Roma 15 - Allah Wene Hurumbik Keron

Hit hinahien huog ulug sukon etno sohorep isalug, it hinomini nin-at inahien hawag ulug suruk amuk-o ulug yig isebahon wene 15:1-6

¹ Eke nit At Allah obam ebetuk wilil, ninindi oag weregsoho welaheon epmanowen it ninomini inindi oag eleg heheg angginon inobam werehon epmano yalmag inabuk ari fano at-o. Eke nit ninahien huog ulug sukon etno sohorep isalug,

² it ninomini epmano inahien hawag ulug suruk am ari fano at-o. Ariroho suruk wilil, it inebe fano aheg, inindi oag wereg aheg sukag ulug suruk am ari fano at-o.

³ Eke At Kristus etno hag ahien hiog ulug sebag fug-o. Ariroho suruk apag fug ari fam, At Alkitab wene holal baleg etnowen yig nisaruk wilil, “It apheyen inune dahon hat hobam umburuson epmano An-at nobam umburusa-o,” ulug bilin wene holal embebag etno nit inim-at yanggul nisawag ulug embebag-o.

⁴ Eke it bilin inahlahiroho wilil inindi oag weregsoho welapahon wene epmano holal embebag ari, niren Alkitab wene holal baleg etno wane seheg, ninindi ebereheg suruk wilil demat fano ninabuhu ulug ninahla bukag ulug embebag-o.

⁵ Eke At Allahen inahlahiroho wilil inindi oag weregsoho welamon etno og isebag etno hag, hit ariroho hinebe dambuksoho hinindi misig-at wilil, At Kristus Yesusen sebahon epmano ilitoho suruk amon etno og hisawag ulug yig hisihi-o.

⁶ Eke ari fam, hit obog hinebe dambuksoho hinune misig-at uruk wilil, At Allah Ninowe Yesus Kristus Ikni etno inuk-at suontepfuruk amag ulug yig hisihi-o.

Wene fano wene etno it ap bilin Allah wene inapeleg welatuson epmano yig isa waharisi-o ulug yig isebahon wene 15:7-13

⁷ Eke ari halug, At Kristusen ahmu hisebag etno hag, hiren At Allah inuk suontepfuog ulug hit hit nabua habua suruk amuk-o.

⁸ Eke At Kristus it Yahudi ap iniyunggul ambilik balehon epmano inanggimbu neken apareg wilil, At Allahen ebahon etno demat ebag inahla bukag ulug seheg, eke At Allahen it inetamuki hurumbik yig isebahon epmano demat sirisi ulug iniluksoho seheg,

⁹ eke it ap bilin Allah wene inapeleg welatuson epmanowen At Allahen ninabua nisarisi etno wa ulug inahla buruk wilil inuk suontepfukag ulug seheg suruk apag-o. Eke alem ari fam Alkitab wene holal baleg etnowen yig nisaruk wilil,

¹⁰ “It ap bilin Allah wene inapeleg welatuson epmano inanggelegma epmanowen wa ulug yig hituk wilil, hat hinuk-at suontepfuruk aruhuk-o,” ulug uruk apareg, eke alem misig ­yig nisaruk wilil, “Hit ap bilin Allah wene hinapeleg welatikibon epmanowen At Allah udaki imig inapahon epmano hinim hinahien haruk amuk-o,” ulug uruk apareg, eke alem misig yig nisaruk wilil,

¹¹ “Hit ap bilin Allah wene hinapeleg welatikibon epmano inim, eke hit yi aphe di aphe hinungguluag yion dion obog epmano inimen At Hinikni inuk-at suontepfuruk amuk-o,” ulug uruk apagma,

¹² eke fobik at Yesaya etnowen yig nisaruk wilil, “At Isai etamu misig etno lahik waharuk aruhumu, it ap bilin Allah wene inapeleg welatuson epmano Inowe welamag ulug minduhupfuhu-o. Minduhupfuruk aruhumu, it epmanowen Aren fano ninabuhu-o ulug inahla buhup-o,” ulug wene holal embebag-o.

¹³ Eke ari fam, At Allahen fano ninabuhu ulug ninahla buruk aheon etnowen hit hinahien hawag ulug yig hiseheg, eke hiren At obam ebetuk ahebon epmano fam dambulip hisahakeg suruk amag ulug yig hisihi-o. Eke ariroho dambulip hisaharuk aruhumu, Aren fano ninabuhu-o ulug hinahla buruk ahebon etno At Roh Kudusen oag werehon etno og hisaruk halug, su aruhu-o.

At Paulusen an alem du hinesanggo war hinabihi-o ulug yig isebahon wene 15:14-21

¹⁴ Nomini-o, hit hag hinobabut fano mondog welahep ari demat ulug nahla buruk ahi-o. Eke hit yi angge di angge obog alem hiniluk wilil, hit hit hinesanggo war war uruk amon etno demat hiniluk welahep ulug nahla buruk ahi-o.

¹⁵ Eke ariroho nahla buruk ahion oke, holal du fam nune oag weregsoho hinesanggo war hinabihi ari, hiren alem nin hinindi ebebukag ulug-at yig hisihi-o. Eke an nune oag weregsoho hinesanggo war hinabihi ari, At Allahen nabua nearuk wilil,

¹⁶ it aphe bilin Allah wene inapeleg welatuson epmano yig isawag ulug At Yesus Kristus anggimbu neken minduhup naharisi-o. Ariroho minduhup naharisireg fam it aphe bilin wene inapeleg welatuson epmano anden Allah wene fanowon etno yig isaruk wilil, it epmano At Roh Kudusen inindi yabuk suruk halug, At Allah il fam inobabut fano amag ulug neyabuk suruk ahi ari, it ap Allah unde epmanowen bilin Allah ake fanoroho umburuk apag epmano hag suruk ahi-o.

¹⁷ Eke ari fam, an At Kristus Yesus ninim wilil, Allah yabuk suruk atikik etno fam suontep naharuk-o.

¹⁸ Eke an nune oag weregsoho uruk ahi ari, At Kristusen yig nitukmu-at yabuk suruk atikik ulug yig hisaruk ahi-o. Eke At Kristus ninim yabuk sulug eleg anden-at yabuk sirikik ulug uk ari an nakol-o. Eke At Kristus etno ninim yabuk suruk wilil, it aphe bilin wene inapeleg welatuson epmano Allah wene inesanggo holtuk amag ulug nune yig iseheg, eke yabuk seheg,

¹⁹ eke elalintoho sukfugangge seheg suruk wilil, At Roh Kudus etnowen ninim ninoag weregsoho surukuk-o. Ariroho suruk wilil, o Yerusalemen o Ilirikum kwalema luog ulug larukuk-o. Kwalema laruk wilil, At Kristus awene fanowon etno yig isil larikik-o.

²⁰ Ariroho wene fano wene etno yig isil laruk wilil, it At Kristus inuk inesanggo holtuk eleg ambeg epmano-at yig isil larikik ari, ap misihen o andorli belabeg ambeg etno anden falihi ha nowen ulug, wene inapeleg ambeg-at yig isil larikik-o.

²¹ Eke ari fam Alkitab wene holal baleg etnowen yig nisaruk wilil, “It At awene yig iseheg eleg werehon epmanowen inilanggen hahup-o. Eke it inesanggo holtusa fuhon epmanowen demat ulug inindi ebebuhup-o,” ulug yig nisaruk-o.

At Paulusen hit Roma aphe bik hisa warahuk-o ulug yig isebahon wene 15:22-33

²² Eke ari fam, nintul nantul hinambeg bik hisa wariog ulug sirikikon oke, hai atisi-o.

²³ Eke an kidia o duma neyabuk etno arat suruk atikikseg, an nebe tahun anggolo wilil bik hisao wam nindien sirikikon etno kidia bik hisa waruhuk ulug nahla buruk ahi-o.

²⁴ Eke an fobik o Spanyol epma waharuk wilil halug, kwalema bik hisao nindi-o. Ari fam, hit welahep ambeg epma nininggik dorat ninim ninahientoho welatlug o Spanyol etno wariog ulug mondep nahakup ano, ulug nahla buruk ahion oke,

²⁵ kidia hag it Allah udaki o Yerusalem werehon epmano yi angge di angge og isiog ulug lahuk-o.

²⁶ Eke it Allah udaki o Makedonia Akhaya inim werehon epmanowen it Allah udaki o Yerusalemon inaharek elehon epmano yi angge di angge og isuog ulug Allah ake yi angge di angge umbuhuk inahla burusa ari,

²⁷ inonggarehen-at ariroho inahla burusa oke, it inaharek elehon epmano og isuog ulug nomat neken inobam wereg-o. Eke it aphe bilin Allah wene inapeleg welatuson epmanowen wene fano wene etno wawag ulug it Yahudi aben yig isarusareg fam, kidia it aphe bilin Allah wene inapeleg welatuson epmanowen inaharek yi angge di angge epmano it Yahudi ap og isao ari fano at-o.

²⁸ Eke uang it ininuksoho umburuson etno obog-at og isa lahukseg, hit welahepke arien o Spanyol waruhuk-o.

²⁹ Eke hinambeg waruhuk ari, At Kristus ahien ninobam umbukon wene etno suon-at walug waruhuk-o.

³⁰ Ari halug, nomini-o. At Roh Kudus etno ninindi hunduhuk wilil, At Ninowe Yesus Kristus ninim welahe ari fam yig hisamin ari, hiren ap wim duhure bik isa laruk etno hag, an nake nintul nantul At Allah obam sembahyang uruk amuk-o.

³¹ Eke it Yudea aphe Allah wene ninambit urukon epmanowen nowabuk nowen ulug hit nake sembahyang uruk amuk-o. Eke it Allah udaki o Yerusalem werehon epmano yi angge di angge og isa lahukon ari inahientoho holawag ulug sembahyang uruk amuk-o.

³² Eke ari fam At Allahen fano ulug ahla buruk halug, nahien anggolo haruk wilil hinambeg waruhukseg, sat yalsaruk wilil fanoroho ninim welamuhuk-o.

³³ Eke At Allah yi aphe di aphe dambuk ninaptukon etno hit obog hinim welamag ulug an demat yig hisihi-o.