Roma 2 - Allah Wene Hurumbik Keron

At Allahen ninaren baltuk atlug ninenggali waroko ninombisahaku-o ulug yig isebahon wene 2:1-16

¹ Nomin-o, haren it ap nin inaren baltuk wilil, uruk ahen ano? Eke haren it duroho suruk ulug inaren baltuk wilil, ilitoho suruk ahen du hili huliog ulug suruk ahen ano? Eke hat misig honggareg hobam-at denggelsaruk ahen-o.

² Eke it dag surukon ari At Allahen inaren balepfulug dag seko imbisahu ari demat suhu-o ulug niniluk heheg,

³ it dag suruk-o, ulug inaren baltuk ahen oke, hat ariroho suruk ahenon epmano At Allahen dag seko hombahaku fug ulug buruk ahen ano?

⁴ Eke At Allah etno ninabua nisaruk wereg heheg, at une sebeluk ulug uruk ahen ano? Eke nit dag suruk aheon epmano ninobam ninapelegsoho apma ninombisahalug, ninindi wereg amag ulug ninabuen yig nisarukon epmano hapelegma uruk ahen ano?

⁵ Eke At Allah asineyen demat ninaren balepfulug onggo baloko selegma ninombisahaku etno sambit o dagma hombahakuon oke, hat hahlahiroho welahen ari fam mondog dagma-at hombahaku-o.

⁶ Eke At Allahen it yi aphe di aphe inobam dombog surukon epmano fam onggo ilitoho-at og isahu-o.

⁷ Eke it aphe nin fanowon epmano suruk wilil, At Allah nabelal habelal og nisawag ulug obam inindi ebetukon epmano inim, eke fano surukon epmano inim, At Allahen mondog iniluk welamag ulug og isahuon oke,

⁸ eke it aphe nin epmano inindimuen suontepataruk wilil, wene demat urukon etno sohorep isalug, dag wene etno, inindi ebetukon ari, At Allah asineyen onggo dag seko imbisahu-o.

⁹ Eke it obog dag surukon epmano At Allahen fobik o hondok olokma imbisahu ambeg epmen oloken yahan watuk amuhup ari, it Yahudi ap inim, eke it Allah wene inapelehon inim ariroho-at suruk amuhup-o.

¹⁰ Ek it obog fano surukon epmano, At Allahen akeleg neken fuloko imbisalug, heahi waroko dambuk inaptuk aruhu ari, it Yahudi ap inim, eke it bilin Allah wene inapeleg welatuson epmano inim obog-at dambul inaptuk aruhu-o.

¹¹ Eke ariroho suhu ari, it apheyen inaren baltuk wilil, it inominien surukon halug seberoho embeheg, eke it werlekonen surukon halug selegma bukaleheg suruk ari hag, suhu fug-o. At Allah ninaren baltuk wilil, it dag surukon epmano onggo dagma imbiseheg, eke it fano surukon etno fanoma imbiseheg suhu-o.

¹² Eke it aphe Allah wene inapelehon epmano hag, at Musaen wene duroho suruk amuk eke duroho suruk am fug ulug ebahon etno inapeleg wilil, iren dag surukon epmano fam o dagma welamon etno-at holahup-o. Eke it Yahudi ap epmano hag, at Musaen wene duroho suruk amuk eke duroho suruk am fug ulug ebahon etno iniluk wilil, iren wene duroho suruk amuk eke duroho suruk am fug ulug ebahon ilitoho suruk eleg etno fam o dagma welamon etno-at holahup-o.

¹³ Eke wene duroho suruk amuk eke duroho suruk am fug ulug ebahon etno inesanggo holtuk isalug-at, ari fam At Allahen alem dahon inobam werehon epmano elehepfuhu fug-o; wene duroho suruk amuk eke duroho suruk am fug ulug ebahon etno ilitoho suruk isalug hag, At Allahen alem dahon inobam werehon epmano elehepfuhu-o.

¹⁴ Eke it aphe Allah wene inapelehon epmano wene duroho suruk amuk eke duroho suruk am fug ulug ebahon etno inapeleg oke, inonggarehen inahla bulug wene duroho suruk amuk eke duroho suruk am fug ulug ebahon etno ilitoho suruk-o. Eke it epmano wene duroho suruk amuk eke duroho suruk am fug ulug ebahon etno inapeleg oke, inonggarehen-at ariroho siuk ulug yig saruk-o.

¹⁵ Eke it epmano wene duroho suruk amuk eke duroho suruk am fug ulug ebahon etno inapeleg wilil oke, inindimu wereg etno it inobabut surukon epmano fam selegma atuk-o. Eke ariroho selegma atuk ari, inahla burukon epmano fam komo yig isarukon epmano inim-at selegma atuk-o. Eke iren it it hat du dag sehen ulug obam denggeleheg, eke at misig hobam eleg ulug alem elehepfeheg suruk-o.

¹⁶ Eke ari halug, o ari sambit At Allahen At Yesus Kristus inuk fam it yi aphe di aphe obog inindimu herako ebetukon etno selegmaroho bukaloko umbulug inoag del inabuhu-o, ulug an wene fano wene etno fam yig hisaruk ahi-o.

It Yahudi ap etno wene duroho suruk amuk eke duroho suruk am fug ulug ebahon etno-at seneg wereg-o ulug yig isebahon wene 2:17–3:8

¹⁷ Eke hat hag, an Yahudi ap welahi ulug uruk ahen du, wene duroho suruk amuk eke duroho suruk am fug ulug ebahon etno hiluk wilil, At Allah Ninikni-at wereg ulug suontepfuruk ahen-o.

¹⁸ Eke At Allahen ariroho siuk yig hisebahon epmano wereg heheg, fano surukon du at-o, ulug hindimu ebetuk ahen-o.

^19-20 Eke hat yi angge di angge epmano alem niniluk amag ulug wene duroho suruk amuk eke duroho suruk am fug ulug ebahon etno fam demat yig nisaruk-o, ulug hiluk neken wilil, it ap inilanggen buhon epmano kwalem duroho laruk ulug yanggul iseheg, eke it o hikmu werehon epmano selegma imbiseheg, eke it urunanggeroho werehon epmano inesanggo wareheg, eke it udag doron neken werehon epmano komo yig iseheg suruk amon ari an at-o, ulug hahla buruk ahen-o.

²¹ Eke ari halug, it nin hag yanggul isaruk ahenon oke, honggareg hag yanggul saruk ahen fug ano? Eke apheyen angge epmano herahuk fug-o, ulug yig isaruk ahenon oke, honggarehen hag halomnangge heraharuk ahen ano?

²² Eke haren ap inuhweyon diloko wa fug-o, ulug yig isaruk ahenon oke, haren diloko holaruk ahen ano? Eke hat monggat mutlug lao nambit uruk ahen du, o Allah ibam epmen halomnangge heraharuk ahen ano?

²³ Eke hat Allahen wene duroho suruk amuk eke duroho suruk am fug ulug ebahon etno suontepfuruk wilil, ilitoho suruk ahen fug du At Allah enggali watuk ahen ano?

²⁴ Eke ariroho suruk ahen ari fam at Alkitab etnowen yig nisaruk wilil, “It Yahudi aben dahan fahan suruk isalug, it ap Allah wene inapelehon epmanowen At Allah inuk seberepfuruk-o,” ulug yig nisaruk-o.

²⁵ Eke hat hiyunggul ambilik balehon du, wene duroho suruk amuk eke duroho suruk am fug ulug ebahon etno ilitoho suruk healug, fano at-o. Eke ilitoho suruk eleg healug, hat hiyunggul ambilik baleg ari werlek-at baleg welahen-o.

²⁶ Eke at ap misig Allah wene apeleg wilil, iyunggul ambilik baleg elehon etnowen wene duroho suruk amuk eke duroho suruk am fug ulug ebahon etno ilitoho suruk halug, at ebe Allah il fam iyunggul ambilik balehon neken wereg eleg buruk ahen ano?

²⁷ Eke hit Yahudi ap it ap Allah wene inapelehon epmanowen-at oag del hinabuhup-o. Ariroho suhup ari, hit hag wene duroho suruk amuk eke duroho suruk am fug ebahon etno wene holal embeheg, eke hiniyunggul ambilik bal seheg, suruk wilil oke, wene ebe hag seberoko imbisaruk ahep-o. Eke it hag inebe iniyunggul ambilik baleg eleg wilil oke, wene ebe-at inesanggo holtug ilitoho suruk-o.

²⁸ Eke at misig ahap selemen Yahudi ap neken wilil, ebe iyunggul ambilik balehon etno demat Yahudi ap neken wereg eleg-o.

²⁹ Eke ap misig ahap selemen-at Yahudi ap ulug wereg eleg-o. Eke wene holal baleg etno uneyen-at wane sulug Yahudi ap atuk eleg-o. We indi undama At Allah Roh Kudusen fano sirision etno hag ari demat Yahudi ap ulug wereg-o. Eke at ap arion hag it apheyen suontepfuruk eleg-o, At Allahen-at suontepfuruk-o.