Wahyu 18 - Allah Wene Hurumbik Keron

O Babel suon etno bule amburukmu ilanggen hebahon wene 18:1–19:4

¹ Eke fobik malaikat misig boholmen ambik waharukmu, ni­lang­gen harikik-o. Ambik waharisireg, ebe suon wilil, at apinag etno kweanma obog yangguk atisi-o.

² Yangguk atisimu, at ma­lai­kat etnowen une suon uruk wilil, “Babel suon etno bule ambe­hek­ma, it iblis etno inim, it inahurangge dahon epmano inim, o Babel olunmu epmano wereg-o. Eke yi sue di sue obog dahon epmano wereg-o.

³ Eke it kweanmon inowesi suon epma­no inim, it inaharek anggolo amag ulug onggo hundutukon epmano obog-at inilag warisi halug, bule ambehek-o,” ulug at malaikat etnowen irisi-o.

⁴ Ariroho uruk atisimu, eke fobik boholmen une suon uruk wilil, “Nudaki-o, hit o epmen wilik maniek-o. At hwe duen dag surukon etno hit ilitoho sirikip fug halug, at obam dahon etno umburukon hinobam umbuk nowen-o.

⁵ Aren yi dag di dag obog suruk atisireg fam, eke kidia At Allahen onggo dahon etno obam umburuk-o.

⁶ Eke at hwe etnowen war hinaptisi etno hag, eke hiren watuk amiek-o. Aren hit ik dahon etno nawag ulug og hisa­risi etno hag, eke ik dahon etno nawag ulug hiren obam seberoho og imiek-o.

⁷ At etno bilin aharek suon welatisi etno, kidia doron wilil, ioba yabukag-o. Eke aren bilin suontepataruk wi­lil, “An hwe suon-at wilil, suhweon neken welaruhuk fug-o. Ioba yatuk aruhuk fug-o, ulug aren bilin suontepatarision oke, eke kidia o misihim-at mial arikon-o.

⁸ Uk olokon etno inim, ioba yabukon etno inim, orom obok angge etno inim haruk heheg, ebe obog-at hondoken nikon-o. At ebe oag deltukon At Allah suon-at wereg-o,” ulug une etnowen irisi-o.

⁹ Ariroho uruk ati­simu, eke it aphe kweanma inowesi suon inim dag suruson etno o Babel hondoken narukmu inilanggen harusareg, ioba anggolo yatu­sa-o.

¹⁰ Ioba yatuk atusareg, o Babel hondok nawon etno inako­len inebe yatma larusareg, uruk wilil, “O Babel du habua-o. Bilin suon hoag wereg welatikinon oke, kidia jam misig fam dahon etno hobam aha-o,” ulug urusa-o.

¹¹ Ariroho uruk atusama, eke it kweanmen onggo hundutukon epmanowen inim-at abuen ioba yatu­sa-o.

¹² Ioba yatusareg, it etnowen uruk wilil, “Yi angge di angge fanowon inim, emas eke perak inim, ebe yaha inim, sum oloho­re yion dion epmano inim, yi angge di angge e fam sehon inim, yi angge di angge bisuemanggen fam sehon inim,

¹³ hinde bingga saho inim, e anggen ambusu induk fanowon epmano inim, sak maho neken etno inim, biye maho inim, wam inim, eke wam sapi domba inim, wam kuda kereta epmano inim, aphe inebe inim, it inanggimbu epmano inim, yi angge di angge obog epmano kidia hundubuk soho­rep isehek-o,” ulug ioba yatuk wilil urusa-o.

¹⁴ Uruk atusareg, eke it onggo hundutukon etnowen o Babel etno yig ituk wilil, “Yi angge di angge hindien suruk atikibon epmano eleg aha-o. Eke haharek bilinon etno mondog eleg ahama, fobik heahakun fug-o,” ulug yig itusa-o.

¹⁵ Yig ituk atusama, it nin bilin o epmen hundutuk wilil inaharek anggolo holaruson epmano o Babel hondok nawon etno inakolen inebe yatma larusareg, it etnowen obok yatuk wilil,

¹⁶ “O suon Babel du abua-o. Bilin asum olohore yion dion inim, senggan laikmanggo fanowon inim wanteg welatision oke, eke kidia jam misig fam aharek obog eleg aha-o,” ulug urusa-o.

¹⁷ Uruk atusama, eke fobik it so watukon etno inim, it so fam larukon etno inim, it ikma ikan watukon etno inim it obohen inebe yatma-at wilil,

¹⁸ o Babel etno hondok narukmu inilanggen yet haruk atusareg, it etnowen uruk wilil, “O suon Babel hahon misig welatisi fug-o,” ulug abuen uruk atusareg, ul inung­guluagma umburuk atusa-o.

¹⁹ Umburuk atusareg, ioba anggo­lo yatuk wilil, “O Babel suon du abua-o. It bilin ik laut ikma so etno fam o Babel laheg waheg suruk wilil inaharek anggolo atuson oke, kidia o Babel etno jam misig fam aharek obog eleg aha-o,” ulug urusa-o.

²⁰ Ariroho uruk atuson oke, eke hat bohol inim, hit At Allah udaki inim, eke hit mondep hisahabahon etno inim, eke hit nabi ap Allah wene yig isaruk ahebon etno inim, hit obog hinahien haruk amiek-o. Eke o Babel etno mialtuk wi­lil, “aren dahon hinobam hinombisaharision etno onggo At Allahen oag deloko dahon etno obam embehek-o. Ari halug, hit hinahien haruk amiek-o,” ulug uruk atusa-o.

²¹ Ariroho uruk atusama, eke at malaikat suon misihen helep suon misig hambogsoho waruk atisireg, ik laut ikma hik isarisi-o. Hik isaruk atisireg uruk wilil, “Kidia helep du hik isihi etno hag, fobik o Babel suon etno noag weregsoho hik isaruk apminmu, inilanggen eleg hahup-o.

²² Eke o Babel epmen bilin it inambinggon uneap surusa etno hag, fobik ariroho suhup fug-o. Eke o epma wilil, it ninen yabuk inim suhup fug-o.

²³ Eke eral fisaho etno epma welaruhu fug at-o. Eke o Babel epmen aben hwe holahup fug at-o. Eke it nin o Babel epmen onggo hundutuk wilil, inaharek anggolo holaruson oke, it yi aphe di aphe obog inenggal-at yig isaruk atu­sa-o,” ulug at ma­laikat etnowen irisi-o.

²⁴ Ariroho uruk atisi­mu, eke it nabi ap inim, it Allah udaki inim, eke it yi aphe di aphe kweanmen war inaptuson epmano inim, o Babel etnowen war inaptu­sa halug, At Allahen o etno mialoko imbirisi-o.