Wahyu 11 - Allah Wene Hurumbik Keron

It ap biren Allah wene yig isarukon epmano ilanggen isebahon wene 11:1-14

¹ Eke fobik e kal walangge surukon misig og nituk atusareg, yig nituk wilil, “Minatlug o Allah ibam inim, eke At Allah ake umbu­ruk ambeg inim wal himin-o. Wal haruk apmihinteg, it ap Allah ibam epmen sembahyang urukon epmano inebe wane inapmihin-o.

² Eke o Allah ibam o silama epmano wal hao sohorep isamihin-o. Eke it selema Allah wene inapelehon epmanowen o Yeru­salem bikalem empat puluh dua wilil mialtil lahubon etno o Allah ibam o sila­ma epmano og isarusareg fam, o silama etno wal hao sohorep isami­hin-o.

³ Eke it ap biren An nawene yig isaru­kon epmano lahap isahuk-o. Lahap isaruk aruhukmu it ap epmano sum ahe hahon supnig wilil, Allahen hurumbik fobik suhuon etno ininggik seri­bu dua ratus enam puluh fam wilil yig isaruk amuhup-o,” ulug yig nitisi-o.

⁴ Eke e anggur biren etano inim, eral biren o kweanma inowe suon olohotma werehon epmano inim ilitoho, it ap biren Allah wene yig isarukon etano wereg-o.

⁵ Ariroho weregma, ap misihen war inabi­og ulug suruk halug, inelmen hondok ambul­pul wilip atuk wilil, it inim healehon epmano war inaptuk-o. Ariroho weregma, it obohen war inabuog ulug suruk isalug, ari it biren etnowen war inabuhup at-o.

⁶ Eke it epmanowen Allah wene yig isaruk heheg, osit ambik wamon etno eleg amag ulug bohol sok labukag ulug minduhup isarisi-o. Eke misig ari, ik eleruk funaltukon etno il mep sahalukag ulug minduhup isarisi-o. Eke misig ari, o kweanma inindien bulug war inabukag ulug minduhup isarisi-o.

⁷ Minduhup isarisimu, eke iren At Allahen hurumbik suhuon etno aphe obog yig isarusa-o. Yig isaruk atusa­ma, eke fobik kwean kahaleg ambeg epmanowen walo etno lahik waharisireg, inim wim aptusa-o. Inim wim aptuk atusama, at walo etnowen war inaptisi-o.

⁸ War inaptuk atisimu, it inebe warohon epmano o ahik sumu Ninowe e salib fam waroko embebag ambeg epmano kwalema yinggig welatusa-o. Yinggig welatusa ambeg etno inuk Sodom, eke inuk misig Mesir epmano ilitoho neken-at soaleg welatisi-o.

⁹ Ariroho soaleg weregma, eke it aphe o ahik ya da epmano inungguluag dombog inim, eke inune yion dion urukon epmano inim ininggik tiga setengah fam wilil inebe warohon epmano bik isaruk atusareg, kweanma salepfuk sohorep isarusa-o.

¹⁰ Sohorep isaruk atusama, eke it aphe o kweanmon obohen, ap biren etano o kweanma aphe war ninaptuk atuson epmano war atusa ari ninahien-o, ulug urusa-o. Ariroho uruk atusareg, esoho naruk wilil, yi angge di angge epmano at misihen omin og ere­heg, at misihen omin og ereheg surusa-o.

¹¹ Suruk atusareg, ininggik tiga setengah weregma, At Allahen iniluk inaptu­kon ele ahahe etno inobam fu haruk atisimu minatusa-o. It biren epmano minatusama, eke it aphe obohen inilanggen isaruk atusareg, inakol anggolo haru­sa-o.

¹² Inakol harusareg weregma, eke fobik boholmen une suon it ap biren Allah wene urukon epmano yig isaruk wilil, “Hit hag lahik maniek-o,” ulug yig isari­si-o. Yig isaruk atisimu, eke hena etnowen walug boholma imbisa laharukmu it inim healeg welatuson epmano inilanggen lahap isarusa-o.

¹³ Lahap isarusama, eke fobik hetnogsoho o yugul suon suruk wilil, aphe inibam o ahik sumu werehon epmano anggolo miale­heg, aphe inebe tujuh ribu war inabeheg sirisi-o. Ariroho suruk atisimu, eke it aphe iniluk welatuson epmanowen inakolen elekelek suruk wilil, Allah boholma werehon etno inuk suontepfuruk atu­sa-o.

¹⁴ Suontepfuruk atus­areg, birenam war ninaptisi ari nina­kol-o, ulug inahla buruk atusa-o. Inahla buruk atusareg, eke henahanam ariroho war nina­buhu-o, ulug inahla burusa-o.

At malaikat sabiron etnowen ambinggon uneap surukmu ilanggen hebahon wene 11:15-19

¹⁵ Eke fobik at malaikat sabiron etno ambinggon une suon irisimu, o boholmen inune amitmit uruk wilil, “It aphe kweanma inungguluag dombog Inikni aruhuon etno, At Allah inim, eke Amloho Kristus inimen ombatarusa-o. At Inowe suon Raja itog mondog-at welaruhu-o,” ulug urusa-o.

¹⁶ Ariroho urusama, eke it penatua inebe dua puluh empat At Allah olohotma horie uruk ambeg epmano inolohore wanduksoho kweanma sebe urusareg, At Allah obam sem­bahyang uruk wilil,

¹⁷ “Ninikni Allah wa. Hat walhan hoag were­hon-at welahen-o. Amuk welahenag etno hag, fobikoho welaruhun at-o. Ari halug, Haren hoag werehon suontepatarikinteg fam, Inikni suon Raja-at welahen-o. Nit wa ulug yig hituk ahe-o.

¹⁸ Eke it aphe o ahik ya da inungguluag dombog inasine haruk atusama, eke kidia Hat hasine isaruk ahen-o. It waratuson epmano oag del inabukon etno arat fanggog ehek-o. Hat hanggimbu epmano, it nabi ap epmano inim, it inindi fanowon epmano inim, it Hat hobam ebe­tukon epmano inim, inebe doron suon inim onggo fanowon og isawon etno arat fanggog ehek-o. Eke it kweanma duma dahapsebahon epmano elehap inabuhunon etno arat fanggog ehek-o,” ulug urusa-o.

¹⁹ Uruk atusama, At Allah ibam o boholma etno sok husirisimu, undama werehon epmano selegma atisi-o. Nin eke sehenyabog inim, inune inim, bohol une inim, o yugul inim, osit haplanggen inim waharisi-o.