Titus 1 - Allah Wene Hurumbik Keron

1:1-4

¹ An Paulus At Allah anggimbu wilil Yesus Kristus awene yig isil nuruk amag ulug mondep naharision etnowen wene holal du bal hirihi-o. Eke it aphe At Allahen imig inapahon etno wene du demat ulug inahla buruk wilil, fikfag yanggul isawag ulug heag naptisireg lahap naharisi-o.

² Eke anden wene du demat ulug yanggul isaruk ahion etno fam it apheyen niniluk welamon etno og nisahu-o ulug inindi ebetuk-o. Eke At Allah enggal uruk elehon etnowen o kweanma duma awan wal haruk eleg wilil, hini­luk welamon etno og hisahuk ulug, abug yig nisaruk apareg,

³ fobik At awene etno yig nisaruk wilil, dindiloko yig nisari­si-o. Ariroho yig nisarision etno anden it aphe yig isawag ulug minduhup naharisimu, At Allah ninili warukon etno inuk fam yig isaruk ahi-o.

⁴ Eke hat Titus, an ninim wene demat ulug ebetuk ahe etno fam hat namloho neken welahen ari, At Ninikni Allah inim, eke At Kristus Yesus ninili warukon etno inimen habua hearuk wilil, fanowon etno og hemag ulug hake sembahyang uruk ahi-o. Eke fanoroho hinim welamag ulug yig hirihi-o.

Iren Allah yabuk fanoroho sukag-o ulug yig epahon wene 1:5-16

⁵ Eke haren yi angge di angge sukon etno suruk amag ulug yig hituk wilil, it aphe demat ulug ebetukon epmen it ap heako min inabu­hunen ulug o Kreta epma hombahalug waharikik-o. Eke an bilin ariroho suhun ulug yig hitikikon etno hindi ebetuk amin-o, eke ap Allah wene yig isarukon welamon etno it apheyen inune obam deng­geltuk eleg isalug, eke hwe misig-at ohowon halug,

⁶ eke at udaki Allah wene demat ulug ebetuk isalug, eke ap du udaki inesanggo wareg eleg wilil inikni une holtuk eleg-o, ulug it aphe ninen inune obam umburuk eleg isalug, ap arion-at Allah wene yig isarukon welamag ulug mindu­hupfuk fano-o.

⁷ Eke at ap Allah wene yig isarukon ari dag suruk eleg halug, Allah yabuk etno aso welamag-o.

⁸ Eke ap etno indi arik elehon inim, eke asine elehon inim, eke ambusu nenek surukon etno donggogsoho naruk elehon etno inim, eke yi angge di angge yu­hun-at hulik ulug ahla buruk elehon etno inim, eke ap huso waharukmu fikfag inabua surukon etno inim, eke fano sukon nindi ulug ahla buru­kon etno inim, eke indi humbulihon etno inim, eke obabut fano­won etno inim,

⁹ eke wene du demat ulug indi fam eberoko waru­kon inim, ap arion aphe inindi aso welamag ulug minduhupfuk ari fano-o. Eke ap arion halug, wene etno fanoroho iluk wilil, it aphe nin inesanggo wareheg, eke it nin inenggal urukon epmano winimug yig iseheg suruk aruhu-o.

¹⁰ Eke it nin hag, inindimuen an suon ulug buruk wilil, an-at niluk-o, ulug yig iseheg, eke it aphe nin inindi kahaleheg suruk-o. Eke it bilin Yahudi ap wela­pahon epmano ariroho suruk-o.

¹¹ Eke it ap ariroho inenggal urukon etno bok amag ulug yig isimuk-o. Eke it epmano dahan fahan suruk wilil, inaharek anggolo amag ulug o sili misig keheg sil nuruk wilil, wene dahon-at it yi aphe di aphe yig isaruk-o.

¹² Eke ap iron o Kreta welapahon epmano misihen yig isaruk wilil, “It Kreta ap ari inenggal-at urukon wereg-o. Eke it inebe wam neken inaboraliroho wilil, inahum heheg naruk-o,” ulug ebag etno demat ebag-o.

¹³ Eke it inebe ariroho wereg isalug, haren hune oag weregsoho winimug yig isahun-o. Ariroho yig isahun ari Allah wene demat ulug inindi ebebukag ulug yig isahun-o.

¹⁴ Eke it Yahudi aben suit dindilabug urukon etno inim, eke it ap wene demat urukon etno inambit haruk wilil, inongga­rehen ariroho siek ulug yig isarukon etno inim, obog-at sohorep isawag ulug yig isahun-o.

¹⁵ Eke it ap inindi fanowon halug yi angge di angge obog-at nao ari fano at-o. Eke it ninen Allah wene ebetuk eleg wilil, inindi dahon halug, yi angge di angge nawon etno usa ulug uruk-o. Eke it ariroho urukon epmano inahla burukon inim, eke inobabut surukon inim obog-at sabele neken denggelepatalug wereg-o.

¹⁶ Eke inuneyen nit At Allah ebe niniluk-o ulug urukon oke, eke iren surukon etno fam At Allah ebe inapeleg-at-o, ulug selegma atuk-o. Eke it epmano yi dag di dag seheg, eke Allah wene inesanggo holuk sohorep iseheg, eke fanoroho suruk amon etno inapeleg aheg suruk-o.