Wahyu 15 - Allah Wene Hurumbik Keron

It malaikat inasine werehon epmano ilanggen isebahon wene 15:1-8

¹ Eke fobik boholma nilanggen lahap haruk atikikmu, it malaikat inebe sabiren angge inasine werehon epmano weregma nilanggen isarikik-o. Nilanggen isarikikon ari, At Allahen aphe war inabukon etno atog neken-at war inabuog ulug surusa-o.

² Ariroho suruk atusama, eke fobik ik laut ikma, hondok ambulpul inim eke ik inim dahagsoho weregma isarikik-o. Nilanggen isaruk atikikseg, eke fobik it aphe walo iblis inim, eke walo ilitoho ebe suruson epmano inim, eke at misig aholal enam ratus enam puluh enam werehon etno inim ininuk warusa fuhon epmano ik ayegma epmano minduhuk weregma isarikik-o. Nilanggen isaruk heheg, At Allahen inambinggon gitar hahon etno og isarisi-o.

³ Og isaruk atisimu, eke it epmanowen at Musa Allah anggimbu etno inim, eke At Wam Domba Udag etno inimen di uruson etno iren uruk wilil, “Ninikni suon Allah wai. Haren sukfuganggeroho suruk ahen etno fanowon demat suruk ahen-o. Ari halug, it yi aphe di aphe Inowe suon Hat-at welahen-o, Ninowe.

⁴ Eke Hat akol hearuk elehon misig wereg ano? Eke Hat hinuk suontepfuruk elehon misig wereg ano? Hat hebe suon hoag werehon-at welahen-o. Eke it yi aphe di aphe inungguluag dombohen Hat fanowon suruk ahenon etno inilanggen hearuk atusareg fam, Hat hambeg waharuk amuhupseg, Hat holohotmen hinuk fam sembahyang uhup-o,” ulug di etno urusa-o.

⁵ Di etno uruk atusama, boholma o Allah ibam sok husig weregma nilanggen lahap harikik-o.

⁶ Nilanggen lahap haruk atikikmu, it malaikat inasine werehon inebe sabiren angge etano o Allah ibam epmen wilik waharusa-o. Wilik waharuk wilil, inasum huluon wantoho inaserlog emas fam inindike wantoho welatusa-o.

⁷ Ariroho weregma, it inebe empat iniluk werehon epmano at misihen it malaikat inahik oag seneg weregma, At Allah itog mondog werehon etnowen aphe war inabukon ulug ambusu sihon etno deltisi-o.

⁸ Delepfuruk atisimu, At Allah suon oag wereg-o, ulug o Allah ibam etno hondok hubu sahaloko keleg atisi-o. Keleg atisimu, it malaikat sabiren angge inasineyen awan suruk eleg iseheg, o Allah ibam etno kukon hondok hubu etno fam hai atisi-o.