Wahyu 6 - Allah Wene Hurumbik Keron

At Wam Domba Udag etnowen holal baleg hele homahowon etno yumbuk surukmu ilanggen hebahon wene 6:1-17

¹ Eke fobik nilanggen haruk neyeheg, At Wam Domba Udag etno holal baleg hele homahowon etno misig yumbuk suruk atisimu, it inebe empat iniluk werehon etano at misihen une suon o serlemban neken yig nituk wilil, “Hat hebe ma-o,” ulug yig nituk atisimu, nilanggen harikik-o.

² Nilanggen haruk neyeheg, at wam kuda huluon misig waharisi-o. Waharuk atisimu, at ap misig wam ambo­loag fam larukon etno sehen inggikmu weregma, unggulasum fano­won etno og itusa-o. Og ituk atusa­ma wim inim abuog ulug wilip atisi-o.

³ Wilip atuk atisimu, eke At Wam Domba Udag etnowen holal baleg hele homahowon etno misig yumbuk suruk atisimu, it inebe empat iniluk werehon epmano at misihen yig nituk wilil, “Ma-o,” ulug yig nituk atisimu,

⁴ wam kuda misig olohore mebon etno waharisi-o. Waharuk atisimu at ap misig wam amboloag fam larukon etno karog suon etno og ituk atusama, it aphe kweanmon epmanowen wim suruk wilil, at misihen warepfeheg, at misihen warepfeheg suruk amag ulug lahapfurusa-o.

⁵ Lahapfurusama, eke At Wam Domba Udag etnowen holal baleg hele homahowon etno misig yumbuk suruk atisimu, it inebe empat iniluk werehon epmano misihen yig nituk wilil, “Hilanggen hamihinen ma-o,” ulug yig nituk atisimu, wam kuda sinon etno waharisi-o. Waharuk atisimu, eke at ap misig wam amboloag fam larukon etnowen alanggin surukon etno misig inggikmu seneg weregma hari­kik-o.

⁶ Haruk atikikseg, nesanggo holtuk neyeheg, it inebe empat iniluk werehon inanggelegmen une misig uruk wilil, “Uang anggolo fam wirlin gandum dorat onggo balukon wereg-o. Eke e anggen ambusu etno inim, eke anggur ambusu etno inim dahapsuk fug-o,” ulug irisi-o.

⁷ Uruk atisimu, eke At Wam Domba Udag etnowen holal baleg hele homahowon etno misig yumbuk suruk atisimu, it inebe empat iniluk werehon epmano misihen yig nituk wilil, “Hat hilanggen hamihinen ma-o,” ulug yig nituk atisimu,

⁸ wam kuda iruk olohore dahon etno waharisi-o. Waharuk atisimu, at ap misig wam amboloag fam larukon etno inuk Waratukon ulug soaleg welatisi-o. Ariroho soaleg weregma, eke at ap misig it aphe warehon imbisaruk ambeg unde werehon etno ombolim waharisi-o. Waharuk atisireg, it biren epmanowen o kweanma o ahik henahan sohorepfiseheg, eke misig karog fam war inabeheg, eke orom obok angge inobam embeheg, eke uk olokon inobam embeheg, eke bak onggama werehon epmano elehep iseheg suruk amag ulug lahap isaru­sa-o.

⁹ Lahap isaruk atusama, eke At Wam Domba Udag etnowen holal baleg hele homahowon misig yumbuk sirisi-o. Yumbuk suruk atisimu, eke At Allah ake umburuk ambeg apma epmano it aphe Allah wene eberoko waruk wilil demat ulug yig isaruk apagma war inapahon epmano inahut weregma isarikik-o.

¹⁰ Isaruk atikik­mu, it epmanowen inune suon yig ituk wilil, “Ninikni suon hoag werehon du wai. It aphe o kweanmen war inaptuk apahon epmano oke iren surukon etno inaren baloko o dagma imbisahun-o?” ulug uruk atusama, it obog inasum huluon og isarusa-o.

¹¹ Og isaruk atusareg, yig isaruk wilil, “Hit war hinapag epmano hag hinomini nin awan war inabukon etno aso wilil, sat kelsaruk amuhup-o,” ulug yig isarusa-o.

¹² Yig isaruk atusama, eke fobik At Wam Domba Udag etno holal baleg hele homahowon etno misig yumbuk surukmu harikik-o. Haruk atikikmu, fobik o yugul suon misig sirisi-o. Ariroho suruk atisimu, eke mo ilanggen mondog sinon aheg, eke bikalem ilanggen mep sahal aheg sirisi-o.

¹³ Ariroho suruk atisimu, eke e soglarle hiahneyen fil harukmu laheg waheg suruk wilil, anggen wirik atukon loloko amburuk etno hag, soholoal epmano boholmen kweanma ambik waharusa-o.

¹⁴ Ambik waha­ruk atusama, eke sum yinggiloko umburuk etno hag, bohol ebe eleg atisi-o. Eleg atuk wilil, dom inim, o ik anggenma werehon inim obog akeleg sik ya umbulug da umbulug seg atisi-o.

¹⁵ Ariroho seg atuk atisimu, it o kweanma inowesi suon epmano inim, it sehen senehon inowesi epmano inim, eke it inaharek were­hon epmano inim, eke it inoag werehon epmano inim, eke it yi aphe di aphe obog inim, eke it iniknisi inanggimbu epmano inim obog-at o wikelma heraharik laheg, dom alma heraharik laheg suruk atusareg,

¹⁶ it helep inim, dom inim inune suon yig isa­ruk wilil, “At horie urukon etnowen ninebe heag ninaptukmu, At Wam Domba Udag etnowen o dagma ninombisahuk nowen ulug, hiren seberep nisahalug ninebe herahap nisahiek-o.

¹⁷ Iren dahon ninobam umbukon etno horog fanggog ehekseg fam, it ari bok amag ulug ap sen yig isikon-o?” ulug urukmu nesanggo holtikik-o.