malaikat inebe sabiren angge epmanowen inam­binggon uneap suog ulug surusa-o.

⁷ Suruk atusama, at malaikat misig etno ambinggon uneap sirisi-o. Uneap suruk atisimu, osit haplanggen arikon etno inim, hondok ang­gen inim, mep inim obog-at dambuksoho kweanma belabik waharisi-o. Belabik waharuk atisimu, kweanmen o ahik biren sohorep isalug, misig hondoken obog narisi-o. Naruk wilil, e inim biren soho­rep iseheg, misig nenggeg sirisi-o. Suruk wilil, isinggangge obog narisi-o.

⁸ Naruk atisimu, eke fobik at malaikat misihen ambinggon uneap sirisi-o. Uneap suruk atisimu, dom suon enggabuk hondoken naru­kon etno ik laut ikma belabik wahari­si-o. Belabik waharuk ati­simu, ik laut namut biren sohorep isalug, misig mep sahal atisi-o.

⁹ Ariroho sahal atuk wilil, it ikma werehon epmano nin sohorep iseheg, nin war inabeheg sirisi-o. Ariroho suruk wilil, it so fam ikma larukon epmano inim nin sohorep iseheg, nin war inabeheg sirisi-o.

¹⁰ Ariroho suruk atisimu, eke fobik at ma­laikat misihen ambinggon uneap siri­si-o. Uneap suruk atisimu, soholoal suon etno hondok ambulpul neken naruk wilil, boholmen belabik waharisi-o. Belabik waharuk atisimu, ik larukon inim, eke ik eleruk inim, biren sohorep iseheg, misig sebe seheg sirisi-o.

¹¹ Ariroho suruk wilil, soholoal ari inuk Sihon soa­leg etno fam, ik induk sihepfirisimu, it apheyen ik sihon etno naruk atusama, inebe nin waratusa-o.

¹² Waratuk atusama, eke at malaikat misihen ambinggon uneap siri­si-o. Uneap suruk ati­simu, mo inim, bikalem soholoal inim femag fil kahaloko elehep­furuk atisimu, o seleg atukon etno minggiroko eleg atisi-o. Ariroho eleg atuk atisimu, ilingge minggiroko, hubanggo minggi­roko hik atisi-o.

¹³ Hik atuk atisimu, eke fobik sue mayo misig boholmen dahag suruk wilil, lenggaltukmu nilanggen harikik-o. Nilanggen haruk atikikmu, at sue etnowen une suon uruk wilil, “It aphe obog inabua-o. It malaikat hena­han epmanowen inambinggon etano uneap suruk isalug, it aphe kweanma werehon epmano oloken suruk wilil, inakol anggolo hahup-o,” ulug irisi-o.