Wahyu 4 - Allah Wene Hurumbik Keron

Boholmen sembahyang urukmu ilanggen hebahon wene 4:1-11

¹ Eke fobik ni og haruk wilil, boholma sok husig weregma harikik-o. Haruk wilil, bilin une misig binggon suon une neken yig nitision etno fobik inim yig nituk wilil, “Hat hebe duma lahik wapmihinmu, fobik suhuon etno yanggul hipmin-o,” ulug yig nituk atisimu, At Roh Kudus etno nindimu kirisi-o.

² Nindimu kirisimu, anden nilanggen harikikon etno yig hisik-o, o bohol­ma horie uruk ambeg suon etno fam ap misig horieg welatisi-o.

³ At horieg welatision etno olohore helep fanowon neken libil labal suruk atisi-o. Ariroho surukmu, At horie uruk ambeg etno walobikal neken mase sirisi-o.

⁴ Mase surukmu, eke At horie uruk ambeg etno horogsoho it penatua epmano inasum huluon yiko inunggulasum emas fam sehon epmano wanteg wilil, inebe dua puluh empat it horie urukon epmano fam dahagsoho horieg weregma isarikik-o.

⁵ Eke At misig etno horie uruk ambeg ho­rogsoho etanowen sehenyabog yibareheg, eke yi une di une eheg, eke serlemban suon subuleheg surukmu nilanggen harikik-o. Eke misig, At etno horie uruk ambeg etanowen At Allahen Ahurangge inebe sabiren angge etno eral neken fisaho weregma isarikik-o.

⁶ Eke misig, At etno horie uruk ambeg olohotmen ik namut il fanowon neken weregma harikik-o. Eke misig, At horie uruk ambeg enggat­gat femag femahen it inebe empat iniluk werehon epmano inilanggen inungguluagma obog dahagsoho weregma isarikik-o.

⁷ Isarikikon ari, at misig wam singa olohore neken harikik-o. Eke at misig wam sapi udag olohore neken harikik-o. Eke at misig ap inoloho­re neken harikik-o. Eke at misig sue findibeng olohore neken harikik-o.

⁸ Eke it inebe empat iniluk werehon epmano sue ilitoho inaherabul enggalimen angge weregma, femag femag anduhunmu apma inilanggen wereg harikik-o. Eke it epmanowen ilikia hupmu di uruk wilil, “At Ninikni Allah suon alon wereg-o. At ebe etno bilin welapag, kidia wereg, fobik welaruhuon at-o,” ulug di urusa-o.

⁹ Eke it inebe empat iniluk werehon epmanowen At horie uruk ambeg etno fam wilil, itog mondog werehon etno wa ulug inuk suontep­furuk iseheg,

¹⁰ it penatua inebe dua puluh empat epmanowen At horie uruk ambeg werehon etno olohotma inolohore wanduksoho ying atuk wilil, At itog mondog wereg etno inuk suontepfurusa-o. Suontepfuruk wilil, it inunggulasum etno At horie uruk ambeg etano olohot fil koroko umburusa-o.

¹¹ Umburuk atusareg, di watuk wilil, “Ninikni Allah wa. It aphe obohen Hat hebe wa ulug suontep hahu­kag-o. Eke Haren yi angge di angge obog wal haruk senag etno fam, hahla bulug yi angge di angge obog iniluksoho imbisaruk senag-o,” ulug di misig urukmu isarikik-o.