Wahyu 13 - Allah Wene Hurumbik Keron

Walo biren ilanggen isebahon wene 13:1-18

¹ Eke fobik walo suon misig ik laut ikmen lahik waharuk­mu nil harikik-o. An nilanggen haruk heheg, walo etno ayeg unggu­luagmen lahabehon nomaloen angge etno inim, eke ungguluag sabiren angge werehon etno inim, eke ungguluag sabiren angge etno fam inuk dahon holal balehon inim welatisi-o.

² Ariroho wilil, walo etno ebe wam harimau etno hahon, at iog wam beruang etno ha­hon, at ambilik wam singa hahon weregma harikik-o. Nil haruk atikikmu, at walo iblis etnowen walo suon etno ilitoho oag wereg amag ulug inggikmu imbirisi-o.

³ Inggikmu umburuk atisimu, at walo suon etno ungguluag misig-at wapahon oke, fano apareg ahambut weregma harikik-o. Ariroho haruk atikikmu, eke it aphe kweanmon obog epmanowen wi ulug fog suruk atusareg, walo suon etno mutlug larusa-o.

⁴ Mutlug laruk atusareg, it obog epmano­wen uruk wilil, “At walo iblis etnowen eke walo suon etno oag weregsoho minduhupfirisi-o,” ulug iblis etno inuk suontepfuru­sa-o. Suontepfuruk atusareg, at walo suon etno farim uruk wi­lil, “Walo suon etno ap sa ilitoho weregma, sa inim wim abukon-o?” ulug uruk atusareg, inuk suon­tepfurusa-o.

⁵ Suontep­furuk atusama, at walo suon etno bikalem empat puluh dua wilil, une dahon eheg, ahlahiroho seheg suruk atisi-o.

⁶ Ariroho suruk wilil, At Allah ebe inim eke inuk inim, eke At wereg ambeg inim, eke it boholma werehon obog inim, at walo suon etnowen une dahon inobam imbirisi-o.

⁷ Umbu­ruk atisireg it Allah udaki inim, eke it o ahik ya da inune yion dion urukon inim war in­abiug ulug sirisi-o.

⁸ Ariroho suruk atisimu, eke it aphe kwe­anmon epmanowen inuk suontepfuru­sa-o. It ariroho suontepfuruson ari, bilin o kweanma awan wal ­haruk elegma At Wam Domba Udag wapahon etnowen angge aphe ini­luk welamon buku holal embebahon etno fam ininuk elehon halug, iren walo suon etno inuk suontep­furusa-o.

⁹ Eke hit hinesanggo wereg halug, fanoroho holtuk amiek-o.

¹⁰ Ap misig senoko hele wabuhup ulug holal baleg etno wereg halug, fobik hele wabuhup at-o. Eke ap misig karog fam wabuhup ulug, holal baleg etno wereg halug, karog fam wabuhup at-o. Ari halug, hit Allah uda­kion epmano hinindi seberoho wilil, At Yesus inuk eberoko waruk amuk-o.

¹¹ Eke fobik walo misig kweanmen lahik waharukmu ni­langgen harikik-o. Nilanggen haruk heheg, at walo etno wam kambing ayeg ungguluagmen laha­behon etno ilitoho ayeg biren ungguluagmen lahabeg wilil, une suon-at irisi-o.

¹² Ariroho uruk wilil, walo bilinon etno ili­toho-at oag werehon suon-at welatisi-o. Ariroho welatisireg fam, it aphe o kweanma werehon epmano obog yig isaruk wilil, “At walo suon misig ungguluag aham­but werehon etno-at eberoko waruk amiek-o,” ulug yig isarisi-o.

¹³ Yig isaruk atisireg, at walo etno sukfugangge suon etno-at sirisi-o. Ariroho suruk wilil, it aphe obog inil fam boholmen hondok ambulpul etno kweanma belabik waharisi-o.

¹⁴ Belabik waharuk atisireg, at walo bilinon etno inim wilil, sukfugangge suon etno suruk ati­sireg, it aphe obog at enggal-at yig isari­si-o. Ariroho eng­gal-at yig isaruk atisireg, eke fobik it aphe kweanmon epmano obog-at yig isaruk wilil, “Walo suon ungguluag karog fam baloko warepfebahon etno oke, iluk werehon etno inuk suontepfukag ulug ebe misig ilitoho siek-o,” ulug yig isaruk atisimu etno ilitoho-at surusa-o.

¹⁵ Suruk atusama, at walo etnowen walo suon neken ebe ilitoho suruson etno obam fu haruk wilil, ilukap siog ulug sirisi-o. Ariroho suruk atisimu, at walo suon neken ebe ilitoho suruson etnowen une uruk wilil, it aphe at inuk suon­tep­furuk elehon halug, war inabu­kag ulug minduhupfirisi-o.

¹⁶ Min­duhupfuruk atisimu, at walo etnowen it yi aphe di aphe inim, eke it inaharek werehon inim, eke it inaharek elehon inim, eke it ap suon epmano inim, eke it inanggimbu epmano inim obog-at yig isaruk wilil, “Hit obog walo suon epmano inuk hininggik bikit ­fil inim, eke hinilahoag fam inim holal umburuk amiek-o.

¹⁷ Eke hit walo suon epmano inuk holal hininggikmu, eke hinilahoag fam elehon halug yi angge di angge onggo it nin og iseheg, eke inonggareg hunseheg suruk amuhup fug-o,” ulug at walo etnowen it aphe obog epmano yig isarisi-o.

¹⁸ Wene ariroho yig isarision etno hit hinindi eng­garon halug, ebe undamon hinahla buruk amiek-o. Ari walo inuk holal balehon etno ap ininuk neken wereg oke, at aholal enam ratus enam puluh enam wereg-o.