Wahyu 5 - Allah Wene Hurumbik Keron

At Wam Domba Udag etnowen holal baleg hele homahowon etno warukmu ilanggen hebahon wene 5:1-14

¹ Eke fobik At horie uruk ambeg werehon etnowen holal femag femag balegma, yinggiloko hele sabiren angge homahowon etno inggik bikit fil seneg weregma harikik-o.

² Haruk atikikseg, eke fobik it malaikat inowe misig etnowen une suon uruk wilil, “Holal baleg hele homahowon du ap sen oag weregsoho hele hibiloko umbuk-o?” ulug uruk atisimu,

³ boholmen inim kweanmen inim, eke kwean apmen inim holal baleg etno hibiloko wanesukag ulug ap misig heaharuson oke, ebe heaharusa fug-o.

⁴ Ebe heaharusa fugmu, an ioba anggolo yatikik-o.

⁵ Ioba yatuk atikikmu, eke it penatua misig etnowen yig nituk wilil, “Hat ioba yabuk imbi­salug, hilanggen yet himin-o. At Daud etamu suon ungguluag Yehuda ap oag wam singa neken werehon etno anduhunmu suon atisireg fam, holal baleg du hele homahowon sabiren angge etno yumbuksoho hibiluk oag wereg-o,” ulug yig nitisi-o.

⁶ Yig nituk atisimu, Wam Domba Udag neken horie uruk ambeg bulmu minduhuk wereg heheg, it inebe empat iniluk werehon epmano inim, eke it penatua epmano inim dahagsoho weregma isarikik-o. Isaruk wilil, eke Wam Domba Udag etno warapahon neken wereg harikik-o. Haruk wilil, Wam Domba Udag etno ungguluagma ayeg sabiren angge lahabehon etno inim, eke At Allahen angge ahurangge inebe sabiren angge o kweanma lahabik waharision epmano ilitoho ulug ilanggen sabiren angge epmano inim weregma harikik-o.

⁷ Haruk atikikmu, At Wam Domba Udag etno waharuk atisireg, At horie uruk ambeg werehon etnowen holal baleg etno inggik bikit fil seneg weregma holarisi-o.

⁸ At Wam Domba Udag etnowen hola­ruk atisimu, it inebe empat iniluk werehon epmano inim, eke it penatua inebe dua puluh empat epmano inim At Wam Domba Udag etno ambeg inindibahal yungguksoho horie uruk wilil, binggon inuk kecapi etno inim, eke At Allah udakien sembahyang urukon epmano ilitoho ulug ik oag emas fam sehon etno inim ininggikmu senetu­sa-o.

⁹ Ininggikmu senetuk atusareg, di keron misig uruk wilil, “Hat hag holal baleg etno walug, hele homahowon etno yumbuk suk hoag wereg-o. Hat hebe howatuk apagma, aphe inake waratuk senareg fam, o ahik ya da inune inakeleg sik urukon inim, inungguluag dombog yi aphe di aphe obog inim At Allah og umon in­onggo baliog ulug amburuk senag-o.

¹⁰ Ariroho amburuk senareg fam, it hudaki epmano At Allah anggimbu wilil, eyabuk fanowon etno suruk amag ulug minduhup isaruk senag-o. Ariroho minduhup isaruk senareg fam, o kweanma epmen suon neken-at welamuhup-o,” ulug di misig etno urusa-o.

¹¹ Uruk atusama, eke fobik it ma­laikat inebe anggolo beribu-ribu, sepuluh ribu neken waharuk atus­areg, At horie uruk ambeg werehon etno inim eke it inebe empat iniluk werehon epmano inim, eke it penatua inebe dua puluh empat epmano inim dahagsoho minatuk atusareg,

¹² di misig inune suon uruk wilil, “Wam Domba Udag etno waroko embebahon oke, niren kidia At oag werehon etno inuk suontepfuk-o. At ebe etno yi angge di angge obog-at unde wilil, indimu ilukon etno niren Ninowe suon ulug inuk suontepfuk-o,” ulug di etno uruk atusama,

¹³ eke fobik boholmon inim, kweanmon inim, kwean apma werehon inim, eke ikma werehon inim, yi angge di angge wal hebahon epmano obohen di misig uruk wilil, “At Ninikni horie urukon etno inim, eke At Wam Domba Udag etno inim, inoag werehon inalon wereg isalug, nintul nantul-at ininuk suontepfuruk amuk-o,” ulug di etno uruk atusama,

¹⁴ eke it inebe empat iniluk werehon etanowen, “Amin, demat-o,” ulug urusa-o. Uruk atusama, it penatua inebe dua­puluh empat epmano inolohore wanduksoho sembahyang uruk atusa-o. Urukmu an nesanggo holtikikseg, obog holal ari imbirikik-o.