Wahyu 17 - Allah Wene Hurumbik Keron

O ahik suon etno dahon obam umburukmu ilanggen hebahon wene 17:1-18

¹ Eke fobik it malaikat inahik oag olokon senetuson etno misig nambeg waharisireg, yig nituk wilil, “Ma-o. Ik anggenma o ahik suon inibam anggolo falehon etno yanggul hipmin-o. Eke o ahik suon ari, aphe o kweanmon obog inilag warukon neken welatision etno dahon obam umburukmu anden yanggul hipmin-o.

² Eke at o ahik suon etnowen it o kweanma inowesi suon etno inilag waruk heheg, it aphe kweanmon ambusu dahon etno narusareg fam, obog-at nenek neken surusa-o,” ulug yig nitisi-o.

³ Yig nituk atisimu, At Roh Kudus omalaikat etnowen og naplug o limu aphe eleg ambeg epmano nom­bahik larisi-o. Nombahik laruk atisimu, at hwe misig walo suon etno amboloag fam horieg weregma, nilanggen harikik-o. Walo nilanggen harikikon etno olo­hore mebon wilil, yi dag di dag surukon epmano ininuk holal obam baleg weregma harikik-o. Eke walo ari ungguluag sabiren angge etno inim, ayeg ungguluag famen wili­bohon nomaloen angge etno inim weregma nil harikik-o.

⁴ Eke ambolo­ag fam hwe misig horieg weregma harikikon etno ebema sum huluon wanteg wilil, inggikmu obene yi angge di angge fanowon epmano senggan laikmanggo wanteg wilil weregma nilanggen harikik-o. Eke hwe etno inggikmu ik oag emas fam sehon etno weregma, inilag warisi onggo ulug yi angge di angge dahon epmano og ituson etno ik oag ari fam weregma harikik-o.

⁵ Eke nin hwe etno ilahoag fam inuk herahowon holal baleg weregma harikik-o, inuk ari Babel suon, it inilag warukon etno inim, it kweanmen dag surukon epmano inim inisina du at-o ulug holal baleg etno weregma harikik-o.

⁶ Eke nin at hwe etnowen At Allah udaki inim, eke At Yesus une waru­kon epmano inim anggolo war inaptisireg inamep at inggikmu weregma harikik-o. Ariroho weregma haruk atikikseg, nakol hari­kik-o. Nakol haruk neyeheg, at malaikat etnowen yig nituk wi­lil,

⁷ “Hakol ari keroho ulug haruk ahen-o?” ulug yig nituk ati­sireg, nin dahagsoho yig nituk wilil, “At hwe etno inim, walo suon yaruko walug larukon etno inim, wene undama ebe du weregma yig hipmin-o.

⁸ Walo ebe hehe­non ari, bilin iluk welatisireg, waratisi-o. Waratision oke, kwean kahaleg ambehen lahik waha­ruk arikonma, fobik mondog warepfikon-o. Eke it aphe o kweanmon buku iniluk welamon etno fam ininuk holal baleg elehon etnowen walo suon etno ebe inil hukonteg, inakol hukon-o. Inakol hukon ari, walo suon etno bilin iluk welatisireg, eke fobik waratisi­on etno iluk ahareg warikon etno fam inakol hukon-o.

⁹ Eke misig ari yanggul hip­min-o. Walo ungguluag sabiren angge ari, bunu sabiren anggen at hwe etno horieg werehon etno ilitoho wereg-o. Eke misig ari, it inowesi inebe sabiren angge etno ilitoho wereg-o;

¹⁰ inowesi inebe sabiren angge ari, inebe fuaben angge arat bule amburusa-o. Eke at misig kidia wereg-o, eke at misig fobik dorat welariug ulug waruhu-o.

¹¹ Eke walo suon iluk wela­tisireg war atision etno inowesi sabiren angge etno inomin sirehon etno wilil, fobik waruhumu, eke fobik warepfuhu-o.

¹² Eke misig ari, walo ayeg ungguluag famen wilibohon etno ilito­ho it inowesi nomaloen angge fobik welamuhubon etno wereg-o. Eke fobik it inebe nomaloen angge epmano waharuk amuhupseg, walo suon etno inim wilil, jam misig inim welamuhup-o.

¹³ Ariroho welamuhupseg, eke fobik it obog etno ilitoho-at suog ulug inebe suon oag werehon wela­mon etno at walo inggikmu umbuhup-o.

¹⁴ Ariroho suhubon-at oke, fobik At Wam Domba Udag etno inim wim abuhup-o. Wim abuhubon oke, eke At Wam Domba Udag etno it yi aphe di aphe obog Inowe suon welaruhu ari fam, At udaki heako imbisarision epmano inimen walo suon etno osi inim mondog war inaptuk amuhup-o,” ulug yig nitisi-o.

¹⁵ Yig nituk atisireg, eke fobik at malaikat etnowen yig nituk wilil, “Ik anggenma o ahik suon inibam anggolo faleg hehe­non etno ari, it o ahik ya da inungguluag dombog, inune yion dion urukon epmano ilitoho-at wereg-o.

¹⁶ Eke walo ayeg nomaloen angge werehon etno inim, at walo suon etno inim hilanggen isehenon etnowen hwe inilag warukon etno inambit ha­hup-o. Inambit haruk wilil, hwe etno aharek obog holahupseg, eabie-at sohorep isahup-o. Sohorep isaruk amuhupmu, ebe inu hondoken nahu-o.

¹⁷ Eke At Allahen ahla burukon etno ilitoho suruk amag ulug seko imbisarisireg fam, iren inindi misig wilil ilitoho-at suruk amuhupseg, at walo suon etno ang­gimbu wilil, it inowesi suon welamon etno at walo inggikmu umbuhup-o.

¹⁸ Ariroho-at suruk amuhubon oke, eke fobik At Allahen hurumbik ebahon etno demat seg aruhu-o. Eke hwe ebe hehenon ari, o ahik suon etno ilitoho wilil, it kweanmon inowesi suon epmano inisi­na-at wereg-o,” ulug yig nitisi-o.