Roma 7 - Allah Wene Hurumbik Keron

It hweap suhweon inahuni keron holaruk etno hag nit At Kristus ninim welahe-o ulug yig isebahon wene 7:1-6

¹ Nomini-o, at Musaen wene duroho suruk amuk eke duroho suruk am fug ulug ebahon etno hiniluk halug, anden yig hisaminon etno hinindi ebetlihip-o. Ari halug, ap misig iluk wilil, uhwe inim welamag ulug yig nisaruk-o.

² Eke hwe ap ohowon etno ahun iluk wereg halug, inim welamag ulug yig nisaruk-o. Eke ahun etno waratuk halug, hahun hinim welamuk yig itukon etno eleg atuk-o.

³ Eke ari halug, at ahun ebe awan iluk wereg heheg, ap misig holaruk halug, ahun etno-at ilag waruk-o. Eke at ahun etno waratuk halug, at hwe etno suhwe atlug ap misig holaruk halug, ahun etno-at ilag waruk eleg-o.

⁴ Eke ariroho suruk etno hag, hit hinebe ari ilitoho welahep-o. Eke wene duroho suruk amuk eke duroho suruk am fug ulug ebahon etno hinim welam sohorep isalug, hweap inahuni waratukmu suhwe wereg etno hag welatikipseg, hit hinebe At Kristus udaki atikip etno fam hinebe kidia Aren angge-at welahep-o. Ari halug, eke e anggen fanowon yihik wereg etno hag, ninebe At Allah il fam fanoroho welamag ulug At Kristus ebe etno aphe warehon wereg ambeg epmanowen iluksoho minduhupfebag-o.

⁵ Eke bilin ninobabut amukon wilil, yuhun-at surukmu, wene duroho suruk amuk eke duroho suruk am fug ulug ebahon etnowen alem du dahon ulug yig nisaruk heheg, ninindien-at yi dag di dag suruk atukukon epmano ebetuk atukukseg fam, waramon etno huluog ulug surukuk-o.

⁶ Eke it hweap inahuni waratukmu suhwe wereg etno hag, wene duroho suruk amuk eke duroho suruk am fug ulug ebahon etno fam hele war ninapahon etno ninim welam sohorep isarukuk-o. Eke ari halug, wene duroho suruk amuk eke duroho suruk am fug ulug ebahon wene holal balfahon etno alem amukon at-o ulug ninahla buruk wilil, anggimbu neken welam sohorep isalug, kidia At Roh Kudusen yig nisarukon etno hag alem keron at-o ulug anggimbu welahe-o.

Wene komo yig isebahon etno fam alem dahon etno niniluk atuk-o ulug yig isebahon wene 7:7-13

⁷ Eke ari halug, keroho uk-o? Wene duroho suruk amuk eke duroho suruk am fug ulug ebahon etno dag-o ulug ariroho uk ari fano buruk ahep ano? Ari eleg-o. Eke wene duroho suruk amuk eke duroho suruk am fug ulug ebahon etno fam du dag suruk ulug niluk atisi-o. Eke wene duroho suruk amuk eke duroho suruk am fug ulug ebahon etno fam ap inaharek hulik ulug hinahla buk fug-o, ulug yig etlep fugmen, anden ap inaharek hulik ulug nahla bukon etno ari alem dahon at-o, ulug nahla bele fug-o.

⁸ Eke wene duroho suruk amuk eke duroho suruk am fug ulug ebahon etno fam, du dag suruk, ulug yig nitukon etno alem neken weregma, at alem dag surukon etnowen nindi kahaltuk wilil, yi angge di angge obog hulik ulug hindi eberin-o ulug yig nituk-o. Eke wene duroho suruk amuk eke duroho suruk am fug ulug ebahon etno ebe eleg welatlepmen, alem du dahon ulug ninindi ebebukon etno ninapeleg-at welatlo-o.

⁹ Eke wene duroho suruk amuk eke duroho suruk am fug ulug ebahon etno napeleg wilil, nebe niluk welatikikon oke, eke fobik wene duroho suruk amuk eke duroho suruk am fug ulug ebahon etno fam alem du dag surukon-o, ulug niluk atuk atikikseg,

¹⁰ nebe etno waratuk ahi ulug nahla birikik-o. Eke wene duroho suruk amuk eke duroho suruk am fug ulug ebahon etno aphe iniluk inabukag ulug og nisebahon oke, an hag nebe nowatisi-o.

¹¹ Eke wene duroho suruk amuk eke duroho suruk am fug ulug ebahon etno fam du dag surukon ulug yig nitukon etno alem neken weregma, at alem dag surukon etnowen nindi kahaltuk atisireg, nowatisi-o.

¹² Ariroho sirision oke, wene duroho suruk amuk eke duroho suruk am fug ulug ebahon etno akeleg neken og nisebareg fam, wene komo yig nisebahon etno moron fanowon-at wereg-o.

¹³ Eke ari halug, niren wene fanowon etnowen-at nowatisi-o ulug uk ari fano buruk ahep ano? Ari eleg-o. Alem dag surukon etnowen-at nowatisi-o. Eke komo wene fanowon etno-at yig nitukmu, alem dag surukon etnowen nowatisi ari, alem du dahon at-o, ulug selegma amag ulug nowatisi-o. Eke ari halug, wene duroho suruk amuk eke duroho suruk am fug ulug ebahon etno fam alem dag surukon ari mondog dahon at-o ulug selegmaroho bukal atisi-o.

It aphe inebe misig-at oke alem biren neken healeg wereg-o ulug yig isebahon wene 7:14-26

¹⁴ Eke wene duroho suruk amuk eke duroho suruk am fug ulug ebahon etnowen hinindi duroho welamiek ulug yig nisaruk ari niniluk oke, eke an nebe kweanmon etno hag dag surukon etno anggimbu neken welahi-o.

¹⁵ Eke anden suruk ahion etno nahla buruk ahi fug-o. Eke duroho suhuk ulug nahla buruk ahion etno hag suruk ahi fug-o. We du suk nambit ulug nahla buruk ahion etno-at suruk ahi-o.

¹⁶ Eke an suk nambit buruk ahion etno-at suruk ahi ari fam, wene duroho suruk amuk eke duroho suruk am fug ulug ebahon etnowen demat yig nisaruk-o ulug nindi ebetuk ahi-o.

¹⁷ Eke ari fam, dahan fahan suruk ahi etno anden suruk ahi fug-o, at alem dag surukon nindimu werehon etnowen-at ariroho suruk-o.

¹⁸ Eke ari halug, an nobam alem fanoroho surukon etno mondog eleg ulug niluk-o. Eke an fanowon du suhuk ulug nahla buruk ahion oke, anden ilitoho sukon etno hai atuk-o.

¹⁹ Eke fanowon du suk nindi ulug nahla buruk ahion oke, suruk ahi fug-o. Alem dahon suk nambit haruk ahion etno-at suruk ahi-o.

²⁰ Eke an alem dahon suk nambit haruk ahion etno-at suruk ahi ari fam anden ariroho suruk ahi fug ulug selegma atuk ari, alem dag surukon nindimu werehon etnowen-at suruk-o.

²¹ Eke ari fam, alem biren neken nindimu weregma haruk ahi-o. Eke fanowon du suhuk ulug nahla buruk wilil oke, dag sukon etno imihiog ulug suruk ahi-o.

²² Eke nindi undamen At Allahen wene duroho suruk amuk eke duroho suruk am fug ulug ebahon etno nahien haruk ahion oke,

²³ alem dahan fahan surukon misig nindimu wereg haruk ahi-o. Eke alem dahan fahan surukon etnowen an nahien haruk ahion etno inim healeg wereg-o. Eke alem dahan fahan surukon etnowen an nebe alem dag surukon nobam werehon etno anggimbu welamag ulug hele waroko nombaharuk-o.

²⁴ Eke an nebe etno fanoroho welahi fug-o. Eke an nebe etnowen waramon etno-at huliog ulug suruk oke, at sen nili wahu-o?

²⁵ Eke an hag At Ninowe Yesus Kristus inuk fam Allah wa ulug yig ituk ahi-o.

²⁶ Eke ari halug, duroho-at welahi-o, an nonggareg nindien At Allahen wene duroho suruk amuk eke duroho suruk am fug ulug ebahon etno mutlug liog ulug suruk ahion oke, eke nebe kweanmon etnowen alem dag surukon etno mutlug laruk ahi-o.