Titus 3 - Allah Wene Hurumbik Keron

Duroho suruk amuk-o ulug yig epahon wene 3:1-11

¹ Suon inim, it inowesi epmano inim inesanggo fanoroho holtuk wilil, hiren yabuk fanowon misig siek ulug yig nisaruk hisalug, nit suhuk at-o, ulug ukag ulug yig isaruk amin-o.

² Eke hinenggal-at ap misig obam denggeluk fug ulug yig iseheg, eke aphe inim inindi hunduhuk welamon etno inim, eke inindi seberoho welamon etno inim eke it yi aphe di aphe obog inim fanoroho welamon etno inim, ariroho sukag ulug yig isaruk amin-o.

³ Eke nit bilin ariroho-at urunanggeroho wilil, ninik­nisi inune holeheg eleg-at dag suruk atukuk-o. Eke nit ninin­dien-at yi dag di dag suruk atukuk-o. Eke nit nambit ham­bit uruk wilil, niren it aphe ninambit hun inabeheg, eke it apheyen nit inambit hun ninabeheg suruk atukuk-o.

⁴ Ariroho suruk atu­kukon oke, eke fobik At Allah ninili warukon etnowen indi hun­duhuk wilil ninabua nisaruk atisireg, ninili warisi-o.

⁵ Eke nit fano suruk nisalug, ninili warisi fug-o. Aren ahmu nisaruk wilil, Roh Kudus fam ninindi ho ninaptuk atisireg, ninindi werehep nisaharisi-o.

⁶ Eke At Allahen At Yesus Kristus ninili warukon etno ninake og nisaruk wilil, Roh Kudus kelegso­ho og nisarisi-o.

⁷ Eke At Yesusen nit ninonggo baltisireg fam, At Allah ninim dambul atukukseg, niniluk welamon etno og nisa­hu-o ulug ninindi ebetuk wilil, niniluk welamon etno huluog ulug suruk ahe-o, ulug wene ari demat yig hirihi-o.

⁸ Eke yi wene di wene yig hirihion epmano it aphe fikfag yig isawag ulug yig hiri­hi-o. Eke it obog Allah wene demat ulug eberoko warukon epmanowen nintul nantul yi angge di angge fanowon-at suruk arik ulug inahla bukag ulug yig hirihi-o. Eke yi angge di angge fanoroho suruk wilil, inindi fanowon keron-at heag sahup-o.

⁹ Eke yi angge di angge farim urunanggeroho winimug aptukon etno inim, eke ninetamuki ininuk du-o ulug wene yaron urukon etno inim, eke wene duroho suruk amuk eke duroho suruk am fug ulug ebahon etno farim yuhun-at winimug aptukon etno inim, ariroho urukon etno ebe mondog eleg halug sohorep isin-o.

¹⁰ Eke ap misig aphe heal inaptukon etno misi­him esanggo ware­heg, eke birenam esanggo wareheg suruk atlug, fobik akeleg sohorep isin-o.

¹¹ Eke ap arion halug, obabut dahon wilil, aren surukon etno fam onggarehen oag del saruk-o.

Holal atog arat balfahon wene 3:12-15

¹² Eke anden at Artemas ano, Tikhikus ano hat hambeg lahap isa waruhukmu, hat o Nikopolis epma nea wariog ulug su­hun-o. Eke fobik o salem neken sohik etno fam an o epma welaru­huken ulug nahla birikik-o.

¹³ Eke at Zenas wene baltukon etno inim, eke at Apolos etno inim o yatma misig lahuken ulug suruk isa­lug, haren orom inim uang inim og isaruk aruhunteg, mondep isahun-o.

¹⁴ Eke it ninomini Allah wene yanggul isarukon etno yuhun-at yabuk seheg eleg welam nowen ulug yi yabuk di yabuk fanowon inim, eke aphe yalmag isarukon etno inim nintul nantul sukag ulug yig isaruk amin-o.

¹⁵ Eke it obog an ninim welaheon epmanowen heahi war haptuk-o. Eke hat homini nit ninobam inindi hunduhuk werehon epmano heahi war inabin-o. Eke At Allahen hit obog hinabua hisawag ulug yig hisihi-o.