Roma 16 - Allah Wene Hurumbik Keron

Hiren it aphe epma at Paulusen heahi war hinabehek-o ulug yig isebahon wene 16:1-16

¹ Eke at ninahaloho Febe o Kengkrea Allah yabuk surukon etno fanoroho hinim welamag ulug yig hisihi-o.

² Eke it Allah udakien inomini inim fanoroho welamuog ulug suruk etno hag, hit At Ninowe inuk fam at hwe etno fanoroho hinim wilil, aren yig hisaruk halug fanoroho yalmaharuk amuk-o. Eke at hwe ebe it nin obog inim, eke an inim fanoroho welamuhuken ulug ninaohi esag ninaptisi-o.

³ Eke it Priskila Akwila ninim At Kristus Yesus eyabuk suruk aheon epmano heahi war inaptuk ahi-o.

⁴ It epmano ap ninen war inabukon inahlahiroho wilil, an nili wuog ulug surusa ari fam wa ulug yig isaruk ahi-o. Ariroho heahi war inaptuk ahi ari, an nakelehen-at suruk ahi eleg-o. It Allah udaki Allah wene bilin inapeleg welatuson epmanowen inim-at heahi war inaptuk-o.

⁵ Eke Allah udaki it inibam epma sembahyang uog ulug wonggaltukon epmano inim-at heahi war inaptuk amuk-o. Eke at an nomin nindi hunduhukon inuk Epenetus bilin o Asia epmen Kristus awene eberoko warision etno inim,

⁶ eke at hwe Maria hit hinake yabuk anggolo sirision etno inim heahi war inaptuk amuk-o.

⁷ Eke it ap an nungguluahon ininuk Andronikus Yunias etano, ninim o aphe dahon imbisaruk ambeg hele waroko kolap nisaharuson etano inim-at heahi war inaptuk amuk-o. Eke an At Kristus awene etno awan waruk eleg neyeheg it etanowen bilin warusareg fam, it ap mondep isebahon epmanowen it inebe iniluk-o.

⁸ Eke at Ampliatus, at ninowe ninim wilil nindi hunduhuk welahion etno inim-at heahi watuk amuk-o.

⁹ Eke at an nomin Urbanus, At Kristus eyabuk ninim suruk aheon etno inim, eke nomin nindi hunduhukon Stakhis etno inim obog-at heahi war inaptuk amuk-o.

¹⁰ Eke at Apeles At Kristus inim wilil at obabut suruk ninilukon etno inim-at heahi watuk amuk-o. Eke it at Aristobulus omini inim werehon epmano inim-at heahi war inaptuk amuk-o.

¹¹ Eke at ap misig an nungguluahon inuk Herodion etno inim, eke at Narkisus omini At Kristus awene waruson epmano inim obog-at heahi war inaptuk amuk-o.

¹² Eke it hweap Trifena Trifosa At Ninowe eyabuk surukon etano inim, eke at nomin nindi hunduhukon inuk Persis At Ninowe eyabuk anggolo sirision etno inim obog-at heahi war inaptuk amuk-o.

¹³ Eke Rufus, At Ninowe eyabuk akeleg neken surukon etno inim, eke at isina an nisina neken welatision etno inim obog-at heahi war inaptuk amuk-o.

¹⁴ Eke it Asinkritus inim eke Flegon inim eke at Hermes inim eke at Patrobas inim eke at Hermas inim eke it ninomini Allah wene warukon it inim werehon epmano inim obog-at heahi war inaptuk amuk-o.

¹⁵ Eke it Filologus inim eke at hwe Yulia etno inim eke at Nereus ot hweap angge etno inim eke at Olimpas etno inim eke it Allah udaki inim werehon epmano inim obog-at heahi war inaptuk amuk-o.

¹⁶ Ariroho suruk wilil, hit hit inim-at nomin homin ulug heahi war war uruk amuk-o. Eke it Kristus udaki obog epmanowen inim-at heahi war hinaptuk-o.

Holal etno atog arat baliog ulug inesanggo wapahon wene 16:17-24

¹⁷ Nomini-o, it ap ninen aphe fano werehon healoko imbiseheg, eke it apheyen wene demat ulug ebetukon etno seberoho embeheg, eke wene yanggul hisarukukon epmano hai neken inahla beheg surukon epmano fikfag yaharoho wilil, hinim dambuksoho welam fug-o, ulug yig hisaruk ahi-o.

¹⁸ Eke it epmano hag At Ninowe Kristus eyabuk sukon etno suruk eleg wilil, yi angge di angge og isawon etno-at heahil sil nuruk-o. Eke ariroho sil nuruk ari, inune fanoroho uruk wilil, inune esoho fanoroho eheg suruk etno fam it aphe inobabut fanowon etno inenggal-at yig isaruk-o.

¹⁹ Eke hit hag wene fano wene etno fanoroho-at eberoko waruk ahep ari fam it yi aphe di aphe obohen inesanggo holtusa halug, an nahien hisaruk ahi-o. Eke fano surukon etno hag hiniluksoho wilil, dag surukon epmano hinapeleg welam ari fano nahla buruk ahi-o.

²⁰ Eke At Allah nit dambuk ninaptukon etnowen at iblis etno hiniog hendan bisalukag ulug dulum-at hinapma umbuhu-o. Eke At Ninowe Yesus etnowen hinabua hisaruk wilil hinim welamag ulug yig hisihi-o.

²¹ Eke at Timotius yabuk ninim suruk aheon etno inim, eke it an nungguluahon ininuk Lukius, Yason, Sosipater etano inimen heahi war hinaptuk-o.

²² Eke an Tertius ninggik fam holal du balihion etno ninimen At Ninowe inuk fam heahi war hinaptuk ahi-o.

²³ Eke at Gayus, an nebe inim, eke it Allah udaki obog inim ibam og ninaplug kurukon etnowen inim-at heahi war hinaptuk-o. Eke at Erastus o duma uang unde werehon etno inim, eke at ninomin Kwartus etno inimen heahi war hinaptuk-o.

²⁴ Eke At Ninowe Yesus Kristus etnowen hinabua hisaruk wilil, hit obog hinim welamag ulug yig hisihi-o.

Holal baloko etno atog fam At Allah inuk-at suontepfuruk amuk-o ulug yig isebahon wene 16:25-27

²⁵ Ari fam, nit obohen At Allah inuk-at suontepfuruk amuk-o. Eke wene fano wene yig hisaruk ahion etno inim, eke At Yesus Kristus awene etno inim, eke wene o amuk herako neken welapahon oke, kidia selegma bukaloko yig nisarukon etno inim obog-at hiren demat-o ulug hinindi ebebukag ulug At Allahen hinindi oag werehon etno og hisiog ulug oag weregsoho suruk-o.

²⁶ Eke wene amuk heraho neken welapahon etno it nabi aben hurumbik wene holal embebag etno fam selegma bukaloko yig nisebag-o. Eke ariroho yig nisebag ari, At Allah ilukon itog mondog werehon etnowen ariroho yig isil alu-o ulug mondep isebareg fam, it yi aphe di aphe o ahik ya da werehon epmano obog-at iniluk amag ulug yig isil laruk-o. Eke ariroho yig isil laruk ari, it aphe obog inim, eke it bilin Allah wene inapeleg welatuson epmano inimen, wene etno inesanggo holtuk wilil ilitoho suruk amag ulug yig isil laruk-o.

²⁷ Eke At Allah akeleg-at yi angge di angge alem iluk werehon etno At Yesus Kristusen surukon epmano fam inuk nintul nantul suontepfuruk amuk ulug an demat yig hisaruk ahi-o.