Wahyu 1 - Allah Wene Hurumbik Keron

1:1-3

¹ Wahyu wene du fam At Yesus Kristus etnowen bukaloko yig epahon etno wereg-o. Ariroho embebag ari, fobik suhuon wene etno it Allah anggimbu obog iniluk amag ulug, At Allahen Yesus Kristus yig ituk apagma, At Kristus etnowen anggimbu Yohanes etno yig emag ulug omalaikat misig ambeg belabik wapag-o.

² Belabik waharuk apareg, yig ituk apagma, at Yohanesen ilanggen hebahon etno aphe obog iniluk amag ulug buku du fam wene holal embe­bag-o. Ari halug, At Allahen ebahon inim, eke At Yesus Kristu­sen wene demat urukon ebahon etno inim, obog-at buku du fam weregma,

³ it buku du inilanggen haruk wilil wane surukon epmano inim, eke it hurumbik ebahon du inesanggo holtukon inim, eke it buku du fam weregma ilitoho surukon epmano inim, obog-at inahien ha­wag-o. Eke kidia hurumbik ebahon atog ilitoho sukon etno fanggog ik wariog ulug suruk-o.

It aphe jemaat sabiren angge heahi war inapahon wene 1:4-8

⁴ At Yohanes etnowen it aphe o Asia jemaat sabiren angge etno inaholal umburuk wilil, “Nomini-o, At Allah walhan itog mondog werehon etno inim, eke At Allah olohotma ahurangge inebe sabiren angge werehon etno inimen hit fano welamuhuben ulug inahien hinobam umburuk-o.

⁵ Eke At Yesus Kristus wene demat urukon etno yig niseheg, eke it ap o ahik ya da suon epmano Inowe suon welaheg, eke Amloho manggia neken it warehon imbisaruk ambehen iluksoho minduhupfebahon etno ahien hinobam umburuk-o. Eke At Yesus etno nit ninebe indi hunduhuk wilil, ninake waratuk apa­reg, niren dag suruk aheon epmano ninobam ninapelegsoho Aren apma ninombisahabag-o.

⁶ Ariroho ninombisaharuk apareg, nit ninebe At Ikni Allah anggimbu wilil, eyabuk suruk amag ulug minduhup nisahabag-o. Ariroho minduhup nisahabareg fam niren nintul nantul At Yesus Kristus oag werehon etno inuk-at suontepfuruk amuhuk-o. Amin.

⁷ Eke fobik At ebe hena famen ambik waharukmu, it aphe obog inim, eke it ebe wapahon etno inim inilanggen haruk amuhupseg, it aphe o kweanma obohen ioba yabuhup-o, ulug ihi ari, an demat yig hisaruk ahi-o. Amin.

⁸ Eke At Ninikni suon Allah etnowen uruk wilil, ‘An nebe alem neken enggabuk neken an-at welahi-o,’ ulug yig nisaruk ari, At bilin welapahon etno inim, kidia werehon etno inim, fobik welaruhuon etno inim At ebe misig-at wilil yig nisaruk-o,” ulug at Yohanes etnowen holal embebag.

At Kristus ebe nilanggen harikik-o ulug wene holal embebahon wene 1:9-20

⁹ At Yohanes etnowen wene holal umburuk wilil, “An hinomin Yohanes etno alem Allah wene inim, eke At Yesus Kristus inuk etno inim yig isil larikikseg fam, ik anggenma inuk Patmos etno lahap naharusama welatikik-o. Eke hit dahon hinobam umburuk etno hag, an dahon nobam umburusa-o. Ari halug, At Allah weregma welamu­hukon inim eke At Yesus Kristus inuk fam wene demat urukon etno inim hit ninim dambuksoho waruk ahe-o.

¹⁰ Waruk aheon oke, eke o hari Minggu fam an Roh Kudusen og nitukmu, nilanggen biren barentoho yet harikik-o. Yet haruk atikikseg, an nambolmen binggon une suon neken urukmu nesanggo holtikik-o.

¹¹ Holtikik­seg weregma, une urukon etnowen yig nituk wilil, ‘Hat hilanggen hamihinon etno buku fam holal balmihinteg, it aphe jemaat o Asia epmano lahap isahun-o. It aphe jemaat ininuk ari, Efesus-o, Smirna-o, Pergamus-o, Tiatira-o, Sardis-o, Filadelfi­a-o, Laodikia-o, o epma holal baloko lahap isahun-o. Lahap isahun ulug yig hirihion etno, An yi angge di angge alem inim, enggabuk inim unde wereg etnowen-at yig hirihi-o,’ ulug yig nitukmu nesanggo holtikik-o.

¹² Holtuk atikikseg, at sa une yig nituk ulug nilanggen haminen nahla buruk wilil, nolohore dahagsoho yet harikik. Yet haruk atikik, eral fisako umburuk ambeg emas fam sehon inebe sabiren angge epmano weregma,

¹³ inanggelegma bulmu epmano at misig ebe ap hahon etno asum yaron iogmu wanteg wilil, amigmu aserlog emas fam sehon etno wanteg weregma harikik-o.

¹⁴ Ariroho weregma harikikseg, eke At ebe iruk etno huluon wilil, ilanggen hondok am­bulpul neken yibatuk weregma harikik-o.

¹⁵ Eke At etno iog seng engga moen libil labal suruk etno hag abikag suruk wilil, At une ik hul amburuk wilil une suon uruk etno hag urukmu hari­kik-o.

¹⁶ Eke soholoal sabiren angge inggik bikit filen senere­heg eke elmen karog enggat femag femag werehon wilipfeheg suruk wilil, At olohore mo yatukon etno ilitoho abikag surukmu ni­langgen harikik-o.

¹⁷ Nilanggen haruk atikikseg, an nebe ware­hon neken At iogmu bule ambirikik-o. Amburuk atikikmu, At ing­gik bikit fil nebe seberoho nombaharisireg, yig nituk wilil, ‘Hat hakol ha fug-o. An alem inim enggabuk inim unde werehon An at-o.

¹⁸ An nebe bilin nowapahon oke, niluk atuk seyahon An at-o. An niluk nitog mondog-at welaruhuk-o. Eke waratukon alem etno Anden napma umburuk seyareg fam, o it ap warehon wereg ambeg unde etno An at-o.

¹⁹ Eke yi angge di angge kidia werehon epmano inim, eke fobik seg amuhubon epmano inim haren hilanggen haruk ahenon etno holal fam imbimihin-o.

²⁰ Eke soholoal inebe sabiren angge ninggik bikit filen seneg welahion epmano ari, it aphe jemaat sabiren angge epmano ap inaso werehon neken wereg-o. Eke eral umburuk ambeg emas fam sehon inebe sabiren angge werehon epmano it aphe jemaat sabiren angge epmano neken wereg-o,’ ulug wene herahowon etno bukaloko yig hirihi-o, ulug yig nitukmu nesanggo holtikik-o,” ulug holal balfag.