Wahyu 12 - Allah Wene Hurumbik Keron

Walo etnowen hwe etno muko wariug ulug surukmu ilanggen hebahon wene 12:1-18

¹ Eke fobik boholmen sukfugangge surukmu nil harikik-o. Nil harikikseg weregma, at hwe misig, asum mo neken wanteheg eke iog bikalem fam embeheg, eke soholoal dua belasen angge unggu­lasum neken wanteheg surukmu nilanggen harikik-o.

² Ni­langgen haruk heheg, at hwe etnowen udag enderiug ulug suruk wilil, hinel watukmu nilanggen harikik-o.

³ Nilanggen haruk heheg, eke fobik walo sabilik hahon misig suon etno olohore mebon wahari­si-o. Waharuk wilil, ungguluag sabiren angge werehon etno, ayeg ungguluag famen lahabehon epmano nomaloen angge welatisi-o. Ariro­ho wilil, ungguluag obog epmano fam unggulasum wanteg wilil wahari­si-o.

⁴ Waharuk atisireg, boholmen ahe silug watuk wilil, soho­loal anggolo kweanma belabik waharisi-o. Belabik waharuk atisi­reg, at hwe udag enderiug ulug surukon etno olohotmen minatisi­reg, epma welatisi-o. Minduhuk wilil, udag endag atuk halug, naminen ulug welatisi-o.

⁵ Ariroho weregma, eke at hwe etnowen amloho endetisireg, ahla buruk wilil, “Udag du sega seneg wi­lil, it yi aphe di aphe inowe welaruhu-o,” ulug ahla birisi-o. Ahla buruk atision oke, it ninen udag etno hambogsoho At Allah weregma imbik laharusa-o.

⁶ Imbik laharuk atusama, hwe etno inggik seribu dua ratus enam puluh fam welamag ulug At Allahen ibam misig dig dug seko imbirisimu, at hwe etno o limu aphe eleg ambeg epmano hite larisi-o.

⁷ Hite laruk atisimu, eke fobik at Mikhael omalaikat epmano inimen at walo omalaikat etno inim wim aptusa-o.

⁸ Wim aptuk atusareg, eke at walo etno inap­marepfurusareg, it epmanowen uruk wilil, “At walo omalaikat inim boholma welam ari hai-o,” ulug uruk atusareg, eke walo etno senoko hik isarusa-o.

⁹ At walo etno, inuk misig Iblis, eke inuk misig Setan soalehon etnowen it o kweanma aphe epmano enggal-at yig isarisi-o. Ariroho yig isaruk atision etno at omalaikat epmano inim o kweanma belap inabik waharusa-o.

¹⁰ Belap inabik waharuk atusama, eke fobik boholmen une suon urukmu holtikik-o. Nesanggo holeg weregma, une etnowen uruk wilil, “At Allahen aphe inili wawon epmano kidia fanggog ehek-o. Eke At Allah inim, At Amloho Kristus etno inim suon ahesa-o. Suon ahesareg fam, At Allah olohotma ninomini nintul nantul inambolma dahaltukon epmano boholmen hik isehesa-o.

¹¹ Eke At Wam Domba Udag etnowen amep inake delfag halug, it ninomini epmanowen at setan etno seberepfehesa-o. Eke it epmanowen wene demat urukon etno yig isaruk wi­lil, nit waram fano at-o, ulug uruk atusa-o.

¹² Ari halug, hit boholma welahebon hinahien suruk amiek-o. Eke hit kweanma, ikma welahe­bon epma hinabua-o. At iblis etno hinambeg ambehekseg fam, ahla buruk wilil, Allahen war nabukon etno fanggog ehek hihi-o, ulug asine anggolo hehek-o,” ulug une etnowen irisi-o.

¹³ Une etnowen uruk atisimu, eke at walo iblis etnowen kweanma belap nabik wahesa ari nambit-o, ulug ahla birisireg, hwe udag ende­tision etno mutlug larisi-o.

¹⁴ Mutlug larisimu, at hwe etno aherabul biren og ituk atusama, at hwe etnowen ahla buruk wi­lil, waloen libil nabuk nowen ulug o limu aphe eleg ambeg epma­no tiga setengah tahun welaruhuk-o, ulug ahla buruk atisi­reg, o epma lenggaliog ulug sirisi-o.

¹⁵ Lenggaliog ulug suruk atisi­mu, at walo elmen ik suon misig larukon etnowen hwe etno walug lawag ulug wilipfirisi-o.

¹⁶ Wilipfuruk atisimu, at kwean etno­wen hwe etno ili wiug ulug kahal atisimu, ik etno kwean apma ambirisi-o.

¹⁷ Ik etno amburuk atisimu, at walo etnowen hwe etno obam asine haruk wilil, at udaki etno obog war inabiug ulug larisi-o. At hwe etno udaki ari, it Allahen wene duroho suruk amuk eke duroho suruk am fug ulug ebahon etno inesanggo holtuk wilil, Yesusen yig isebahon etno eberoko warukon welatusa-o.

¹⁸ Ariroho weregma, eke an ik laut ikma minduhuk welatikik-o.