Wahyu 7 - Allah Wene Hurumbik Keron

It Israel aphe inebe seratus empat puluh empat ribu wongga­leg weregma isebahon wene 7:1-8

¹ Eke fobik it malaikat inebe empat etano o kweanma eng­gatgat femag femag minduhuk weregma isarikik-o. Isaruk neyeheg, iren hiahne inebe empat epmano kweanma inim, ikma inim, onggama inim fil ha nowen ulug senetusa-o.

² Seneg weregma, at malaikat misi­hen it aphe du At Allah iluk werehon etno udaki at-o, ulug fuloko imbisiog ulug waharuk atisireg, eke it malaikat inebe empat o kweanma inim, ikma inim, dahapsukag ulug At Allahen minduhup isarision etano at malaikat misig etnowen yig isaruk wilil,

³ “It Allah anggimbu etno niren du Allahen angge-at ulug awan inilahoag fam holal umburuk eleg niseheg, hiren o kweanma inim, ikma inim onggama inim dahapsuk fug-o,” ulug yig isari­si-o.

⁴ Yig isaruk atisimu, eke it du At Allahen ang­ge-at ulug inila­hoag fam holal umburuson etno it Israel aphe inebe sera­tus empat puluh empat ribu inungguluag obog holal umburusa ulug yig nitisi-o.

⁵ Yig nituk atisimu, eke it inungguluag Yehuda ap epmano inebe dua belas ribu inim, eke it inungguluag Ruben ap epmano inebe dua belas ribu inim, eke it inungguluag Gad ap epmano inebe dua belas ribu inim,

⁶ eke it inungguluag Asyer ap epmano inebe dua belas ribu inim, eke it inungguluag Naftali ap epmano inebe dua belas ribu inim, eke it inungguluag Manasye ap epmano inebe dua belas ribu inim,

⁷ eke it inungguluag Simeon ap epmano inebe dua belas ribu inim, eke it inungguluag Lewi ap epmano inebe dua belas ribu inim, eke it inungguluag Isakhar ap epmano inebe dua belas ribu inim,

⁸ eke it inungguluag Zebulon ap epmano inebe dua belas ribu inim, eke it inungguluag Yusuf ap epmano inebe dua belas ribu inim, eke it inungguluag Benyamin ap epmano inebe dua belas ribu inim, inilahoag fam holal etno umbu­rusa-o.

It aphe obog wonggaleg weregma isebahon wene 7:9-17

⁹ Eke fobik an nilanggen haruk heheg, it aphe obog wanereg eleg wonggaleg welatusa-o. Wonggaleg welatusa ari, o ahik ya da inune urukon inim, o kweanma inungguluag obog inim wonggaleg welatusa-o. Ariroho wilil, At horie uruk ambeg etno inim, At Wam Domba Udag etno inim inolohotma minatuk atusareg, inasum huluon wanteg wilil, ininggikmu werale engga hahon etno dikiksoho seneg welatusa-o.

¹⁰ Seneg wilil, di misig urusa-o, di etno uruk wilil, “At Ninikni Allah etno inim, eke At Wam Domba Udag etno inimen ninili webag-o,” ulug di etno urusa-o.

¹¹ Uruk weregma, it malaikat obog epmanowen At horie uruk ambeg etno inim, it penatua epmano inim, eke it inebe empat iniluk were­hon epmano inim dahagsoho minduhuk wilil, inolohore wanduksoho At horie uruk ambeg epmano olohotma ying atuk atusareg, At Allah obam sembahyang uruk wilil,

¹² “Ninikni wa. Hat hoag werehon wilil hakeleg-at suon welahen-o. Eke Hat yi angge di angge obog hiluk wilil, sukfugangge elalintoho suruk ahenon ari fam Hat hinuk-at nintul nantul suontepfuruk amuhuk-o, ulug nit demat uruk ahe-o,” ulug di etno urusa-o.

¹³ Uruk atusama, at penatua misig etnowen yig nituk wilil, “lt aphe inasum huluon wantehon du inebe kemen waharusa-o? Eke inebe sandeg-o?” ulug yig nituk atisimu,

¹⁴ eke anden yig ituk wilil, “Nowe, an napeleg-o, Hat-at hiluk-o,” ulug yig iti­kik-o. Yig ituk atikikmu, eke Aren yig nituk wilil, “It aphe du dahon inobam umburuson oke, inili holaruk atusareg waharusa-o. Eke it epmano inasum sabele horoho Wam Domba Udag amep etno fam hulu amag ulug are surusa-o.

¹⁵ Are­repfuruk atusareg, it etno At Allah horie uruk ambeg olohot­ma minduhuk wilil, nintul nantul At ibam eyabuk suruk-o. Eke At horieg werehon etno inim wilil, inili waruk aruhu-o.

¹⁶ Inili waruk weregma, ik obok heheg, orom obok heheg, eke mo olok heheg, hondok olok heheg suruk amuhup fug-o.

¹⁷ Eke At Wam Domba Udag horie uruk ambeg bulmu werehon etnowen inaso wilil, it epmano ik fanowon ilukon elerukmu epmano nawag ulug og inaplug laruk aruhu-o. Og inaplug larukmu, eke At Allahen inil ambusu ho inaptuk aruhu-o,” ulug yig nitukmu nesanggo holtikik-o.